周家蔚極力維護老公洪天明,指他不是因呷醋而鬧爆Chester,自己會尊重天明,從今以後同前度劃清界線。

洪天明和周家蔚上周五(23日)假W酒店舉行婚宴派對,唔少圈中好友都俾面出席。天明愛的宣言更令家蔚一度落淚,場面感人。可惜因周家蔚前度男友、王愛倫兒子林建億(Chester)踩場而令婚宴蒙上污點。周日晚(25日)天明向傳媒激動爆粗說:「X街要開名講,不請自來,溝女死遠啲!」矛頭直指Chester。天明咁㷫,除因為Chester溝女搞事外,更因為他想翻撻家蔚。去年6月Chester在微博上載與家蔚的合照,明目張膽寫住:「周家蔚係我第三最愛。」擺明有所暗示。天明動真火,家蔚本周二(27日)亦斷言:「以後有佢冇我。」誓與Chester劃清界線,一心一意做洪太。


洪天明與周家蔚上周在W酒店分兩晚擺酒。上周三(21日)晚嘉賓成龍、劉德華、張學友、譚詠麟等巨星到賀。上周五(23日)晚以雞尾酒形式舉行,天明家蔚圈外圈內摯友玩餐飽。由於不想太拘謹,入場親友都沒有指定座位,兄弟姊妹及親友們大可滿場飛。

兩男早有牙齒印
據知,周家蔚事前曾口頭邀請前男友Chester來婚宴。當晚Chester與好友莊思明一起赴會,但他一直未有向天明家蔚祝賀,只顧拎住酒杯滿場飛溝女。知情人士透露:「家蔚婚宴前同Chester講個party會有好多女仔,叫佢早啲嚟玩。不過Chester入場後四圍搵女仔吹水,九成姊妹俾佢抄牌(攞電話號碼)。湯盈盈佢都有抄牌,所以天明呼籲當晚曾經俾過電話Chester嘅人要小心。不過天明最嬲係Chester之前成日煩住家蔚,仲試過想翻撻,又打小報告,話天明喺出面成日溝女。」原來天明與Chester一早已有牙齒印。周家蔚無諗過舊愛Chester踩場會激到天明咁嬲。為了補鑊,家蔚惟有同天明講Chester係不請自來。周日(25日)天明返電視城錄影節目時激動到爆粗:「×街要開名講,我哋冇請佢,佢自己走嚟。上到去又飲又食又溝女拎電話。最過分係倒水(香檳)落家蔚度,搞到佢濕晒,溝女死遠啲啦。」記者再問天明知否Chester曾撩家蔚翻撻,他承認說:「我同家蔚拍拖,佢都有煩住家蔚,搞到我好躁!」

視家蔚第三最愛
本周二(27日),家蔚出席公開活動,不願多提自己與Chester現時的關係,她說:「天明咁樣鬧法,唔係佢唔大方,只係Chester真係有搞事。我唔想再見到呢個人!以後party有佢份我都唔會去,避得就避!總之有佢冇我啦!」不過記者發現,去年6月Chester仍上載與家蔚及友人的合照到微博,更寫住:「She is my 3rd favorite.(我的第三最愛)」據知天明得知家蔚婚前仍與Chester有聯絡,亦頗有微言,不止一次叫她要遠離這位花心男。

賓客投訴食唔飽
被新娘前度搞寸個場,天明與家蔚都意料不及。不過上周五的party,就有賓客投訴俾足人情都食唔飽,最後要拉大隊食消夜。顯然埋怨主人家未有預計清楚賓客人數,招呼不周。當晚有成七百人到場,若每人做一千至二千蚊人情,天明同家蔚都收過百萬。人情落袋但賓客食唔飽,睇嚟今次唔只天明嬲爆,賓客都唔多like。為此家蔚解釋說:「Cocktail係冇位坐,要有好大地方俾佢哋企,雖然好迫,但人多啲熱鬧啲,我哋有預足夠食物喎!可能啲賓客遲咗嚟,咁就真係唔好意思,招呼唔到。」

志偉飲大做咪霸
曾志偉酒量雖好,但每次有喜慶場合佢都去到盡,呢次世姪天明大婚亦唔例外。飲大咗嘅志偉,上台搶咪胡言亂語,不過天明冇投訴佢搞事喎!

盈盈high爆
飲酒前同飲酒後都high爆的湯盈盈,派對前先與鍾麗淇瞓地扮一對新人(左圖),派對尾聲又上台手舞足蹈,真係好癲。

爛醉天華
人出酒佢出命,謝天華係唯一被抬離場的來賓,上到車仲懵懵吓,睇怕第日睇報紙先知自己醉成咁,

喜愛集郵
在Chester的facebook及微博,都可見他活躍於各大小夜場party,幾乎所有相都是與女性朋友又攬又錫,甚至「一皇兩后」的親熱相。溝女無數的他,除了與周家蔚拍過散拖,亦曾與模藍莓及《喜愛夜蒲》的女主角連詩雅拍拖,不過全部都唔長久,玩吓就散!

靠阿媽溝盡女星
周家蔚前度Chester(林建億)是85年港姐季軍王愛倫的大仔,現年約25歲,於英國大學法律系畢業,家住香島道獨立屋,與家蔚的表弟及表妹十分老友,亦與不少圈中人熟絡。恃住媽咪是前慧妍雅集會長,又是慧妍幹事,Chester溝過唔少嫩口港姐與女星。 Chester與圈中不少富二代亦甚為老友,包括毛玉萍兒子Eric Yu、何鴻燊千金超蓮和超盈等。 ####


本周二(27日),周家蔚出席活動時表示前度Chester在其婚禮真的有搞事,記者拿出Chester攬女的照片,周家蔚話:「對佢會避得就避。」


上周五(23日)晚,洪天明與周家蔚在W酒店搞結婚派對,派對開始前一對新人招待記者入內任影,當時仲未發生不愉快事件。


第三最愛周家蔚與Chester分手後一直有來往。去年6月兩人相約友人外出食飯,其後Chester喺微博公開話周家蔚係佢第三最愛。


鬼妹打孖上


啜爆


𡃁模制服誘惑


攬連詩雅


王愛倫是慧妍雅集的核心成員,每年有新港姐加入,都由她帶住出席活動。阿仔Chester因此有機會認識嫩口港姐。《蘋果日報》圖片


2010年慧妍雅集舉行慈善晚宴,Chester傍住母親王愛倫出席,看似乖乖仔,花弗形象掩飾得好好。《壹週刊》圖片

arrow
arrow
    全站熱搜

    stacylife 發表在 痞客邦 留言(0) 人氣()