2月9日憔悴超殘　約145磅
有傳謝賢拉臉皮保青春，但患病中的四哥臉頸皮膚鬆弛，雙眼無神，瘦到太陽眼鏡也難掩憔悴臉容。

年屆76歲的四哥謝賢，一向心境年青，每次出現也悉心打扮，戴黑超、束長辮是他的標記。女友全是比自己年輕幾十年的大陸索女如CoCo等，老而彌堅，有心有力。
不過本刊收到消息，指四哥近月曾經致電做幕後的老友欲與他們敍舊，更有感而發話：「見得就見喇!」四哥近月突然深居簡出，絕跡公開活動。
2月9日本刊記者終於見到四哥外出，赫然發現他瘦到臉頰凹陷，一個人到灣仔中醫求診，之後還到街市選購野生草龜回家煲來吃。


四哥謝賢近月深居簡出，自二月起，記者到四哥位於西半山寓所等候，發現他甚少外出。直至2月9日，久未公開露面的四哥終於出動。

將定期套現
當日四哥從寓所揸車外出，穿上一身牛仔look，束辮和戴太陽眼鏡，戮力保持型佬形象，但瘦了一圈的他雙頰明顯凹陷，藍色鏡片下，四哥容顏憔悴，雙眼無神，身形明顯縮水，至少乾瘦了十磅有多。只見他步伐緩慢，首先到銀行處理財務，於私人理財房間會見經理。當時記者聽到他聲線略帶低沉和沙啞，細聲對銀行經理說：「幫我將定期啲錢拎出嚟，唔再做（定期）。」之後該經理就以人民幣定期儲蓄利率高，企圖游說四哥繼續做定期，並將港幣轉換成人民幣，不過四哥就斷然拒絕。之後，四哥前往灣仔街市附近的中醫楊北海，在中醫室逗留近半小時後，就拿着藥單到外面執藥。當時四哥木無表情，憂心忡忡不停打電話。執完幾包中藥後，四哥就慢慢走到街市買野生草龜，最後就揸車返回寓所。接着數天，四哥就繼續足不出戶。周三（2月29日），記者問過售賣草龜的女檔主，她表示草龜的藥用價值相當高，更有治療癌症功用，但當記者提到四哥，她則黑面封嘴。

急約老友見面
其實，近月來四哥的行徑相當反常。一位跟謝賢相識近四十年做幕後的老朋友突然接到四哥來電相約飯敍，該老友透露：「四哥向來淨係鍾意群住班後生玩，我哋呢班舊朋友，十次約佢有九次佢都唔得，所以佢今次主動約食飯，我仲玩番佢：『睇吓點啦』。」不過最令這位老友感愕然，四哥竟然在電話中說：「要見好見喇，唔係嗰頭見﹗」該老友續說：「佢成日講笑，我當時不以為意。後來我哋幾個老朋友傾開，先知原來大家都收到四哥電話，而四哥亦講咗同樣說話。」四哥突然感觸，要珍惜眼前人，令一班老友紛紛感到奇怪。不過當大家落實日期打算約四哥見面時，四哥的電話就一直駁到留言信箱。


賣龜阿姐手揸的野生草龜也要近兩百元一斤，價錢與金錢龜相比雖然差一截，但解毒及提升免疫力的療效亦很好。之後記者問到四哥是否熟客時，賣龜阿姐一聽四哥名字便面色一沉，即時封口。

中醫蔡宇國：野生草龜可助抗癌
對於龜能抗病，中醫蔡宇國證實其藥效，但他指最能抗癌的幾味中藥，如金錢龜、穿山甲及犀牛角，因為被大量捕殺，現在已被列為受保護動物，萬金難求。蔡醫師說：「金錢龜嘅藥效最好，最能增強人體免疫力，不過即使係草龜亦有一定作用，尤其係野生草龜更加有功效，雖然唔可以同金錢龜比，但都可以幫到患重病，甚至患癌的病人，尤其對肝、腸癌嘅功效更大，即使係化療期間亦可飲用，只要喺兩次化療中間服用就可。「飲龜湯可以加強人嘅免疫能力，令腸胃吸收能力增強，咁會有力同癌細胞打仗。」蔡醫生稱即使是癌症晚期，如果配以適當嘅中醫治療，一般可以延長病人生命三年，甚至十年，亦有病例試過不再復發。

甩底缺席春茗
社交活動頻繁的四哥，幾乎逢騷必到，不過自今年一月中，四哥跟拉姑齊齊出席完兒子謝霆鋒主演《逆戰》首映禮後，便沒有再在公開場合出現。本周一（2月27日）英皇春茗，霆鋒和婷婷兄妹檔出席，但跟楊受成私交甚篤，原本有份出席的四哥竟然玩失蹤，臨時甩底。記者在活動上，就四哥跟老友暗示自己患病一事問霆鋒，他邊行邊答：「係呀？係咩？（四哥係咪患重病？）我早兩日見過佢 。（精神點呀？）ok呀﹗」隨即由助手拉着匆匆入場。而本來侃侃而談與男友安志杰去旅行的謝婷婷，一提到父親，便突然收起笑容，並以趕着入場為由鬆人。之後記者再三追問四哥的身體狀況，婷婷只重複說：「唔係（重病）呀﹗」當記者話影到四哥乾瘦時，婷婷呆了三秒，口窒窒答：「佢……keep fit吖嘛﹗」其實，四哥同霆鋒關係一直麻麻，當年有傳四哥因投資失利，欠下巨債，將當年只有16歲的霆鋒跟英皇簽下「賣身契」來還債，自此二人關係疏離。去年四哥亦公然寸爆：「我去親佢（霆鋒）屋企，都掛住打機，無人理我。」不過長時間不在港的霆鋒，近月突然長留香港，他曾說：「七年嚟第一次咁多時間喺香港，仲要有假放。」據知霆鋒除了多放時間見Lucas同Quintus，亦帶埋兩個兒子到四哥屋企。個多月前，四哥曾在相熟傳媒面前大讚：「佢得閒就煮飯，仲會煮俾一班兄弟食，成十幾人，多到不得了。佢都幾好，又唔怕煩。」明顯兩父子關係破冰。霆鋒更豪擲二百萬包島豪請公司員工旅行，周三（29日），霆鋒更帶埋四哥、拉姑全家現身機場，再聚天倫，非常難得。

