Pizza L’altra$188/小

尋澄味

香脆薄 pizza L'altra

2012年12月28日 ~~ 第909期飲食男女

好友新屋入伙，地點在我每次都會迷路的錦繡花園。
這個以 House warming X X'mas party的大食會，在 Facebook, whatsapp和微信的互相邀請和通知之下「吹行雞」，出席人數遠超原定的八個人。在沒有僭建的洋房， 1,050呎屋仔加幾百呎花園的地方每一吋「窿窿罅罅」都塞滿人，墟冚程度直逼 Big Bang演唱會，估唔到計埋幾個未夠一歲的手抱 BB，人數總共有 40人。

原先安排的盆菜 X雞煲 X BBQ，人多勢眾之下當然唔夠食，在臨急抱佛腳的情況下，打電話嗌 pizza是最快捷和最穩陣的選擇。不過為食又識食的這班豬朋狗友，一致謝絕最準時不過食到厭的 pizza hut，激動之聲引發全場共鳴。
姍姍來遲的朋友住在附近的加州花園，他的出現為大家提供了最有用的資訊，原來在最近錦繡的加州花園商場，新開了一間外賣 pizza專門店。肚餓的人最勤力，即時逼爆一架七人車去買外賣。
開業未夠一個月的 L'altra，由來自佛羅倫斯的 Massimo主理，廚師上衣配窄牛加阿郎 boot造型，外型十足法國殺手 Leon尚連奴。
天氣寒冷和聖誕佳節是放肆喪食的好藉口， Menu除咗 pizza，當然唔少得各式各樣的 pasta。最經典口味的肉醬意粉，顏色和味道都是 cook book的示範作。超 creamy的 carbonara，意粉彈牙、白汁綿滑、煙肉惹味。茄醬長通粉，驚喜在於煙肉碎，通通都匿藏在長通粉內，非常蠱惑。

四式芝士薄餅$188/小

瞇埋眼都識整家鄉薄餅的 Massimo，堅持一切用料都要意大利的頂級出品。
香脆的餅底採用 00號麵粉加暖水自己去搓麵糰，經過一晚發酵之後，再逐個巧手搓成圓形。 Pizza底的「茄汁」，依傳統由大量番茄、西芹、洋葱、紅蘿蔔和金不換調製而成。經過 260度火力焗足七分半鐘的四式芝士薄餅，是最經典的意國風情，鹹香氣味何止鼻塞的街坊聞到，連南生圍的雀仔都聞得到。京葱香腸薄餅是新嘗試，大量切碎京葱鋪滿 pizza，新鮮感覺不止於口味創新，是來港十年的 Massimo，就地取材的「港式」創意口味，估唔到效果出奇地好。
熱血入廚房學整甜品的本地 OL界，學整 tiramisu是必經之路， Massimo落足忌廉和鮮奶，好味的原因還有用了又鬆又脆的 Pavesini餅乾代替了 lady fingers，外賣返屋企扮自家炮製，是最佳的「請槍」之作。

肉醬意粉$53

Tiramisu$30

Carbonara$58

pizza L'altra
地址：元朗加州花園商場地下
電話： 2461 8868

少年食神林澄光（ Michael）
致力用金錢換無限快樂。 TVB、 Now TV飲食及旅遊節目主持人