曾是中學籃球隊長的魏焌皓,至今仍經常到屋企附近籃球場練波。

口碑收視俱佳的《On Call 36小時》帶挈馬國明上位,做他細佬「一康」的22歲魏焌皓(Nathan)都有運行。因為角色討好,師奶、妹妹仔全部like,王維基見獵心喜,以青春劇男主角利誘加盟;無綫高層樂易玲立即做嘢,承諾力捧兼加薪一倍(萬一蚊)。心大心細的Nathan因為有家庭負擔,決定打穩陣章,落筆賣身無綫七年。

阿媽做知客
娛樂圈有唔少屋企有米的二代,幾千蚊人工一個月面不改容,毫無知覺。在無綫做開大茄的魏焌皓屋企即使未至於窮到攞綜援,但與母親、家姐同住牛頭角公屋的他,十歲未夠父親已撇下家人不知去向,一家三口靠母親微薄薪金頂住。「佢媽咪Jenny靠做酒樓知客賺錢養大兩姊弟,家姐早幾年開始出嚟做嘢,屋企環境算係改善咗,但佢媽咪怕影響個仔,早排辭咗工冇做嘢!」Nathan街坊說。《On Call》叫好,劇集出街不久,王維基方面已接觸Nathan,開出以青春劇男主角條件利誘加盟;與此同時,無綫兩大高層曾勵珍、樂易玲亦分別約見尚有一個月約滿的他傾續約。曾勵珍當面答允會安排機會上位,樂易玲亦承諾捧他做羅仲謙第二,人工加倍。「Nathan同兩個大姐見面,難免受寵若驚,佢話嗰刻幾乎唔敢相信係真嘅。」

拍廣告搭夠
藝訓班出身,Nathan月薪只有五、六千,但要孭起養家責任,為求早日讓母親有餐安樂茶飯,他經常主動參與試鏡,爭取演出機會,有時兼職拍廣告,幫補收入。「佢擔心轉簽經理人約後所有工作要經無綫,唔可以好似以前咁,自由接拍廣告,話就話加薪一倍,但都係萬一蚊咁上下,隨時搵少過以前。」思前想後,Nathan最後求教《On Call》監製潘嘉德、關永忠,大家均勸他一動不如一靜;幾經考慮,上週一(四月二日)正式落筆續約七年,成為無綫親生仔。

八嚿腹肌
早個禮拜,記者在Nathan牛頭角屋企附近,見到他拖住媽咪去藥房買完嘢,再去茶餐廳吃早餐。之後Nathan一個人行去樂華邨球場打籃球;打到滿頭大汗換衫時,露出八嚿腹肌鋼條身材及逼爆巨胸,跟羅仲謙絕對有得比。

一康死搞喊天后
《On Call 36小時》平均收視31點,大結局收視更達到39點。全劇最大特色是起用大量新人扮演實習醫生;當中扮演「一件頭」馬國明的殘廢細佬一康,在劇集末段,因為救人意外身亡,成為全劇催淚焦點,連天后楊千嬅也公開說一康的死令她喪喊。 ####


據知,剛出道的魏焌皓是排骨仔一名,為練就一身肌肉,共花了大半年時間。


籃球技術不俗的Nathan,最近被藝進同學會的籃球隊招攬入隊。


魏焌皓與母親、家姐居於牛頭角公屋。


上週五,Nathan和媽媽離開所住公屋單位,魏媽媽打扮入時,完全不似已經年過五十。


兩母子撐枱腳食早餐,Nathan一臉愁容,似仍為前途煩惱。


在《On Call》演一康女友的張慧雯,早前兩人也鬧過一陣子緋聞。


Nathan人氣飆升,在《結•分@謊程式》立即加戲,早前才與劇組拍攝林夏薇、袁偉豪結婚戲。


在《On Call》與母親黃淑儀感情深厚,現實中他和魏媽媽自小相依為命,母子感情也一樣濃厚。

stacylife 發表在 痞客邦 留言(0) 人氣()