奇洛自拍完《廿二世紀殺人網絡》後,對武打片情有獨鍾,剛剛自導自演完《太極俠》,輪到《浪魂 47》又扮日本浪人耍武士刀。奇洛雖然好型仔,不過無論造型同故仔,睇落有啲似十年前湯告魯斯嗰套《最後武士》。 

西面

聖誕去片

香港電視節目悶死人。電視劇唔係左抄右抄,就係玩煮麵偷聽;綜藝節目仲差,好似《獎門人》播足 20年,真係一開電視見到都想轉台。
聖誕唔使睇電視,亦大把好戲選擇,無論科幻、動作;甚至老少咸宜的動畫樣樣有齊。要數今年聖誕大熱巨片,一定係靚佬奇洛李維斯主演的《浪魂 47》。耍完太極的奇洛,今次化身日本混血浪人,唔只手執武士刀殺敵伏妖,仲同靚女柴咲幸上演奇幻苦戀, do you like it?

《浪魂 47》 奇洛操刀殺敵

奇洛李維斯近年一定好鍾意亞洲。早排先同莫文蔚合拍《太極俠》,但依然唔夠喉,再去日本拍《浪魂 47》。此片將於本月 6日在日本率先推出,之後 25日聖誕節當日,於美國及香港同步上畫。
上映日期: 12月 25日


故事以日本江戶時代做背景,日本演員當然唔少得。戲中,日劇一姐柴咲幸飾演奇洛嘅愛人美嘉,據知 2人仲有錫嘴纏綿戲。有傳美嘉一角原本想搵米倉涼子演出,但最後奇洛揀咗柴咲幸,因貪佢後生過涼子。 

《浪魂 47》中,真田廣之同奇洛組織 47浪人團為主人報仇。片中,同奇洛最多對手戲嘅真田,大讚奇洛:「佢好自律,又好有武士精神,仲好照顧唔習慣拍荷里活片嘅日本演員,我好尊敬佢。」 

叫真田做師傅

《浪魂 47》以日本江戶時代做背景,講述真田廣之的主人,慘遭敵人淺野忠信殘殺後,真田廣之被迫帶着一眾家臣過着顛沛流離的浪人生活,最慘是背負一世惡名,好彩流浪途中遇上奇洛飾演的混血武士,經奇洛鼓勵下,真田廣之意志重燃,還召集僅餘的家臣組成 47浪人團向淺野忠信報仇,誓以鮮血討回公道。
《浪》片中,奇洛與真田廣之最多對手戲, 2人一齊揮刀殺敵,早前奇洛接受訪問時,就賣口乖大讚真田廣之:「佢哋揮刀功架真係一流,我喺佢身上學到好多嘢,我都忍唔住要叫佢做師傅。佢(真田廣之)唔只技術優良,而且好有紳士風度,能夠合作係最高榮譽。」


片中奇洛想搞革命起義,但初頭唔成功,還被敵方的軍官用棍毆打。 

《浪魂 47》最大奸角,係淺野忠信飾演嘅浪士吉良,因殺咗真田廣之嘅主人,令真田同一班士臣要流浪,係真田最大仇人。 

近年演出多套荷里活電影嘅菊地凜子,飾演妖精水木,除施展妖術引誘男人,更會化身青蛇偷襲人,連奇洛都冇佢符。

幸妹緊張流汗

除武打場面,片中奇洛更與柴咲幸有感情線,幸妹跟住奇洛,生命雖然經常受到威脅,但因深愛對方所以誓死相隨。首次拍荷里活片,還與奇洛上演錫嘴戲的幸妹,講起奇洛就話緊張到一額汗:「奇洛係我偶像,起初喺片場見到佢真係緊張到流晒汗,好彩之後得到導演協助,先可以投入到去拍戲。」如果有床戲,幸妹實緊張到流眼淚啦!

《哈比人:荒谷魔龍》 奧蘭度回歸

今個聖誕檔期,有 quali同《浪魂 47》搶票房的西片,應該只有《魔戒》前傳《哈比人:荒谷魔龍》。
今集《荒谷魔龍》已是《哈比人》三部曲的第二章,今集講到比爾博巴金斯,繼續與法力高強的巫師甘道夫,聯同 13矮人兵團向孤山進發,途中當然遇上森林精靈等怪物搞搞震。
今集最大賣點,當然係由奧蘭度布林飾演的精靈箭手強勢回歸,戲中,奧蘭度將與群魔之首巨龍史矛革正面對戰,成為重奪孤山及矮人王國伊魯伯的重要一戰。原著原本沒有奧蘭度飾演的精靈箭手出現,但導演彼得積遜想故事情節更加豐富,所以專登加插愛將奧蘭度。老實講,失婚奧蘭度,一樣咁 charm。
上映日期: 12月 12日


