獲無綫力捧的馬賽,有指因拍攝《名媛望族》,與飾演她老公的《超級巨聲》大孖周志文假戲真做,但原來大孖半年前已和模CoCo(袁聖殷)拍拖。
三角戀愈搞愈大,上周馬賽和大孖到上海趕戲,CoCo索性飛埋去箝實男友。形象告急,大孖一時唔認和CoCo拍拖,一時又話與她已經分手。而曾經講過得悉大孖有女友的馬賽,又突然話唔識CoCo,兩位當事人一時一樣,無句真。
周二(10日)CoCo接受本刊訪問,提到大孖單方面宣布分手,她雙眼通紅說:「好多嘢唔講得,不過佢對我好好。」保住大孖;但對情敵馬賽卻鬧爆:「搶人男友冇品。」一場東宮西宮爭奪戰正式爆發。


據知馬賽為奪取大孖歡心,家住將軍澳清水灣半島的她,即使平日開工唔順路,也特登揸車到大孖位於藍田的寓所,接埋大孖返將軍澳電視城,更經常send挑逗性SMS俾大孖,直言恨拍拖,擺明女追男。

SMS姣撩
提到馬賽硬撬男友,CoCo說:「馬賽始終係大孖嘅前輩, 我好明白佢哋有時會為套劇去講吓演戲上嘅問題,但馬賽喺工作以外真係做咗好多嘢。馬賽成日同大孖分享佢嘅私生活,亦借頭借路問大孖我哋拍拖嗰陣點樣相處。我有睇過啲message,都同大孖討論過呢個問題。但我唔明白呢行點解會有呢啲咁嘅女仔。我唔想再俾壓力大孖,所以冇逼佢做啲咩決定。」在剛過去的周日(8 日),CoCo飛到上海密會大孖,二人行商場時亦曾和馬賽撞到正。不過,馬賽事後卻否認,馬說:「我都冇見過(CoCo), 我唔知佢咩樣,亦唔識佢。」但CoCo就直指馬賽講大話,她愈講愈激動,雙眼通紅說:「佢啲戲真係好好,我唔想評論佢,不過搶人男友真係冇品!我為咗呢件事真係晚晚瞓唔着。」

無綫逼令分手
上海出生、澳洲讀書,去年中才來港定居的CoCo,坦言一早當大孖是屋企人,她說:「香港我冇人冇物,同佢拍咗拖半年。佢對我好好,知我慣咗揸車唔慣行路,試過孭住我行街,好感動。」據知無綫為了力保大孖的乖仔形象,下令他要速撇CoCo,難怪他連日來前言不對後語,短短幾日間被拍得和CoCo拖手,繼而唔認拍拖,最後自爆分手,充滿戲劇性。知情人士說:「無綫反對大孖同CoCo拍拖好耐㗎喇,話就算俾人影到都唔可以認,始終CoCo係一個模,形象唔入屋。」對於被無綫棒打鴛鴦,CoCo說:「有好多嘢真係唔講得,我唔想影響佢。依家風頭火勢,我哋冇再聯絡。但我真係唔想啲觀眾以為我借呢件事去炒作,其實我先係受害者。」

馬賽:研究劇本咋
正印被迫退位,小三馬賽當然風騷。記者連日在上海觀察,馬賽並未受此事影響,等埋位時,她繼續主動向大孖搭訕。其實馬賽向來進取,據知她參選港姐前,原本只是無綫收費台的撰稿員,「佢好恨做幕前, 但啲廣東話唔正,有一次佢喺度撞到樂易玲,咪自薦話想選港姐囉!」知情者說。對於被CoCo踢爆狂send sms撩大孖,馬賽說:「我哋研究劇本咋!一個專業演員係咁㗎喎!佢(CoCo)係唔係唔了解呢樣嘢呀?我同周志文要一齊合作,冇話避唔避忌㗎!總之我唔做人哋第三者,唔想再喺呢件事上糾纏!」而大孖則決定封口,只在微博呼籲:「不要對任何一位造成傷害。」其實,這場「傷了三個心」的遊戲,全是他自己一手造成。

姣爆微博
馬賽和大孖因拍《名媛望族》而日久生情,馬賽在微博亦不時上載和周志文的合照,非常主動。

走廊拖手
雖然收工,但馬賽竟然和大孖在電視城走廊拖手仔,連同劇的韓馬利都睇唔過眼,暗寸了一句。

打情罵俏
馬賽擺出惡樣和大孖影相,之後就在微博補鑊,自稱唔夠瞓所以躁底,擺明打情罵俏。

大讚靚仔
馬賽將大孖等埋位時的chok樣擺上自己微博,公然讚對方似梁朝偉。

大起底一年五劇
今年25歲的馬賽,08年成為港姐三料季軍後,立即被無綫力捧,去年更一口氣有五部劇推出,讓她輕易攞到「飛躍進步女藝員」一獎,大把前途。

拍劇發圍
22歲的周志文(大孖)與孖生細佬周志康09年參加《超級巨聲》而簽約無綫。大孖歌唱事業雖冇乜起色,但無綫亦安排不少拍劇機會,如《潛行狙擊》等。

娜姐師妹
23歲的袁聖殷(CoCo)去年闖入模界,亦客串過《猛鬼愛情故事》等青春片。今年她簽約成為周秀娜師妹,唔剝純走清純路線。 ####


入行只有一年的CoCo和另一模韋彤組成「LemonBeez」闖樂壇,她坦言此事令她上了一課。身旁的韋彤亦勸勉姊妹說:「以後真係要帶眼識人!」


同車返閨
馬賽上月底被拍得揸寶馬車大孖返自己寓所,之後未見大孖離開,斷正冇得抵賴。《FACE》圖片


雖然馬賽被指做小三,但她依然忍唔住,在上海拍劇時經常眼甘甘住大孖。


上海箝實周日(8日),記者拍得CoCo主動繑實大孖到上海行街,當時亦和馬賽狹路相逢,CoCo說:「我屋企人住喺上海,探親順便嚟探班,我咁做都好正常。」


周二(10日)晚上十一點,CoCo出席活動後,搭的士到大孖位於藍田的公屋近一個鐘,離開時更眼濕濕,經常抹眼淚。


夜撲大孖屋企之後CoCo再搭另一的士返貝沙灣寓所,據知她家境富裕,現時所租的單位亦由屋企人負責交租。


微博發晦氣周二(10日)下午,CoCo突然在微博發晦氣,除指自己和大孖拍拖外,更自嘲是一個講大話的人,「講反話」之餘更另有所指,認真高招。


繼續談情周一(9日),大孖和馬賽在上海拍劇時照舊有傾有講,心情似沒受影響。


周三(11日),馬賽由酒店出發到片場拍劇。對於有關她、大孖和CoCo的三角戀,她說:「我同周志文只係同事、朋友、拍檔咁簡單。」


就地解決


周一(9日),劇組晨早出發拍外景,大孖就趁停車期間,落車去草叢旁邊就地解決。據知照片出街後,大孖心情極度低落,周二(10日)他埋位前亦搵韓馬利傾訴(圓圖)。


《FACE》圖片


《壹週刊》圖片

arrow
arrow
    全站熱搜

    stacylife 發表在 痞客邦 留言(0) 人氣()