博出位

防疫攻略

內地爆發 H7N9禽流疫症,搞到全港市民人人自危,口罩同板藍根成為大眾搶購目標,驚慌情況如同 03年沙士。內地當局既然慣性延遲公布疫情,港人惟有自求多福,做好預防措施。

何韻詩 封嘴簽名

藝人為咗𢱑銀,不惜冒險北上。好似何韻詩,周日( 7日)現身疫症重災區上海,舉行新碟簽名會。由於現場粉絲眾多,病毒容易散播,於是阿詩決定全程戴口罩簽名,連嘢都唔敢講。其中一名粉絲事後仲幫佢嘅口罩做後期加工,苦中作樂。

應采兒 戴罩保胎

疫情嚴重,懷孕婦女比一般人更注重身體,佗住 6個月小春子嘅應采兒,冇必要更唔出街。即使要做婦檢,佢都一定戴上口罩,但同時又呻戴口罩悶。


周秀娜 全力騷腿

學應采兒話齋,戴口罩的確悶咗啲,事關街上嘅人儼如複製人,個個一式一樣。要突圍而出,就要學周秀娜咁,遮上露下。早前佢拍戲傷腳要睇跌打,戴住口罩嘅佢索性着住超短迷你裙去求診。

趙薇 薑茶強身

強國人趙薇唔敢亂食西藥,反而每晚臨瞓前飲一杯熱薑茶,同埋用熱水浸腳嚟固本培元。媽咪姐認為病向淺中醫,趙薇呢條偏方唔係人人啱用!


森美 西藥救命

預防措施做唔足,真係隨時中招。好似靠把聲搵食嘅森美,日前就患上感冒,要立即搵西醫求救。佢仲將戴住十字架手鏈拎藥丸嘅相放上微博,話神可以幫助佢脫離難關,作狀啲喎!


tvb4life 發表在 痞客邦 留言(0) 人氣()