35歲嘅里安提名過影帝無數次，不過真正贏出少之又少。今次《黑殺令》降呢做男配角，唔知勝算會唔會高啲？
來路貨
里安納度 最佳男配角
里安納度又返嚟嘞！
前作《 J.艾德格》 2012年初上映，久違 11個月，終於有新作品《黑殺令》。
有別以往正派形象，今次里安飾演殘忍二世祖，仲紆尊降貴做埋配角。
配角唔易做㗎，尤其里安十幾年來不嬲做開主角，單係降呢呢份誠意，已經要俾滿分啦。
鬼才導演昆頓塔倫天奴深得影評歡心，《黑殺令》被大讚好睇之餘，更獲金球獎提名「最佳劇情組電影」、「最佳導演」、「最佳劇本」，分分鐘有機會殺埋入奧斯卡。
印象中，里安（ Leonardo DiCaprio）自 1996年《一切從心開始》以後，從未做過配角。能夠令堂堂「男一」心甘情願自動 downgrade做配角，梗係有原因。
原來《黑殺令》由鬼才昆頓塔倫天奴（ Quentin Tarantino）執導。眾所周知，鬼才作品向來又 cult又叫好叫座，人人爭住合作，里安自然都唔例外。
成功𢱑撈
《黑殺令》（香港 1月 17日上映）以美國內戰為背景，黑奴主角慘被囚禁，老婆同時失蹤咗。咁啱賞金獵人搵助手，於是幫黑奴贖身。沿途兩人互相照應，一邊尋妻，一邊追捕通緝犯，一直殺到去變態二世祖地頭。
變態二世祖一角，就係由里安飾演。據知大導原定搵個年紀較大嘅演員去做，不過里安睇完劇本，十萬個 like，死扯住導演傾劇本。搞搞吓，咁就埋咗堆嘞。
至抵死，做完又要「呻」喎。早前一個記者會上，里安坦言好憎角色：「我人生之中，從未遇過一個咁自戀、種族歧視同時又咁難頂嘅電影人物。不過作為一個演員，我都要演㗎。」嘩，好高招啫，表面講到角色幾咁難做，實則暗讚自己好演技，連咁乞人憎嘅角色都 handle到。裏裏外外好戲成咁，難怪金球獎都俾個男配角提名你啦！
占美跟老婆本來雙宿雙棲，但男嘅被捉去做奴隸，女嘅輾轉賣咗俾里安。占美為救老婆，不惜同里安死過。
森姆積遜（右）飾演二世祖親信，助紂為虐，欺負自己同胞。今次係森姆跟導演昆頓第 5次合作，可以話係大導御用愛將。
二世祖極盡變態之能事，當黑奴唔係人攞去餵狗。電影剛剛於美國上映，觀眾普遍好評，並認為當中嘅虐待情節反映史實。
導演昆頓塔倫天奴嘅暴力美學，當然唔少得。
電影雖然講黑奴，但加入西部牛仔片元素。當中一場大混戰動用超過 35匹馬，部分演員更要親身上陣。
里安嘅二世祖角色鍾意虐待黑奴，並要講好多侮辱黑人嘅說話。里安自言演得好辛苦，同劇黑人演員亦唔好受，不過角色需要，大家惟有頂硬上。
留言列表
