孫泳恩說自己是很喜歡「闖」的人，什麼都想試，「覺得可以做到好多嘢。」
女士春秋 亞洲小姐出產三級片「乳牛」，那麼香港小姐應該算是出產豪門新抱吧。且看朱玲玲、李嘉欣、李美鳳，個個嫁入豪門做少奶。但，總有例外，第一屆冠軍孫泳恩，她經歷過兩段失敗婚姻，現與第三任丈夫賓康居於美國，她夫家不算是豪門闊少，但亦能令她衣食無憂，過的是少奶奶生活，但不知是否得閒得滯，孫泳恩竟然想「出番嚟做」，原因是：「一個人對住間萬幾呎嘅大屋，好悶呀。」嘩！晒死人咩！

賣磚頭
五十七歲的孫泳恩移居美國十多年，與第一任丈夫、前無綫編劇陳家蓀所生的兒子已大學畢業，現正在倫敦工作，與現任練馬師丈夫賓康所生的女兒亦已十四歲，開始有自己的社交圈子。孫泳恩每日要做的除了買餸煮飯，其餘時間就是「hea」，「我冇嘢做㗎，如果太耐冇嘢做會同個社會脫節。你知啦，喺外國都冇乜機會打開個口，打開個口就淨係刷牙同食飯，哈哈，喺美國，人與人之間嘅關係好疏離，整整吓開始發覺自己有少少抑鬱，因為冇人同你傾偈，間屋萬幾呎連花園，好多問題都要靠自己去處理嘅時候，就會咁樣。」發現自己有抑鬱，但她沒有立即求醫，「因為美國一睇醫生就弊啦，保險一定要交好多錢，佢哋會即刻認定你有呢個記錄。」幸好病情未算嚴重的她懂自救——就是搵嘢做。她首選地產，「我喺一九七七年起搞過四屆地產展覽，當時好多地產商參加，好成功。」直至去年，她主動聯絡中原地產創辦人施永青，「我覺得而家有個潮流，啲人好鍾意過嚟（美國）買樓，係大勢所趨，不如自己考番個地產牌，舊年八月我做完手術後喺屋企休養期間，考咗地產牌。」

做阿四
名人、明星去到邊都有着數，香港小姐出去打工，加上與施永青關係友好，人工方面應該待她不薄吧，「無底薪，只抽佣。」但她倒沒有所謂，因為她覺得有底薪便有義務，她笑笑口說：「冇底薪咁咪好囉，唔需要返公司坐，有客就email我。」未考牌前，孫泳恩只負責招呼中原帶過去的客人，她要另外找地產經紀帶客睇屋，那段時間，她的職責跟「阿四」無異，「我去機場接啲客，客人問：『你係做機場接送？俾張咭片嚟啦，我第日多啲call你。』我話：『哦，多謝你。』，我冇得講，因為我唔係經紀，又試過有啲客一落機就話要去睇荷李活星光大道，『你揸架車去嗰度等我啦！』，當我導遊或者司機，你知啦，有啲人，財大氣粗囉。」當然也有被認出的時候，「佢哋一知道咗之後，就對我好好、即刻都唔同晒。」背負港姐銜頭，很多時都會為她帶來工作上的方便，但同時亦經常被人誤會她這位阿太賺錢買花戴，所以她先從衣著入手，拒絕像以往經常名牌上身，「你諗吓你個客著名牌，你自己又係咁人哋會諗：『有冇搞錯？係咪賺錢買花戴？』感覺唔專業，所以我著衫都好唔起眼，總之要感覺好專業。」

現實
孫泳恩於八六年在香港開過公關公司，那時候的她經常遊走ball場，「打扮到自己好似隻彩雀咁啦。」她形容當時的生活很風花雪月，「我做咗港姐、跟住結婚，樣樣都有人服侍，屋企有三、四個工人，司機有兩個，活喺一個唔係好真實嘅環境，我嘅生活就係晚晚去應酬、去party、飯局、馬場、ball，跟住就做吓啲公關嘢，買幾萬蚊一個手袋，去做衫、飲茶、跑馬、遊埠。」

 
歡樂的時光過得特別快，九九年，丈夫賓康因旗下馬匹被發現有違禁藥物，被香港賽馬會吊銷練馬師牌照，事業陷入低潮，生活亦起了大變化，昔日一起進出ball場、馬場的好姊妹突然全部人間蒸發，「當時好慘，啲人即刻同你劃清界線，好多嘴臉俾你睇，尤其是我住喺沙田練馬師宿舍，嘩！啲人見到你好似見鬼咁即刻走，我直情由雲端跌咗落地獄，覺得呢個世界嘅人都好冷漠無情。」她尤其記得簡炳墀，「佢係第一個最寸，喺架見到我，『點呀？吓！』咁囉，平日好多嘢傾，嗰陣時就冇晒嘢講，好似唔係好想同你打招呼，一陣間又喺報紙踩你扺死啦！」 ○○年，孫泳恩與賓康舉家移民美國發展至今，孫泳恩說：「人生好漫長，冇可能一世人都順風順水，當你有挫折時，其實係個天磨練緊你去應付一啲大事，所以我覺得係一種鍛鍊。」記者告訴她簡炳墀官司纏身，被控告賄選，經常上網關心香港新聞的她首先一笑，然後說：「又唔可以講係報應，有啲人對你唔係幾好，唔緊要，呢個係一個際遇令到佢要走開，不歡而散，一啲唔好嘅嘢就會離你而去，一啲好嘢只會凝聚喺你身上。」 ####

 


她是第一屆香港小姐冠軍。


二○一○年，兒子周耀洋於加州大學畢業，孫泳恩與母親（左起）、父親、丈夫賓康、女兒賓盈盈與她的弟弟一同出席畢業典禮。


美國的萬呎大屋住了九年，五歲大的積羅素犬Allie是她的寶貝。


二月尾，她以同事身份與施永青齊齊出席中原地產的周年晚宴。


八七年孫泳恩與從事地產的周家雄結婚，這是她第二段婚姻。


移居美國多年，但她仍每朝上網睇港聞，最近她就因看了吉林狗肉麵一事忿忿不平，「我要做番啲嘢去救狗。」


與現任丈夫賓康於九四年結婚。


與賓康所生的女兒賓盈盈於九七年出世，賓康帶同孫泳恩與前夫周家雄所生的兒子周耀洋探望。


○○年，含着淚的孫泳恩與丈夫賓康（左）及女兒賓盈盈（中）離開香港到美國發展。

arrow
arrow
    全站熱搜

    stacylife 發表在 痞客邦 留言(0) 人氣()

    E-mail轉寄