喺《魔戒》飾演精靈箭手嘅奧蘭度布林,靚仔又威猛,當年迷死唔少女。今次導演彼得積遜特登安排精靈箭手再出場,希望利用奧蘭度谷票房。 

終極大佬今集將出現大堆怪物精靈搞搞震,不過最大惡霸就係呢條群魔之首巨龍史矛革,睇佢雙眼發光嘅造型,真係誇張過哥斯拉。 

今次奧蘭度嘅拍檔,就係《迷》女主角伊雲祖蓮莉莉飾演嘅精靈族女戰士 Tauriel,唔只同佢打生打死,當然仲會談吓情啦。 

雖然彼得積落重注喺奧蘭度身上,但由馬田費曼飾演嘅哈比人比爾博先係主角。今集佢將連同小矮人族一齊對抗巨龍。 

14億超豪製作

上集《哈比人:不思議之旅》,全球大收約 78億港元,所以今集電影公司華納兄弟更加開水喉,豪擲 14億港元拍攝,除採用最先進 3D攝影技術及立體效果外,更興建出 99個攝影棚,全片足足花近 8,900工時製作,超認真。


彼得積遜(左一)成功游說電影公司豪擲 14億拍《哈比人》第 2集,為保險起見,所以搵咗愛將奧蘭度歸隊幫手,希望借佢名氣谷票房。而每場奧蘭度有份拍攝嘅場面,導演必親自指揮,錫到佢燶。 

成套戲唔只搭咗 99個場景拍攝,亦一如以往遠赴新西蘭取景,真係燒銀紙。 

聖誕動篤笑

聖誕節普天同慶,當然唔少得一堆動畫贈興。今年聖誕除日本卡通應市外,仲有動畫一哥迪士尼全新 3D電腦卡通《魔雪奇緣》同大家一齊過聖誕,要揀一套一家大細笑餐飽的卡通,都真係幾頭痛。

《魔雪奇緣》 動畫名牌

迪士尼繼《魔髮奇緣》及《無敵破壞王》之後,今個聖誕將推出全新 3D動畫《魔雪奇緣》。
故事講一個急凍詛咒令一個美好王國長期陷於冰封。為拯救王國,勇敢的安娜聯同勇士基斯托夫去找尋「白雪皇后」愛莎解咒,其間經歷重重魔法迷陣,真係一步一驚心。
迪士尼製作童話必有品質保證,港版《魔雪奇緣》仲搵埋糖妹搭少爺占聲演,同聲同氣,更加生鬼。
上映日期: 12月 19日


迪士尼繼《魔髮奇緣》後,今次轉玩魔雪,炮製《魔雪奇緣》。片中,女主角安娜會帶住雪人小白及風度翩翩嘅勇士基斯夫一齊解開長年冰天雪地嘅毒咒。 

安娜靚女,而且心地善良,唔只勇士基斯托夫鍾意佢,連王子漢沙都對佢傾慕。勇士同王子齊出現,呢類童話,肯定受少女歡迎。 

一般勇士都係騎馬上戰場,但勇士基斯托夫就騎住雪鹿斯特,一齊喺冰天雪地歷險,夠晒奇特。

港版《魔雪奇緣》搵咗少爺占配片中經常同安娜一齊嘅雪人小白,除聲演之外,仲會唱埋歌。 

糖妹就負責做女主角安娜嘅配音,糖妹講笑話:「希望好似安娜一樣識魔法,就可以令自己唔會肥啦!」 

行先一步

今個聖誕,唔少動畫都比電影搶先一步,於聖誕前夕上畫,實行行快一步,好過同大片死過。

《火雞反擊戰》 憤怒鳥作反

一向火雞都是感恩節的傳統美食,但今次一班火雞誓要起革命,搞三搞四將時光倒流,仲夾手夾腳改寫火雞成為各大節日嘅美食,從而搞出大量笑話。
上映日期: 12月 12日

《與龍同行 3D大電影》 食正 timing

講 7千萬年前,小恐龍柏奇天,憑智勇在弱肉強食的社群下求生的故事。科學館現正舉行恐龍展,食正 timing。
上映日期: 12月 19日

《風起了》 大師收山作

講二戰日軍戰機設計師,雖經歷戰亂以及地震等多個大時代,但依然為夢想奮鬥的真人真事故事。《風》片為大師宮崎駿收山之作,有一定紀念價值。
上映日期: 12月 19日


撰文:何家文

arrow
arrow
    全站熱搜

    tvb4life 發表在 痞客邦 留言(0) 人氣()