close
結婚不僅是兩個人的事，婆媳關係差，隨時家無寧日。徐淑敏（Suki）與奶奶情同母女，她跟老公黃浩（Kenny）嗌交，奶奶竟以眼淚攻勢平息！
婆媳關係一直都係夫妻相處重要嘅一課，包括我在內，未同Kenny一齊時，講真係有啲驚同奶奶相處唔嚟。早前我同一班當年落選嘅港姐佳麗聚會，大部分都結晒婚同有小朋友，大家嘅話題慢慢轉移到講自己嘅奶奶。當時人人都話唔識點處理婆媳關係，唯獨我同奶奶關係好到爆，睇我嘅笑容就知我同奶奶嘅關係有幾好，反觀佢哋一講起奶奶就充滿怨氣。
唔係擦鞋，奶奶同我媽咪一樣，係全世界最好嘅人，佢好通情達理，同我以禮相待。好多人一聽到同奶奶住就會好抗拒，但奶奶唔只對我好，仲好似大總管咁打點家中大小事務，一日三餐同照顧我對寶貝女等，安排好所有嘢，令我同Kenny無後顧之憂。冇錯，我同媽咪關係好好，但唔知點解我對佢嘅語氣會好粗魯，但對住奶奶一定唔會，潛意識話我知要相敬如賓，有時搞到連媽咪都有啲呷醋。
眼淚攻勢息紛爭
如果我同Kenny有爭執，奶奶一定會調停。有次我同老公鬧交，奶奶睇唔過眼，不斷勸我哋，仲喊到收唔到聲話：「我真係好心痛，你哋咁好，做乜嘈到影響夫妻關係？我真係心如刀割！」奶奶呢番說話我銘記一世，唔單止眼淚攻勢，更因為佢疼惜我哋嘅夫妻關係，點解我哋兩個當事人要破壞呢？（明日待續）
口述：徐淑敏 筆錄：專案組
Suki跟奶奶相處融洽，婚後生活比很多朋友更快樂：「睇我嘅笑容就知！」
Suki（右三）跟奶奶（左一）情同母女，難怪令媽咪（右一）呷醋。
有奶奶打點家中大小事務，包括湊孫女，令Suki無後顧之憂。
全站熱搜
留言列表
