Willis現於尖沙咀 solo開樓上鋪，不過他坦言生意以批發及網店為主，故將會結束這間門市。 

創業通

專賣特色樂器配件　網店月賺$25,000

創業要看潮流外，找自己在行的生意，亦是致勝之道。像 80後的 Willis因鍾愛夾 band，中六時已引入日本水貨，賣電子結他及其他配件，雖然生意因拍檔赴外地升學而結束，但去年他再接再厲，獨自向日本及美國供應商取貨，於網店及樓上鋪賣特色樂器配件，專攻本地連鎖音樂店沒有的貨色，成功吸納到不少 band友支持，現時月賺 2萬多，更開始打入內地市場。

中六時賣日本水貨

早於中六時， Willis已經想到引入日本水貨於網上售賣，有次與朋友到日本旅行，買了幾個結他及配件，試放上網賣，轉手已賺過千元，於是開始走水貨生涯。拍檔負責揀貨購買，他則在網上發售，生意持續了 2年。「嗰 2年一路都賺到錢，每次去一轉，都賺到 3、 4千，但拍檔之後去外國升學，我自己又唔熟結他，惟有暫停。」
升上大學後， Willis曾搞過補習中介網及 marketing公司，可惜都失敗收場。一直熱愛創業的他，年多前想轉換生活環境，到波蘭生活了幾個月，其間識到當地的貿易公司，負責替對方到內地採購單車及農產品。 12年回港後，又再度創業，開設出口公司，每月約有 3萬收入，足夠生活。
見公司生意理想， Willis便重燃音樂生意之火，去年 5月再開網店，從日本及美國攞貨，「以前走水貨，成本高，又花時間，𠵱家網絡咁發達，上網唔難聯絡到供應商，只要用電郵往來，就可以攞到貨。」

原來結他 pick可以有不同質料，圖中為毛氈、皮、夜光及透明膠 pick。 

飛機款的 Kazobo外形得意，售$170。 

大 Kazobo像喇叭，有各種顏色選擇，售$100。 

鐵製的 music spoon可用來伴奏，$60。 

專賣市面沒有款式

Willis以前主打電子結他，但結他要試彈音色及比較大件，故他改入細件又不用試音的配件，如結他 pick等，另外又專揀選本地連鎖音樂店沒有的貨品售賣，「香港得兩間大型嘅音樂連鎖店，佢哋通常只入大路嘅產品，就算佢哋攞咗啲牌子代理，都唔會入齊啲款。」 Willis會到外國網找特色的產品，又會上香港的討論區，看看年輕人常談論及喜愛的貨品，對症下藥去採購。
於最初經營時，也困難重重，「美國生產商容易啲攞貨，就算少量都得，加上大家用英文容易溝通好多；但日本生產商就唔同，好在我有日本嘅朋友幫手翻譯，同埋佢哋攞貨要好大量，好似我向佢哋購買一款 ukulele D.I.Y.套裝，第一次試貨落單都要 2萬。」該套裝可以讓客人自行組合好 ukulele，並加工油上不同顏色、圖案，非常受歡迎，不過 2個月已賣光，誰知第 2次落單，已被要求至少入 10萬貨。「貨量實在太多，我索性搵內地廠生產，推出呢啲 D.I.Y.套裝。」

台灣歌手盧廣仲在台上用 Kazobo表演。台灣《壹週刊》圖片 

去年年尾 Willis曾參與勞工處舉辦的創業攤位， 2日營業額有約 3萬。 

Willis找內地廠自家生產 ukulele D.I.Y.套裝，分 21吋及 23吋兩個 size，分別賣$350及$400。

組裝好的 ukulele還可讓客人加工繪圖。 

客人 Aki我喺網站見到啲結他 pick，款式好多又靚，每次一有新貨，我都會買。 

開樓上鋪生意冷清

熱愛日本樂隊 Luna Sea的 Willis，曾遠赴日本看演唱會，兼四處搵貨。 

解決了貨源， Willis試開門市，之前與耳筒公司夾份在旺角開店，後來索性搬到尖沙咀 solo樓上鋪，「可惜樓上鋪人流少，好難吸到生客。」 Willis只好想辦法宣傳，曾試過在 facebook落廣告，但效用不大，「反而叫客人喺 facebook share相片，買嘢會有 9折，以人傳人方式宣傳仲好，同埋我又會贊助一啲本地 band，例如夜光鼓棍，佢哋出完騷嗰排，好好反應，銷量升成倍。」
去年 9月， Willis曾到上海樂器展參觀，想找一些特別產品，但與其他公司在 QQ交流後，反而令不少公司對其產品感興趣，向他取貨。「佢哋覺得我嘅產品好特別，所以向我攞貨，大家溝通容易啲，香港又冇關稅問題，佢哋同我入貨仲平過直接向美國批發商入貨。」

淘寶開店摸索市場

打開了內地市場後， Willis還在淘寶開店，銷售情況亦理想，「淘寶嘅競爭都好大，頭半年都係摸索期，好似之前遇到好多運輸問題，啲快遞費用好貴，一份最少都$40，仲貴過件產品，之後我學識格價，同埋寧願畀折啲客，游說佢哋買多幾件，咁平攤番個郵費，就唔會太貴。」
現時店鋪以網站、門市及批發 3線發展，當中批發便佔了 6成生意， 3成來自網站，反而門市作用不大，因此 Willis已計劃關閉門市，把產品放在格仔鋪售賣，加上有了生產 ukulele經驗，未來計劃多生產自家品牌產品，「遲啲想再生產多啲自己嘅嘢，建立一個品牌，同埋擴闊銷售門路，好似嚟緊暑期，我都同一間 playgroup合作，開辦 ukulele親子課程，畀家長同小朋友一齊 D.I.Y. ukulele同學習點彈，試吓作多元化嘅發展。」

去年 Willis到上海樂器展，認識了不少公司，打開了內地批發的市場。 

Willis於 6月把貨品放於旺角的格仔鋪售賣。 

開業成本
租金：$0
入貨：$9,000
總投資：$9,000

每月收支
租金：$5,500
人工：$10,000（ 1人）
入貨：$20,000
營業額：$60,500
盈利：$25,000

Philia Musik
網頁： http://www.facebook.com/philiamusik 

入貨注意乜？

Willis表示要找外國的供應商批發貨品，尤其是一些冷門的產品，一定要做足功課，「要多啲上外國網同討論區，睇吓人哋𠵱家興啲乜，不過仲有一個比較快捷嘅方法，就係上外國嘅大型 online shop，佢哋啲產品都好齊備，可以作為參考，好似我就經常上美國嘅 music123.com搵資料。」
至於入貨時，則要留意運輸問題，「一般樂器配件公司會自己搵運輸公司運貨過嚟，但 DHL呢啲超貴，用郵政局就最平，事前最好同對方溝通好，否則就要承擔昂貴嘅運費。」
運到香港後，記得即時 QC，「入貨除咗搵有信譽嘅公司，仲要事前傾好，會唔會有得退貨或換貨，例如 3日內，影相畀對方，如有毀壞，對方就再寄過新貨嚟，咁就比較有保障。」

撰文：洪芳俠
攝影：彭自維
部分圖片由被訪者提供