蜘蛛俠嘅制服有幾唔同又有幾多 detail? Who cares!我只係留意到佢激凸啫! 

來路貨

100%的蜘蛛俠

花膠可以冇魚 DNA,牛丸原來可以用豬肉做。
事實再次證明,呃飯食的太多,貨真價實的太少。
邊好似蜘蛛俠咁吖,有蜘蛛基因又曉噴絲,話咁快仲開拍續集㖭!
電影今年 2月開拍,難得全片 100% made in New York,上周更大陣仗到封街拍攝。唔算巴閉㗎,不過冇范冰冰、冇去中國取景、冇刻意討好強國人,仲冇「到此一遊」四粒大字,單係呢一點,已經夠晒可貴。

 

有錢真係大晒!《鐵甲奇俠 3》,大陸有份投資,戲入面唔係 TCL就係伊利,仲美其名整咗個范冰冰中國特別版,成為全民恥笑對象。
遲下開拍嘅《變形金剛 4》,李冰冰喎,上海取景喎,又係中資背景喎,預想得到,一定成朕強國味。

紐約製造

咁當然,英雄都係人,要撩鼻要去廁所要食飯。強國味唔緊要,唔好咁刻意囉。能夠原汁原味如《蜘蛛俠》,梗係最好啦。
可能係異能所限,蜘蛛俠冇 Iron Man飛天遁地嘅本事,除非坐飛機啫,如果唔係,條蜘蛛絲極其量只會喺美國境內條條 fing,斷唔會彈去北京天壇咁誇。
事實上,由杜比麥奎爾( Tobey Maguire)主演嘅舊版本,以至上一集《蜘蛛俠:驚世現新》,全部喺美國本土取景。而今集《 The Amazing Spider Man 2》更首次全片喺紐約市拍攝,亦係當地歷年來最大嘅電影製作。


新奸角 Rhino由好戲之人保羅哲門馬田飾演,佢憑《酒佬日記》為人熟悉,並多次獲金球獎提名,佢最終於 2011年憑《 Barney’ s Version》稱帝。 

全電影喺紐約市進行拍攝。上周 Rhino大戰蜘蛛俠嘅追逐場口,就喺 Park Ave.同 52街之間封街拍攝。 

當日保羅穿上特製盔甲,扮演變身後嘅 Rhino。相中嘅只係初步效果,要待電腦加工先叫完成。不過就現場所見,盔甲體積頗大,外形應該同變形俠醫差唔多。

大部分動作場面由 Andrew Garfield親身負責。拍攝當日,佢同戲中扮演蜘蛛俠嘅小演員有傾有講,相當親民。 

每一集唔少得災難場面。今次,蜘蛛俠要托起巴士救晒成村人。 

熟口熟面

《 The Amazing Spider Man 2》今年 2月中開鏡,預定 2014年 5月上映。敵人之一 Electro雖然早前已經曝光,不過好戲在後頭,另一敵人 Rhino於 5月中現身,上周更變身跟蜘蛛俠喺紐約街頭惡鬥。
據知今集劇情講蜘蛛俠要兼顧學業、愛情,又要對付兩大奸角。與此同時,舊版本出現過嘅蜘蛛女 Mary Jane以及綠魔兩仔爺都會再次加入。新歡舊愛新仇舊恨,嘩,擺明為第三集鋪路啦。


占美霍士飾演嘅 Electro本來好崇拜蜘蛛俠,但一次意外令佢變成識發電嘅怪物,處處同蜘蛛俠作對。 


Mary Jane一角,舊版本由姬絲汀登絲飾演,係蜘蛛俠女友。不過新版本有所不同,女友仍然係愛瑪史東飾演嘅 Gwen Stacy(左),相反 Mary Jane只會過場形式現身。順帶一提,新 Mary Jane由荷里活小花 Shailene Woodley(右)負責,樣子比舊版靚好多。


綠魔之子同蜘蛛俠係同學,舊版本嘅占士法蘭高靚仔又有型,新版本嘅 Dane DeHaan樣子普通,但勝在夠邪氣。 

撰文:陳盛怡

arrow
arrow
    全站熱搜

    tvb4life 發表在 痞客邦 留言(0) 人氣()