自結業消息一出，利苑粥麵連日來大排長龍，人龍一度排至總統戲院，奇景也。（關永浩攝）

中環人語

利苑地鋪業主：我哋有良心！

2013年01月31日 ~~ 第1195期 香港《壹周刊》

擁有四十二年歷史、位於銅鑼灣駱克道嘅利苑粥麵專家，上星期大排長龍。原來老闆郭先生話抵唔住業主由三十萬加租到六十萬，本週二就要光榮結業，連陳淑莊都專程返去食番餐；老闆話呢個鋪嘅業主算有良心，隔籬間莎莎都租緊九十五萬，故對佢哋加幅唔算多，但真係難以維生才要結業云云。

嗰位「良心業主」叫邱兆明，「隱居」西灣河嘅公務員樓，小宗搵過佢，邱太淡淡地表示：「我哋算有良心㗎！都想佢繼續做，以為開價六十萬元，租客會還價，點知轉頭就話唔租！」消息一出，幾十個經紀爭住打去搵邱太，嚇到佢瞓唔着。話說間鋪係邱生阿媽過身後留低，邱媽媽就真係叻，一九五五年用四萬五千蚊買入鋪位，就如扑中咗隻識生金蛋嘅雞，依家間鋪市值達四億！邱太已六、七十歲，兩公婆退休多年，雖然每月收咁多租，但唔想俾鄰居知，要繼續做其隱形富豪，打死都唔出鏡。加租一倍，已被封為「良心業主」，你話香港仲成咩世界！

瘦龍變肥記

自從「肥龍」許仕仁惹上官非，體重隨即直線向下，變成一條瘦龍。你睇去年七月第一次上庭，許仕仁瘦到兩頰凹陷，容顏憔悴，仲傳出佢想自殺！到去年十月，肥番少少，到上星期五第三次出庭，嘩！簡直紅光滿面兼夾容顏飽滿，肥番晒！究竟係回光返照定係雨過天青？木宰羊也！


2012年 7月
謝到兩頰凹陷、雙下巴都冇埋。（歐陽江攝）


2012年 10月
肥番少少，雙下巴又現身！
（關永浩攝）


2013年 1月
上週五，雙下巴伸延到頸部，連「面珠登」都有番啲肉地。（陳浩樂攝）

Give me a break
艇位平過車位

眼見啲富豪，一艇喺手，得閒出海吹吓風，夜來靠岸食吓海鮮，一樂也。唔好以為好有錢先可以有如此享受，原來遊艇最平一百幾十萬有交易。近年自立門戶的前新世界賣樓大臣李冠亮，兩年幾前就用約一百萬買咗隻四十八呎遊艇，閒時同老婆出海浪漫吓又得，招待朋友上船開派對睇煙花亦得，用嚟冧客傾生意仲夠晒面子添。佢話養艇同養車相似，都要租個泊位，要油錢，仲會俾人抄牌，不過，估唔到養艇分分鐘平過養車，一個艇位月租連水都只係四千蚊（咁咪仲平過大圍名城啲車位？），加多少少就可以駁埋長期電，就住埋喺艇都得。亦有艇主出租，一日閒閒哋收七八千蚊，喺網上更見到有人專登將舊式木製艇，改裝成度假屋，以近八百蚊一晚出租，一盤生意也。



有船牌的李冠亮（右）為安全計，多數搵船家揸船，每次八粒鐘才八嚿水，又真係平過養司機喎。（張國慶攝）


得四、五十呎長的遊艇，內籠大多有齊煮食設備，要長住無難度。（張國慶攝）

尖啤要「有來有往」

尖啤，機會主義者，最愛慰問人，深信「投桃」必然會「報李」。
○三年，梁錦松被指偷步買車，佢寫信慰問；○五年，超人李嘉誠捐十億俾港大醫學院，惹來冠名風波，佢登全版廣告力撐，話此舉合情合法合理。一○年，天主教神父羅國輝以「魔鬼論」批評超人，佢代之登報反擊。
終於，機會來了。兩年前，尖啤間東方明珠創業（ 632），獲阿松任主席的百仕通集團（香港）轄下基金，科水逾億元，讓尖啤有錢同中石化合作開油田，又收購美國天然氣，大展拳腳。
究竟是誰幫了誰？一言難盡。總之對於尖啤嚟講，「有來有往」不過係天經地義， CY你唔明呀？


舊年國家副主席習近平接見港澳政協委員時，先與尖啤握手，尖啤開心晒。但他事後被踢爆是刻意霸位，營造獲「祝福」假象。（無綫電視畫面）


超人惹火，但獲尖啤處處維護，豈能不感激？（關永浩攝）

本週奇景

中國貴州省第二大城市六盤水，地理位置優越，氣候宜人，有「涼都」之稱。當地人喺車水馬龍嘅馬路邊，一樣可以曬「日光浴」，不亦樂乎。就算對面石礦場突然「爆石」，發出巨響，都無阻相中人酣睡，甚歎！ 

金牙大狀講嘢
銀行無人駕駛

超過一百三十一億元黑錢出出入入集友銀行個戶口，上至金管局、聯合財富情報組，下至銀行都冇做嘢，何也！

短短八個月間，雙程證漢羅俊城利用喺集友銀行嘅戶口洗黑錢超過一百三十一億元，數字大到連個官都話好得人驚。
九一一後一個禮拜，金管局即發出指引，勒令啲銀行要擘大雙眼、認識其顧客，防止不法之徒以至恐怖分子利用銀行洗黑錢。在此之先，港府早於一九八九年成立聯合財富情報組，專責監察洗黑錢活動。理論上只要銀行對八千蚊以上嘅匯款有所懷疑都應該通報情報組。當局認為，非如此無以保持香港作為國際金融中心之清譽。
監管嚴格，此又不禁令人要問：八個月間咁多錢出出入入，集友銀行有冇懷疑過事不尋常？尤其是涉案男子當時二十歲都未出頭。若果有懷疑，咁佢哋可有通知情報組及金管局？如果有，何以呢兩個衙門都冇做嘢，而要等到調查詐騙案嘅警察撞破其事？
反之，若果集友完全冇疑心，咁又點解冇疑心呢？係咪佢哋見慣見熟類似活動，習以為常呢？抑或佢哋知道發生緊乜事，縱而容之？姑勿論如何，呢單案令人對金管局、情報組以至集友都唔係咁有信心噃。 

中環人語迷你版

我就由國金二期頂樓跳下，一死以謝天下。

估中邊個中環人講呢句說話，送你 PNY悅耳系列入耳式立體聲耳機一部有意參加者，請於二月四日 24:00前將答案電郵 mailto:centralman@nextmedia.com
小宗只接受電郵，郵寄免問。 

上週人語揭曉

就 2016和 17年的選舉，我們還有時間。

答案
梁振英
得獎者： Winnie Kwan
中獎時間： 1:00pm 23/1/13

本刊員工及直系親屬不得參加。
為求公平及杜絕偷步搶答起見，請於星期三下午一時後來電郵競猜答案；在此之前發出之電郵作廢。
超過一位讀者估中，先到先得，恕不接受上訴。
答案及中獎者姓名將於一三年二月七日本欄揭曉。 

廣告時間

你有某財團嘅黑幕想爆？你知邊間上市公司造假？你仲想舉報地產霸權嘅不公？歡迎你將財金界嘅寃屈或過癮八卦事，爆俾《壹仔》財經組知，一切報料，均會保密！
爆料熱線/whatsapp︰ 6829 5929 

(宗菁華)