close


周二，王馨平接受記者訪問，坦言拍《春嬌》 純屬貪玩，冇諗過自己因此而鹹魚翻生。

《春嬌與志明》，彈出了王馨平（Linda）。客串唔夠一分鐘，卻成為焦點，陳年歌〈別問我是誰〉更遭網友洗版式瘋傳。戲中楊千嬅一句：「你同鄭嘉穎分手，我喊咗幾日幾夜呀！」，將昔日王馨平與鄭嘉穎的一段情擺上大銀幕，王馨平表示不介意，更大方地說：「同鄭嘉穎依家係好朋友，大家有聯絡，當年同佢一齊，絕對係美好嘅回憶！」過去的都已過去，王馨平不願再提，不過講起老公Stephen，她難掩幸福少奶奶的模樣說：「我同老公好夾，佢好錫我……」言談間嘴角甜笑，幸福滿瀉。王馨平有今日，直認當年棒打鴛鴦的爸爸王羽功不可沒。


彭浩翔作品《春嬌與志明》票房直逼3,000萬，叫好叫座。有份客串的王馨平更因此人氣急升，加上多得余文樂反串兼惡搞她經典歌〈別問我是誰〉MV，令該曲翻生熱爆K場。半退隱的王馨平忽然熱起來，不過亦因此令她與鄭嘉穎的6年情史遭翻舊帳。

爆笑MV
《春嬌》除了令王馨平翻生，其舊歌〈別問我是誰〉亦因余文樂反串而重生，由於效果爆笑，遭網友洗版式瘋傳。

與舊愛傳情
本周二（10日），王馨平接受本刊訪問，談到94年與鄭嘉穎的一段情，起初怕人說她借舊男友博宣傳，不肯多講。經記者多番追問下，王馨平終於說：「其實喺成長嘅過程嚟講，當年同佢（鄭嘉穎）一齊，絕對係美好嘅回憶。我同佢係好朋友，大家一直有聯絡，我老公都知。佢演嘅《怒火街頭》我同老公一齊睇，佢攞視帝我都戥佢開心。」

對白激嬲王羽
楊千嬅在《春嬌》中一句「你同鄭嘉穎分手，我喊咗幾日幾夜呀！」嘅對白，本是導演彭浩翔心底話，結果卻激嬲王馨平老竇王羽，搞到彭導演要親自打俾王馨平謝罪。

王羽斥嘉穎冇出息
再見亦是朋友當然好，不過與鄭嘉穎6年情，兩人分手原因一直冇乜人知。直至近日王馨平爸爸王羽接受訪問時，不諱言自己當年反對女兒跟鄭嘉穎拍拖，是覺得他沒出息，而且認為藝人結婚有好收場的不多，所以棒打鴛鴦。王馨平直言：「我當年好反叛，唔係每次都聽爸爸講，但知道爸爸所做嘅一切都係想保護我，緊張我。」提到爸爸屬於口直心直的人，她似乎怕爸爸再失言，「爸爸星期日（15日）會嚟參加金像獎頒獎禮，好高興阿爸同舅父（曾江）都有份角逐最佳男配角，我會同佢一齊嚟，唔俾佢再亂講嘢。」

六年姊弟情玩完
現年43歲的王馨平，94年與細她一年的鄭嘉穎拍拖，當時女方歌唱事業已屬阿姐級，反觀男友仍屬新人。二人地下情維持六年無疾而終，陳年戀情近日因《春嬌》再浮面，王馨平老竇王羽更自爆當時是自己嫌嘉穎冇出息才棒打鴛鴦。

微博拆彈
王羽言論一出，王馨平即遭鄭嘉穎粉絲在網上圍剿，王馨平惟有親自在微博拆彈，代老竇向鄭嘉穎道歉。而鄭亦叫粉絲冷靜，指自己在媽咪心目中並非無出息的人。

相睇識老公
舊情不再提。王馨平01年下嫁從事金融業的Stephen Lee，結婚十年依然恩愛。「你哋一定估唔到，我同老公係相睇識嘅，係咪好老套呀？嗰陣我係單身（剛剛與鄭嘉穎分手），嫲嫲同姑姐成日話要介紹個男仔俾我識。當時我覺得太刻意又老套，已經推咗好多次。不過姑姐同嫲嫲依然極力游說，最後我都有出去。其實我老公係陳美齡媽咪啲世姪，嗰次相睇， 佢同Stephen嘅爹哋媽咪都有出席。」緣份話來就來，王馨平與Stephen一拍即合，翌年更拉埋天窗，「老公對家人、朋友都好細心，我冇揀錯。我唔使大富大貴，最緊要開心。我同佢鍾意打golf同打網球，每年旅行都會加插打golf呢個環節，又鍾意食嘢，去親東京旅行主要都係食。」

婚後恨有BB
王馨平和從事金融的老公Stephen Lee結婚11年，多年來表現恩愛，王更坦言回想與老公生BB而試過三次人工受孕，可惜最後唔成功，王說現時只有隨緣。

惹火老竇
王馨平老竇王羽是武打明星出身，雖然已屆69歲之齡，不過依然好火。除早年與女兒經理人甄妮有拗撬，近日更直認當年插手女兒與鄭嘉穎的感情，並斷言：「我一睇鄭嘉穎就知佢冇出息！」對於女兒事業和愛情，同樣緊張。

人工受孕失敗
二人世界雖浪漫，但不夠熱鬧。對於生BB，Linda有另一種諗法，「我覺得生BB好講緣份，我自己試過人工受孕三次都唔得。其實唔一定中，醫生話一般人工受孕機會得兩三成，雖然我失敗三次，不過心態依舊隨緣，老爺奶奶都冇俾壓力我。」 BB緣份雖未到，不過事業似乎再度起飛。Linda食住《春嬌》個勢，現正積極籌備年底個唱。眼見當年寶麗金四小花之一的黎瑞恩都成功開個唱，Linda都心郁郁。「出道到依家出過15隻唱片，都夠歌開個唱，現階段仲係好初步傾緊，希望年底可以喺紅館見大家。」

演藝世家
現年43歲的王馨平，可謂娛樂圈世家出身。父親是武打明星王羽，母親是已故女星林翠，舅父是資深演員曾江，絕對是典型的演藝世家。

94年寶麗金四小花之一
Linda 93年加盟寶麗金，當時與劉小慧、黎瑞恩、湯寶如有「寶麗金四小花」之稱。同年更奪得TVB十大勁歌金曲女新人獎銀獎。

96年與甄妮反面
事業如日方中，卻在此時爆出王羽與王馨平經理人甄妮反面，導致王馨平和甄妮師徒反目，最後二人解除經理人合約。

98年亮相亞視
約滿寶麗金後，王馨平幾乎絕跡香港樂壇，只試過在亞視亮相拍劇集《我來自廣州》。至00年，她轉往影壇發展，同年與拍拖六年的鄭嘉穎分手，分手一年結識現任老公Stephen Lee，婚後淡出娛樂圈。 ####


王馨平與老公Stephen Lee結婚，全靠陳美齡母親（左）做媒人，王馨平在訪問中，亦坦言十分感激陳媽媽為她牽紅線。


對於復出，王馨平望着面前自己十五張專輯說：「我仲想喺紅館開騷！」


王馨平忽然彈出，唔少網民都讚她狀態不錯，更認為她復出唱歌應該有市場。



arrow
arrow
    全站熱搜

    stacylife 發表在 痞客邦 留言(0) 人氣()

    E-mail轉寄