Edward　 18歲中文大學通識教育系 Yr. 1每次活動， Edward都會落手落腳幫忙，絕不只是指指點點。 

U撈

由派傳單做起　升做項目統籌經理

蘭桂坊酒吧林立，大都需要請人派傳單，今年修讀中文大學通識教育系的 Edward由在酒吧派傳單做起，升上大學後，即被老闆看重，升為酒吧的項目統籌經理，負責籌辦派對活動。由低層升至管理階層，令 Edward感受到社會的現實，雖然工作對學業有影響，但他自言盡早得到社會經驗，對將來畢業搵工更加有優勢。

每天放學後， Edward即到蘭桂坊的 Nova Concepts酒吧上班，採訪當日是下午 6時，記者見酒吧內堆滿一箱箱酒及汽水，原來當晚有活動舉行，離開始的時間愈來愈近， Edward正落手落腳搬汽水，「有咩地方唔夠人手，我就要去頂，唔可以淨係指手劃腳點人做，我可以話係高級打雜。」
今年 3月， Edward成為 Nova Concepts的項目統籌經理，負責籌辦活動及派對，原來他是由派傳單做起，「讀中五時想搵份 part-time，見到呢度請人派傳單，就入咗嚟做，直到我升大學，老闆見我升到 U，覺得我幾有 potential，升我做項目統籌經理，主要舉辦吸引年輕人或大學生嚟參加嘅 party。」
雖然每個月活動只需辦 1、 2個，但事前準備工夫不少，「活動開始前 1個月已經要宣傳，派傳單貼海報，預計當日幾多人嚟，準備幾多飲品等。去到當日要由下晝忙到開場前，跟足晒啲程序，唔可以話辛苦，只係多嘢要跟。」

踢足球是 Edward（中）喜愛的運動，但自從工作後，就少了時間參與。 

十分活躍的 Edward（前中），今年就上了 Hall莊「生浪潮」。 

上莊經驗有助工作

對於籌辦活動， Edward已頗有經驗，「中學時做過學生會外務秘書，上咗 U入咗 hall莊，會搞聯校活動，好似聖誕聯歡會、歌唱比賽等，呢啲都令到我學到點做好個 event，學識人手分配、事前開會要討論乜嘢項目，同埋點 plan進度表等，呢啲經驗都幫到𠵱家份工。」
Edward籌辦吸引大學生參加的派對，在推廣上會有所不同，「對象係學生，定價唔可以太貴，門票大約$250；宣傳方面會集中喺學校，會到唔同大專院校派傳單貼海報；亦會喺 hall莊度宣傳，等啲朋友散消息出去，當中 Yr. 1嘅學生會比較活躍，成日參與活動，所以對佢哋嘅宣傳力度會大啲。」
要辦一個成功的活動，選日子和創意都十分重要，「喺 3月 28日搞咗次 joint-u嘅復活節 party，因為第二日係紅日，又應節，反應好好，好多學生都話有趣。不過都試過撞板，之後喺 4月尾搞咗個面具酒會，但冇留意到大學嘅學期差唔多完，學生要溫書考試，嚟玩嘅人少咗，最後個活動蝕咗幾千蚊。」

現時 Edward不會在街上派傳單了，在記者要求下再次派傳單，感覺已完全不同。 

Edward笑說自己其實只是高級打雜，連抹枱也要做。 

派傳單看現實世界

由傳單仔做起，讓 Edward明白世界十分現實，「派傳單嗰陣，上司只係擺低單張喺門口，返工自動自覺拎去派，冇咩交流；但升咗上大學後，周圍嘅人望你都唔同啲，多咗稱讚，好似覺得你係醒目仔，老闆更加升我職，變化好大。」
年紀輕輕坐上經理之位，對 Edward來說是另一個挑戰，「啱啱開始做嗰陣，有啲差唔多年紀嘅同事，做得比我耐，會唔多滿意我嘅安排，試過講：『你識咩呀，唔使你教』，唔可以同佢嘈，咁對做好件事冇咩幫助，都係慢慢佢同解釋，一齊夾手夾腳做好佢，唔好令佢覺得你淨係識點人做嘢，呢啲都係互相尊重。」
現時 Edward每月約有$14,000的收入，但工作佔用了很多時間，導致他學習成績不太理想，但他並不後悔，「每日返 6點放 12點，有時開會仲要做到凌晨 2、 3點，會影響到成績。其實都係取捨，想累積多啲工作經驗，𠵱家每年都有萬幾個大學生畢業，知道自己成績唔會去到最 top，要喺當中突圍而出，惟有多啲社會經驗，雖然將來未必做番呢行，但多咗條出路。」

布置場地時， Edward會與同事一同商量，會盡量參與每個細節。 

Kelvin HoPrankster design company負責人同 Edward合作過幾次搞活動，覺得佢做事認真，而且好有計劃，最重要係有責任心，跟足晒啲嘢，會推薦佢畀其他朋友識。 

酒吧有暑期工

如果對籌辦酒吧活動有興趣， Edward說現在都等人用，「嚟緊暑假，會搞幾多活動，好需要人手，會請大學生兼職一齊做宣傳活動，好似派傳單、布置場地、諗主題同設計海報等，嚟做嘅最緊要係有責任心，一次活動約有$1,000收入。」有興趣可致電 9128 5479 Edward查詢。

撰文：曾志恒
攝影：黃家活
部分圖片由被訪者提供