唔好嘥料！蕭定一將周秀娜改造成性感打女，令演出更有睇頭。

09年憑住推出寫真集、人形攬枕突圍的宅男女神周秀娜，近年在寫真界封盤，唔同模格鬥，轉攻電影升呢。試過一口氣接五部戲的她，稍後會接拍由蕭定一監製，投資6,000萬的特技電影《紫荊俠3D》，由於電影有內地投資者，並會在歐美推出英文版，進軍國際市場機會擺在眼前，推動娜姐積極習武，強攻動作女星行列。


娜姐練習打木樁，師傅在旁監察每個動作，為了保持體力，娜姐還要晚晚加料跑步練氣。

繼續封盤
靠滴雪糕、漏牙膏寫真出奇制勝的D胸周秀娜，去年開始，無再推出寫真集。「娜姐第一年出寫真已經上晒位，連續兩年都賣斷市，幫公司賺咗唔少錢，而家佢出一個活動，價口要八萬到十萬元，照樣唔憂做；本來今年公司想再幫佢出寫真，但娜姐覺得如果要再出，一定要好有突破，如果唔係，寧願唔做。最後佢企硬講服公司，今年繼續封盤。」Chrissie身邊人說。今年再棄戰，Chrissie說：「自己年紀大嘞！留番俾啲妹妹仔玩啦！」讓出寫真女王席位，Chrissie轉戰影壇，一樣搶手，去年一口氣連接五部電影。「而家電影圈青黃不接，娜姐雖然係新人，但好多人都認為佢啲戲唔差，個人又有腦，片酬亦唔貴，係好使好用嗰隻。不過，起步階段始終難免要靠身材！」去年中，蕭定一為周秀娜度身訂造《紫荊俠3D》角色，全片由頭帶到尾，全新打造動作形象。

買重保險
紫荊女俠武功高強，飛天遁地無所不能，為演好角色，周秀娜於過去兩個月苦練詠春，日日做拉筋運動，希望埋位時打得有板有眼，而下月開始，還要學埋揸電單車。「呢兩個月來，除咗每晚跑步練氣，仲有一星期練兩日詠春，兩日拉筋運動，就算做完嘢好攰，佢都堅持去做！」娜姐身邊人說。毫無功夫底子，娜姐對今次的苦練，視為大挑戰。「好開心有機會做打女，希望可以拍到部代表作，我會盡量唔用替身，自己親身上陣，我有咗心理準備，到時可能會受傷，電影公司亦答應會幫我買重保險！」

終於擔正
現年27歲的周秀娜05年被經理人公司GME發掘簽約成為模特兒，09年推出處女寫真及多款產品，包括人形攬枕，成功在一眾模中跑出。人氣急升，娜姐進軍電影圈，至今已參演超過二十部電影，包括《新紮師妹3》、《絕代雙嬌》、《矮仔多情》等。由做配角開始，至10年在驚慄片《惡胎》首次擔正做女主角，去年更一口氣接下《猛男滾死隊》、《熱浪求愛戰》、《殺手歐陽盆栽》、《猛鬼愛情故事》及《紫荊俠3D》等五部戲，為轉型踏出新一步。 ####


學習詠春三個月，娜姐舞動長棍，有晒姿勢。


去年娜姐已經為《紫荊俠》試造型，預計電影13年上映。


片約不斷外，周秀娜早前接拍內地劇《唐朝浪漫英雄》，與方力申合作。


早前與曾志偉、蕭敬騰同現身《殺手歐陽盆栽》首映禮。


在《抱抱俏佳人》中，娜姐與林峯有埋身肉搏場面。

arrow
arrow
    全站熱搜

    stacylife 發表在 痞客邦 留言(0) 人氣()

    E-mail轉寄