拍《衝上雲霄II》外景畀面 陳法拉 躁狂 吳鎮宇 收火有偈傾
【中環蘭桂坊】吳鎮宇最近被傳拍攝無綫新劇《衝上雲霄II》時經常躁狂鬧人，但前晚佢同陳法拉為新劇拍外景時，全程表現得相當親切，同法拉以及工作人員有傾有講，唔通因為同法拉相熟，所以畀面法拉？
約定11月打野戰
鎮宇09年同法拉喺電影《Laughing Gor之變節》中飾演兄妹，今次佢哋喺無綫《衝上雲霄II》再度合作，自然駕輕就熟。鎮宇前日同法拉喺中環蘭桂坊拍《衝》劇外景，鎮宇下晝五點已經去到現場，因為未夠鐘開工，鎮宇就同助手先去翠華茶餐廳醫肚，食到夜晚七點就同法拉埋位開工。
【今日我至馴】
鎮宇前晚喺靚女法拉面前，即刻馴如綿羊，平時火氣當堂熄晒。
有講有笑
吳鎮宇（右）
認真對戲
茶記開餐
助手（左）、吳鎮宇（右）
前晚劇情講述情歸鎮宇嘅法拉同鎮宇喺街邊吹水，法拉講幾講想走人，鎮宇就拉住法拉叫佢唔好走。呢個鏡頭前後拍咗幾次，唔使20分鐘就搞掂收工。拍攝期間鎮宇唔單止同法拉，仲有工作人員有傾有講，而且有唔少途人搵鎮宇合照，鎮宇都完全冇托手踭。
另外，法拉噚日喺銅鑼灣為一時裝品牌新店開幕擔任剪綵嘉賓，問佢幾時同張智霖為《衝上雲霄II》去法國拍打野戰場面，法拉話：「11月，我見到劇本都有少少嚇親，要少少心理準備。」法拉話唔使同男友申請，始終電視尺度有限。
採訪、攝影：楊浩賢、黃曉程
全站熱搜
留言列表
