close
臨近聖誕，四太嘅打扮都好有節日氣氛，出動紅色絲襪嘅佢，零舍 sharp醒。
媽咪姐
過節任你 look！
每到大時大節，社交圈嘅活動浪接浪。喺聖誕前夕，成班名人已經上足彈，密密出動，個 look仲……呵呵呵呵。
梁安琪紅絲誘惑
四太出晒名忙，見佢攰到眼都睜唔大，嘴角仲爆埋瘡，真係要唞唞先得喇！
上周五（ 21日）冬至當日，何鴻燊四房太太梁安琪去咗上環澳門賽馬會會所食飯，襯起紅色絲襪嘅佢，好鬼搶眼。不過當晚佢冇乜化妝，一見記者明顯唔老黎，但提到何生嗰陣，心情又靚晒咁話︰「何生去咗做運動，仔女就去補習。」真係一家都咁忙，做節都唔得閒呀！
霍震霆發光短打
平日西裝骨骨嘅霍震霆，當晚以短褲襯白襪仔，咦，原來佢雙腳都幾反光喎！
除咗四太，媽咪姐喺馬會仲撞見霍老爺。單拖出動嘅佢，一見閃光燈，即時呆咗，講咗句︰「做咩呀！」之後就急急腳走人。唔知係咪平日習慣西裝示人，怕呢個絕密短褲仔 look曝光呢！
薛芷倫出胸彈
上周四（ 20日），薛芷倫以超低胸透視短裙出席 Club Gala's開幕，谷到行一行，心口兩團肉直情想彈出嚟！同場仲有前夫馬清偉同仔女，難怪佢成晚風騷到極。「啱啱同個大仔喺附近慶祝 21歲生日，馬生知道我嚟捧朋友場，咪順道同啲仔女嚟飲杯嘢，高興吓！當係親子同樂日！」 Well，呢個家庭活動又幾 wild喎！ 
夜蒲家庭樂
薛芷倫大仔 Justin好細心，見阿媽做完訪問，即刻出嚟接佢入場，抵讚！
馬清偉孖住女友 Winnie到場，兩個黐到實，笑容好一致， sweet到漏！
全站熱搜
留言列表
