close
「煎 pan」睇電話睇到入定咁，車未到腳已先踏出馬路，車親腳趾就大件事！
媽咪姐
陳展鵬危企
無綫呢勻真係屋漏逢夜雨，呢頭兩套重頭劇收視仆直，嗰頭高院唔受理佢反對增發免費電視牌嘅司法覆核。
無啦，局住變陣！眼見玩科幻嘅《高倫布》同劇情悶蛋嘅《金枝貳》唔收，索性搵番套溫情小品《情越海岸線》嚟救亡。身為劇集男主角嘅陳展鵬，講明對套劇有信心。梗係啦，重頭劇都只係收得十幾點，《情》劇一開就有 26點，贏咗《高倫布》同《金枝貳》，總叫救亡成功。
可能因為零壓力，「煎 pan」分外輕鬆。前幾日，媽咪姐就見佢喺中環等的士，佢望住個電話睇到入晒神，仲不自覺愈行愈出，半隻腳踏出埋馬路，真係好牙煙。馬路如虎口，媽咪姐阿仔間幼稚園都有教啦，「煎 pan」冇理由唔識㗎！
雖然極速成為無綫一線小生，不過「煎 pan」當日喺的士站排隊嗰陣，隔籬一齊等車嘅乘客幾乎冇個認得佢，希望今次《情》劇可以幫佢人氣再升啦！ 
上的士時，「煎 pan」終於捨得放低電話，望望路面情況先上車，算佢醒目。 
《情越海岸線》啱啱播，收視唔錯，但媽咪姐睇過少少，感覺好似以前啲師奶劇，仲有幾位猛男做主角，點都好過《神探高倫布》。
全站熱搜
留言列表