中醫漏口風：暴瘦好多原因

四哥：我都差唔多
向來遊戲人間的四哥，對生老病死其實看得淡然，但近年好友相繼離世，令他不勝欷歔。去年二月，鄧光榮突然心臟病發在家猝死，識於微時的四哥，接到死訊時傷心得說不出話來：「真係接受唔到，唔知講咩好！」今年一月，四哥於港台《十大中文金曲頒獎禮》上頒「金針獎」給甄妮時，更不經意露了端倪。當時有人上前祝賀四哥新年「健健康康」，四哥竟然反應奇大：「唔好，我唔想，想快啲，我都差唔多，霸住個位做乜？」看來四哥對人生無常已做定心理準備。

分手女友CoCo突撲返港
回顧四哥的一生，他96年和拉姑離婚後，於06年便跟年紀相差五十載的上海籍女友CoCo相戀。以往四哥出席公開場合，都帶埋CoCo見識。早年有傳四哥出錢，供女友到英國留學。不過於去年中，四哥就突然自爆跟拍拖五年的CoCo分手。但上月22日，本刊就拍得四哥到中環機鐵站，接從上海來港的CoCo，之後二人更直接返回四哥位於西半山的寓所。據CoCo好友爆料：「係四哥主動打俾CoCo，叫佢返港陪吓佢，CoCo覺得以前受埋四哥咁多恩惠，所以都無托手踭，即刻由上海飛嚟。」記者多次致電四哥手機，一直無人接聽，而拉姑的手機亦轉駁至留言信箱。記者於是在拉姑留言信箱說明問題，之後於截稿前再致電拉姑，但拉姑的留言只說：「多謝大家祝福！」 ####


臉凹筋現
四哥臉頰凹陷，頸筋暴現，牛仔褲管鬆泡泡，激瘦十多磅，更顯老態。


08年11月飽滿無頸　約170磅
身高5呎11吋的謝賢，之前件頭十足，面部飽滿。
《蘋果日報》圖片


11年6月粗腰飽滿　約160磅
去年6月，四哥出席活動時神情飽滿，除經常笑外，腰間更現肚腩。《蘋果日報》圖片


今年1月突然老態　約150磅
為撐霆鋒，四哥出席《逆戰?n首映，當時病態初現，開始消瘦，這次亦是他最後一次出席公開場合。《蘋果日報》圖片


套現金四哥到灣仔謝斐道恒生銀行，分行經理親自接見，四哥懶理經理游說，堅持取消定期，將存款放入活期戶口，方便提取現金。


買野生草龜服用


提四哥即封嘴


霆鋒：早兩日見過佢對於四哥身體突然乾瘦，看似患病，霆鋒裝作毫不知情，還反問記者說：「係咩？我早兩日見過佢嚟！」


婷婷：佢keep fit吖嘛婷婷口窒窒未肯透露四哥的身體狀況，只重複說：「唔係（有病）呀！」被問到四哥乾瘦時，她再口窒窒答：「佢……keep fit吖嘛！」


拉姑：多謝大家祝福記者致電拉姑，其手機卻飛到留言信箱，留言說：「大家好！我係拉姑，多謝大家祝福，多謝關心。」《蘋果日報》圖片


昔日四哥不時大讚栢芝是好新抱，但霆鋒、栢芝去年鬧婚變時，栢芝想盡分霆鋒家產，連四哥所住的半山寓所都喉住，一度令四哥相當憂心，直認：「我擔心自己啲資產。」


神醫求診成日話生死由天的四哥，曾到灣仔名醫楊北海求診，睇病睇咗半小時，然後憂心忡忡出來。


中醫楊北海醫館位於灣仔道，開業超過四十年，專醫奇難雜症，以醫治癌症最為馳名。經常排滿人龍，暫不收新症，要熟人介紹才收症。


記者放蛇求診，要「撻朵」才獲應診，但對於客人四哥病情非常口密，只說：「暴瘦有好多原因，人哋（四哥）嘅嘢我唔講嘞！」間接承認四哥近來激瘦。


2月22日返港急探上海女子CoCo去年中跟四哥分手，但22日突然從上海來港。謝賢還親自駕車到中環機鐵站接她。


之後CoCo便直接到四哥西半山金徽閣寓所，記者等至凌晨亦未見她外出。


四哥以往跟CoCo經常糖黐豆，去邊都一齊，而來自上海的CoCo滿身名牌，手拎的Hermès亦是四哥贈送。《蘋果日報》圖片


「銀色鼠隊」於六十年代組成，成員除四哥外，包括張沖、沈殿霞、鄧光榮、秦祥林、陳自強和陳浩。由於隊員相繼離世，因此四哥不時在友儕間欷歔地說：「人生無常，我哋銀色鼠隊都走咗一大半。」《壹週刊》圖片

arrow
arrow
    全站熱搜

    litalife 發表在 痞客邦 留言(0) 人氣()

    E-mail轉寄