郭志怡自言對 SEVVA餐廳及 Ms B’s CAKERY事事親力親為，「我唔識整餅，但蛋糕設計、點 styling都係我諗， I love what I do。」
名人是非
美心蛋糕否認抄款 SEVVA郭志怡：「使唔使抄到咁足？呢啲叫大蝦細！」
美心西餅為慶祝四十五周年，兩週前推出面層鋪滿棉花糖，內裡一層層彩虹色的「快樂彩虹蛋糕」，更找張智霖賣行廣告，加埋蛋糕有專用的餅盒同絲帶包裝，大賣之餘，仲被大讚設計特別有心思；查實約三年前 SEVVA餐廳老闆娘郭志怡（ Bonnae）已推出 Rainbow Connection，更成公司的 signature cake。眼見心血結晶被抄襲， Bonnae冇辦法唔出聲，「彩虹蛋糕個個有，但今次是 a bit too much，連入面顏色，個盒、 ribbon同 tag line都似晒。」
美心最愛搵明星做代言人，圖為伍偉國與美心月餅代言人陳慧琳合照。
張智霖捧住的老翻「快樂彩虹」在港鐵沿線大賣廣告。
抄款二合一
Bonnae好無奈，因為蛋糕設計沒法註冊專利，而美心的「快樂彩虹」蛋糕，十足似她旗下 SEVVA餐廳於 ○九年推出的 Carmen蛋糕，及一 ○年 Ms. B's CAKERY的 Rainbow Connection蛋糕混合體，美心「快樂彩虹」取了 Carmen蛋糕面鋪滿棉花糖的特色，內裡仿照 Rainbow Connection七彩海綿蛋糕。
Rainbow Connection蛋糕 500g賣$920，但美心的「快樂彩虹」只售$198，只是原裝的兩成價錢，但出名要求高的 Bonnae不怕貨比貨，「你食完就知唔同，我的忌廉是法國、澳洲同新西蘭出，人手打的，大陸嘢我唔會掂。成本係貴， What can I do？我的 marshmallow係美國貨，餅師多數是酒店出身的德、法國同瑞士廚師；我 fussy到連雞蛋有腥味都唔得，我要求有 quality，點會要客人食呢啲？」 SEVVA的蛋糕甚得名人明星歡迎，去年何超鳳女兒生日，就買了個 Carmen蛋糕賀生日，其他名人客還有黎姿、李嘉欣等。
心血被抄，原先想過息事寧人，但因連胞姐、 Joyce創辦人郭志清都看不過眼才決定「發聲」，「我的餅店所有蛋糕都是我的 idea，唔係邊個諗？要做 research，個 process好長，我設計出來後同整餅師傅傾，由點影相，點 styling都係我拍板，依家𠽌一聲被人整蠱……其實出面好多都抄款，美國 Martha Stewart的 Rainbow Cake都好普通，你不去抄她的那個好 sharp的綠色？今次（美心）連顏色都一樣， it is ridiculous。跟住個 packaging，個盒又有啲字，唉！我都唔識講。」
抄外面
SEVVA的 Carmen蛋糕（右）特別在於蛋糕面鋪滿棉花糖，美心的「快樂彩虹」造型亦十分相似。
抄裡面
左邊的美心蛋糕跟 Ms B’s CAKERY的 Rainbow Connection如孖生姊妹，但貴版每層味道也不同。
抄包裝
美心彩虹亦有專用的蛋糕盒及紙袋（左），絲帶亦與 Ms B’s一樣選用間條。
餅盒內的 tag line不約而同放在中間。
被敷衍
得悉產品被抄， Bonnae便寫電郵給美心集團主席伍偉國（ Michael）了解事件，點知被對方敷衍了事，「我好好哋 email Michael，講我啲客成日話你（美心）抄款，我同姐姐都好唔開心，我問佢唔知呢件事？對方卻以 external relations為理由，意思係自己請外面公關搞，即係拋個波俾人，公司四十五周年咁大件事，身為阿頭點會唔知？呢啲叫大蝦細，人哋有咁多錢做廣告，我係邊個？係咪要搵錢同人打官司？」記者本週一致電伍偉國，他堅決話：「無抄人！絕對無抄人！（有冇食過 Bonnae的蛋糕？）我唔得閒，我會覆你……會搵人覆你。」
產品多次被抄， Bonnae笑言轉角度想其實是好事，「呢件事令我創作力更強，係我自己諗設計又 bring it out for Hong Kong，香港有邊個可以？」
十五年前郭志怡將 Crunk Cake（左）引入 Joyce Cafe，現在 SEVVA仍有售，「是我向菲律賓朋友攞食譜， Joyce made it famous。」○八年美心亦推出「天使蛋糕」（右），一○年產品獲頒最具創意獎。
本週一美心透過公關發聲明，指 Rainbow Cake流行於歐美，沒有所謂原創；而美心的「快樂彩虹蛋糕」是其聘請顧問餅師自行研發，餅盒就由日本形象包裝公司構思。
留言列表
