模特兒出身嘅李敏鎬 09年憑《花樣男子》入面嘅「韓版道明寺」走紅(上圖),現已成為韓國一線藝人。 

亞熱帶

花樣美男襲港 李敏鎬

香港近年真係食正韓風。就講今年,韓國組合、韓國靚仔明星排住隊咁嚟,好似《秘密花園》嘅玄彬將於 4月 20號嚟香港開粉絲見面會;跟住有組合 CNBLUE、 Big Bang嘅 G-Dragon同 B.A.P嚟開演唱會。而打頭陣, 4月 18號呢,犀利咯,係真正花美男韓版《花樣男子》嘅李敏鎬襲港啦﹗
李敏鎬此行雖然為著名品牌旗艦店主持開幕禮,但佢會趁此機會同粉絲見面,到時會有 10個幸運粉絲,同佢握手兼抱抱﹗李敏鎬粉絲要 take action搶位啦﹗

 

09年開始,李敏鎬三度話要嚟香港搞見面會,可惜每次都係臨門甩底。直到 12年,因為拍攝代言服裝廣告,先第一次嚟香港。今次雖然都係以代言人身份出席活動,不過佢好識做,話點都要見吓粉絲兼近距離接觸咁話。聽到佢咁講,粉絲仲唔冧到暈咩。



去年李敏鎬為代言服裝喺香港拍廣告時,因其保鑣粗暴對待圍觀粉絲引起爭執,一臉無奈。 

廣告拍唔停

李敏鎬自 09年憑韓版《花樣男子》走紅,人氣爆發得勁過北韓導彈,更被韓國傳媒封為「真正的花美男」。自《花》後,他與朴敏英拍過《城市獵人》(此劇曾在有線娛樂台及 J2台播過),又跟金喜善拍過《信義》兩套電視劇,之後一直專注於廣告拍攝。
咪睇李敏鎬依家撈得咁掂,事實上佢嘅明星之路並非一帆風順㗎。李敏鎬少年時,家庭環境唔好,一邊讀書、一邊兼職做模特兒,一個 job只得 5萬韓圜(約港幣 350元),但卻要交 3萬韓圜俾阿媽做家用。 03年,佢開始跟其他人喺電視劇演一啲打醬油角色,好似當年嘅《玉林的成長日記》同《奔跑吧,鯖魚》,都會見到佢嘅影子。因為做開頭,所以開始演一啲噏得出名嘅三、四線角色。


年初,廣告拍唔停嘅李敏鎬與「少女時代」成員允兒遠赴新西蘭拍攝服裝廣告。 

11年,因為拍《城市獵人》而跟女主角朴敏英撻着,可惜最後卻分手收場。 

李敏鎬於 12年,跟大佢足足 10年嘅金喜善合作拍穿越劇《信義》(原名《神醫》),但收視竟然滑鐵盧。

韓版道明寺似呢!(設計對白) 

正版道明寺OK啦!(設計對白)話時話,驟眼睇,李敏鎬同言承旭(右)氣質的確有啲相似,尤其身高。 

一劇即成王

捱到 08年,有人介紹佢為韓版《花樣男子》試鏡,大抵係時來運到,竟然一 take即中,原因係李敏鎬氣質似足正版暴龍言承旭。果然,他 09年就憑此劇獲得「百想藝術大賞男新人獎」及 MTN最佳廣告男模特獎。李敏鎬由此飛上枝頭。
26歲, 187cm嘅李敏鎬工作日程不斷,今年 5月將會推出首張大碟,並會作亞洲巡迴演唱;跟住開拍新劇《繼承人》。
嗱,喺度再提醒李敏鎬嘅粉絲,記住 4月 18號呀!


李敏鎬同趙寅成原來自小便相識,感情好到李敏鎬可以騎喺趙寅成膊頭。那年李 10歲、趙 19歲。 

李敏鎬同阿爸阿媽幸福家庭照。睇真啲,原來李媽媽好靚,敏鎬咁靚仔,應該似阿媽。 

幼稚園春遊,李敏鎬(左)拖住女同學手仔,原來細細個嘅李敏鎬已經好有紳士風度。不過唔知呢位同學仔依家記唔記得自己俾大明星拖過呢?

李敏鎬於今年 1月出席上海「第 12屆星尚大典」時,曾跟關之琳合照。之後將相片放上微博,並寫上「中國女藝人中只識關之琳」。 

李敏鎬跟中國藝人好有緣,除關之琳外,又跟成龍同獲委任為聯合國兒童基金( UNICEF)大使。

tvb4life 發表在 痞客邦 留言(0) 人氣()