漫遊毒物

《 Remember Me》　向洗腦說不

未來世界，所有記憶都會數據化，如果你鍾意，仲可以同其他人 share你嘅記憶，或者學《無痛失戀》咁洗咗一段記憶。儲存大部分記憶數據嘅「 Memorize」公司變成最大當權者，一知你想反抗，就即刻捉你返去洗腦，做個奴才安份生活就可保平安。不過自由無價，唔想做奴才，咁就咪自我洗腦！有啲事情一世都要 remember！講咁耐原來係講 CAPCOM新 game《 Remember Me》？係呀！隻 game真係咁啱六月四號出，唔好河蟹我呀！

spec.

機種： PS3/ XBOX 360
廠商： Capcom
類型： ACT
人數： 1人
售價：$328
查詢：電氣良品（ 2782 0978）

後腦分享 status　唔玩 fb

遊戲背景係 2084年嘅「新巴黎」，由於 21世紀社群網絡熱潮影響，慢慢已經冇人重視個人隱私，結果有公司開發出感知裝置，將每個人嘅記憶數據化，只要有個感知裝置響身上，記憶可以直接分享甚至買賣，由少數人掌控嘅記憶經濟主宰世界。故事開始，女主角妮琳莫名其妙排隊洗腦，千鈞一髮之際俾人 hack入感知裝置，話畀佢知唔可以被洗腦，結果逃出生天成為頭號通緝犯，慢慢仲會發現自己有可能係救世主。

女主角妮琳係最頂尖嘅「記憶獵人」，不過比 Memorize公司搞到失咗憶，為咗搵番記憶而戰鬥。因為識記憶重組，比反抗軍戰友視為救世主。 

遊戲美術設定勁靚，呢個未來巴黎景 Sci-fi得嚟 keep到都市感，每個人頸後好似朵花咁嘅就係感知裝置。 

設定上講全世界上晒網，所以要開門都唔使㩒掣，有相關數據就可以 hack入 server開。

個感知裝置 save曬你所有數據嘅，所有資料都係直接反映響你隻眼度，再簡單講，即係人人內置 Google Glass。 

主角利用咗奧爾嘉？定係佢被組織洗腦，妮琳係幫佢還原？相信要打爆機先知真相。 

記憶重組抗洗腦

《 Remember Me》世界內得妮琳右手個特別裝備可以插入他人感知裝置，進行記憶重組（ Memory Remix），玩家有時需要改敵人記憶先可以過版。好似第二女角奧爾嘉本來係 Memorize最強獵人，以救老公為代價而追殺妮琳，玩家用右手 hack入其記憶。此後會好似睇錄影帶咁，開始見到奧爾嘉對老公嘅一段記憶，當你慢慢旋轉 analog控制 playback，會發現記憶有好多混亂數據，你需要利用呢啲盲點進行記憶重組。不過玩落有難度，改一個記憶會令發展完全唔同晒，要做到目標要慢慢諗清楚事物嘅關連，如果唔係好易 Game Over。

睇記憶時好似睇 VHS咁，去到片尾都未有發現可以做手腳嘅位，就要回帶再睇。 

將奧爾嘉老公個口罩拎開，引發佢襲擊醫生，醫生最後為自保會殺死佢，奧爾嘉就會變成妮琳朋友。 

但如果改錯，例如將呢個記憶裝置方向改變，最後奧爾嘉會硬食老公所有數據，結果變成奧爾嘉爆晒數據死亡引致 Game Over。

隻揪吸招為己用

妮琳本來係頂級特務，但遊戲開始時冇晒記憶，好多嘢唔記得，包括自己嘅戰鬥技巧，好在遊戲進行期間，打低敵人就會偷到記憶體，藉此強化自己 database，解開晒所有戰鬥動作。你甚至可以自己組合連續技，每個動作都有唔同效果同節奏，睇清楚再諗乜嘢連技最強都係樂趣，如果偷嘅係 Boss嘅數據，仲可以將 Boss嘅必殺技數據拎走，變成自己嘅能力，屈機過微博河蟹網民 po文呀！

一開始招式唔多， Combo最多得兩組，玩玩吓記憶就會返晒嚟，攻擊行動都有分多種，有破防、回血等等屬性，玩到差唔多時間上網睇吓網民攻略，組番套最勁組合方屈死 boss。 

消耗蓄力點仲可以出超必，釋放能力後妮琳攻擊會下下破防冇得擋，仲可以做到無限連擊，不過時間得幾秒。 

呢個右手遠距離攻擊裝備，都係其中一隻 Boss嘅絕技，設定型過《洛克人》！

戰鬥之外，《 Uncharted》式攀爬、解謎等都係遊戲重要元素。 

有時敵人俾你打到暈暈哋，可以直接走埋去同佢解放記憶，條友啲數據即刻會爆晒出嚟，跟住失去作戰能力暈低。 

小野義德做顧問　昇龍拳 DLC夠玩嘢

預約特典夠曬好玩，行版已經包埋，春麗招倒頭旋風腿最屈機！ 

其實呢隻遊戲有《街霸 4》嘅製作人小野義德做顧問，搵得佢當然就係擔任戰鬥部分嘅設計啦，雖然玩落就冇乜街霸 feel，不過連技設計等其實都已經有少少日系格鬥感覺。隻 game嘅預約特典仲竟然係三式《街霸》絕技，包括昇龍拳、倒頭旋風腿同軍佬腳刀，非常玩嘢，行版一樣有得送。

CAPCOM執二攤？

去年尾 SCE宣布放棄大批作品，《 Adrift》係其中之一，有網頁覺得可惜，仲特別 label本作為 AAA級。 

原來最初《 Remember Me》係叫做《 Adrift》，首次曝光已經係 2011年嘅 Gamescom遊戲展，當時仲係由 SCE資助喺 PS3獨佔，但後來唔知點解 SCE唔再投資，結果俾識貨嘅 Capcom接手發行權，改名《 Remember Me》於今年 6月先推出，由獨佔變跨平台，對 game迷係一件好事呀！

奴 COMMENT

故事有趣呀，我好喜歡當中的設定，未來世界又加一點舊區古蹟，未來得來不太冷。未來不知會不會像遊戲一樣販賣記憶，不過現在大家將相片心情想法放上網，也是一種分享吧？我自小受日本動畫影響，也希望得到當中像未來一樣的高科技，但原來 Google glass或手機其實已接近當時動畫預測的未來世界了。那麼下一個時代會是怎樣呢？可能真的會像這個遊戲一樣吧！吓，我唔想呀！

撰文：熊俊彥