So Comment

元朗平靚正小菜　正記菜館

繼續元朗...
為了證實畀大家睇，作為一個城市人，日日喺街食飯有幾搵笨！有幾多錢係代交租，有幾多錢係真正去咗食物度，於是一連幾期都會去元朗中、西合璧咁四圍去食！

營業時間

原來元朗才是現今香港的不夜天，間間都開通宵的，乜得咁多人咁夜仲未瞓，又做乜個個都食消夜?!真係唔明，我會再深入研究吓，「正記」由 6pm-5am。

格局

似紅磡崇潔街嘅「加太賀」，成條街都係「正記」，隔籬鋪、對面鋪……都係「正記」。

食乜？

唔好信個招牌「粥店」，又唔好信個餐牌，有腸粉食，係冇嘅！「正記」係食小炒同好正嘅潮州滷水。

食物...

朋友話滷水正，先嚟一個滷水鵝片雜拼$160。碟滷水一放低，大家就好似搶食世界咁，搶呀！有鵝片、豬耳、豬大腸、豬小腸、鵝腎、墨魚……豆腐，花生。個滷水好味道，又夠老身，全碟大家都有讚冇彈，就連花生都好正！全碟食到一粒花生都冇！

椒鹽鮮魷$68
魷就好新鮮，冇食香口膠嘅感覺，但炸皮厚了一點，但仍鬆化，可惜唔係椒鹽，反而全部係蒜。

腐乳炒蕹菜$38
超好食，菜係甜嘅，結果唔夠食，再炒多一碟清炒。我就覺得腐乳炒好食得多，因蕹菜係有一啲「寡」味，所以要有濃啲嘅口味先至帶得起菜嘅甜味。

紅燒豆腐$58
豆腐一碟打橫切，比平時食嘅紅燒豆腐大片，但薄了一半。好聰明，因為炸面比較大，所以受汁的面積較廣，而中間白色的豆腐換言之薄咗，全嚿紅燒豆腐都好入味，好正！第一次見人咁切，真聰明！

啫啫雞煲$65
不要叫，好差！下次一定要試葱油脆皮雞，聽到都想食，係白切雞有葱油，但雞皮係爽脆，未食過，聽到個名加埋想像力都流口水！

魚香茄子煲$58
普通。

豉椒炒蟶子時價
好正！蟶子新鮮，又炒得剛好，完全爽，唔韌。豉椒味又好，汁又唔杰，剛掛在蟶子上。

薑葱炒蟹$260
蟹唔靚，肉水咗啲，可以不理。結果我哋 7個人食咗$869，但係減番碟蟹，咪六嚿水落得樓？我朋友話，佢哋平時嚟，大多$70-$80一個人，有時慳啲$50一個人都得，食晚飯噃！水準好過普通，滷水仲正！咁抵去邊度搵，一於大舉殺入元朗擦鑊甘！元朗萬歲！

下次我要再去「正記」食葱油脆雞、椒鹽泥鯭、魚湯浸勝瓜、白灼腰膶、清湯牛腩，當然唔少得滷水同雍菜啦！

正記菜館
地址：元朗金輝徑好盛大廈 4號鋪
電話： 2443 3319

蘇施黃
資深電台人，天生異「口」，除了講嘢叻，食嘢同樣嘴刁，近年開咪、上電視做主持都不離教人食得精，吸引大批粉絲跟佢搵食。

攝影：蘇施黃