日前林雪就欠債着草事回應記者,雖然對走佬一事顯得避忌,但他卻不諱言:「個個都鍾意塞錢我使!」語帶輕佻。 

娛聞樂

欠 500萬波債着草大陸 林雪搵甄子丹救命

俗語有云:「十賭九輸」。杜琪峯大導御用專演爛賭差人及古惑仔的林雪,去年突然在港消失,避走大陸,原來因太「入戲」,沉迷賭波致欠近 500萬巨債。
據可靠消息得知,「宇宙最強」甄子丹為免林雪債主臨門禍及林的妻兒,私下現兜兜替對方還債 200萬;而恩師杜 Sir亦仗義幫忙,開 4套戲預林雪拍,未有劇本已先預繳上期共 40萬,幫他渡難關。
難怪近日林雪成個人鬆晒回歸香港搵食,早前他西裝筆挺出席影視娛樂博覽活動時輕鬆回應記者:「佢哋個個對我好好,鍾意塞錢我使!」

 

林雪入行前曾做過果欄咕哩、跟車、小販、侍應等工作, 86年經朋友介紹轉職電影場務,負責道具、燈光、攝影等工作,九○年他獲杜琪峯賞識,由幕後轉做幕前。在電影中,林雪由 PTU到黑社會大佬,正、邪都做齊,不過最入型入格莫過於演爛賭差人及古惑仔。


唔止我一個幫佢!(真實對白) 

最強打救「宇宙最強」甄子丹算唔話得,除了真金白銀替林雪還債外,還安排他參與自己做主角的新片《 3D冰封俠》,令林有工開之餘唔得閒賭錢。 

賭波輸身家

本刊收到消息,去年中,林雪突然在幕前消失,着草大陸。據知一直有鋪賭癮的他,原來早前沉迷賭波,在十個月內輸掉了 200萬。為還債不惜數冚數向財務公司借貸再賭過,結果債台高築,最終欠債高達 500萬。為減支出,據知林雪近日已由荃灣爵悅庭千呎高層單位,「降呢」搬至同屋苑的低層四百呎單位,租金慳番 8千。


輕鬆現身上月 19日,還晒錢回歸香港的林雪,列席影視娛樂博覽,撐恩師杜琪峯和自己有份主演的新片《毒戰》宣傳。 

破冰吹水林雪借了杜 Sir拍電影的上期共四十萬後,曾一度走佬冇開工,但近日二人破冰,杜 Sir亦繼續用佢。當日記招上,二人不時密密斟。 

黎明都 friend林雪圈中人緣不俗, 09年在金牌大風的周年聚餐上,他便與老友黎明攬頭攬頸唱歌。 

夜場打碟着草期間,林雪主力在大陸夜場打碟維生。去年中,他曾在珠海酒吧搵食,同場還有𡃁模 Mia陳靜儀。 

着草大陸打碟


偕妻睇騷未着草前,林雪是好好先生一名。 09年 3月,他便攜妻到紅館欣賞李宗盛的 Super Band演唱會。 

如非中六合彩,相信林雪短時間內無法償還巨債,為此他於去年中撇下老婆及一對仔女,匿藏大陸避債。據知着草期間,林雪更換電話號碼。為賺生活費,試過搵人搭路在廣東省一帶酒吧做駐場打碟 DJ,月賺 6至 8千人民幣。
雖然着草生活潦倒,但林雪勝在身邊有不少義氣朋友,其中一個更是「宇宙最強」甄子丹。本刊收到消息,年賺逾億的甄子丹身家豐厚,對朋友亦疏財仗義,他得悉林雪欠債着草後,擔心林雪妻兒遭債主騷擾,遂現兜兜拿出 200萬替對方還債。知情人士透露:「丹爺一知肥雪有事,諗都冇諗,就主動幫佢還錢,其實佢哋唔係特別深交㗎咋,真正合作都只係 11年頭拍《八星抱喜》。不過自此兩個 friend咗,丹爺借錢嗰刻,都冇提出咩條件,亦冇話要計利息,淨係叫肥雪有錢先至還。」
日前甄子丹出席馬會活動時,本刊記者問他借錢給林雪一事,他亦處處維護老友:「雪哥係一個好演員,有承擔、有演技,唔止我一個幫佢,好多朋友都有幫佢,其他嘢我就唔想講喇!」

攞上期冇拍戲

而一手提攜林雪出身的杜琪峯,據知亦不下數次替對方還錢填數。不過他擔心有人借錢後再去賭,便以拍戲為由借錢予林雪。「今次杜 Sir就醒啦,話預咗 4套戲俾佢拍,其中兩部係《盲探》同《毒戰》,每套酬勞有 20萬,其餘兩套未有劇本、大綱,但杜 Sir都預繳上期共 40萬俾肥雪應急!」知情人士說。
林雪曾一度拿了恩師的上期,卻沒出現《盲探》及《毒戰》片場,令杜 Sir一度㷫過火屎,後來林雪知衰才回歸劇組完成拍攝。而債務還了一半的林雪,每月繼續還錢,但近日已可回歸香港與妻兒聚天倫,也得「恩公」甄子丹安插拍攝大製作《 3D冰封俠》。
早前,林雪 gel行晒頭、西裝筆挺出席影視娛樂博覽。對於欠債傳聞,他故作輕鬆回應:「冇欠債喎……依家,可能我平時成日多嘢講,亂講嘢影響到人啩,所以先有呢啲傳聞!(咁早排你匿喺大陸唔係避債咩?)我去拍戲啫!返大陸拍戲好平常。(甄子丹同杜 Sir幫你還錢喎?)佢哋個個對我好好,成日搵我做嘢,塞錢俾我使。」而同場出現、林雪的另一恩公杜琪峯就不願多談,但未有否認傳聞,只說:「我諗……私人嘢唔好講啦!」


採訪、撰文:娛樂組
攝影:攝影組

tvb4life 發表在 痞客邦 留言(0) 人氣()