面對面
你的樣子如何 蝦頭楊詩敏
有危必有機，這句話說得好。
建台 46周年，大婆台遇上史無前例的衝擊：新發的免費電視牌照、網上選擇無限、觀眾網民火眼金睛、還有台前幕後大量流失……
無綫大鑊就是觀眾福音：無數電視新血因應加入，肩負住救救大婆台的重任，當中，包括演了十八年舞台劇的蝦頭，楊詩敏。
38歲的蝦頭，十年前就在舞台獨當一面、 06年登上香港舞台劇劇后寶座、五年前加入 PIP劇團，與泰臣齊齊變成詹瑞文旗下兩顆最搶鏡的笑彈，十八年前從演藝學院畢業（同學羅敏莊），十八年後才走進電視台，蝦頭說，因為她太忙。
「我呢啲 type好搶手，專做女主角啲好朋友，又搞得笑，去到邊都有戲做……咁我又靚呢……哼……哈……」
身形渾圓、臉形渾圓，單眼皮塌鼻子大嘴巴，笑起來騎騎聲不顧儀態……讚完自己靚，蝦頭那聲「哼」，還有那下「哈」，可圈可點。
先不評論蝦頭漂不漂亮，可以肯定的是，與徐子珊相比，我肯定更想看蝦頭，更喜歡看蝦頭在影樓裏一秒變臉，扮盡「徐子珊」、「打極唔死徐子珊」、「徐子珊肚痛」還有唱中文版〈 DoReMi〉：「 Fa……係好長的『奔走』……」（請睇片！）
可惜，再搞笑再有戲，蝦頭進電視台還是被安排演黃子華的花癲前女友、徐子珊再趕客，還是《 My盛 Lady》女一號與台慶大熱，心理質素再強，敵不過世界現實：「你的樣子如何，你的日子也必如何」。
只不過下半句，改成「你的生存之道也必如何」更符合眼前這個人。
笑聲救電視
不說不知道，原來十三年前，蝦頭拒絕了第一個走進無綫演電視劇的機會，那一年的對手，與十三年後一樣，都是黃子華。那部電視劇，叫做《男親女愛》。
「嗰年離開演藝，被安排入無綫試鏡，監製徐正康想搵我，雖然冇講明係咩劇，但係打後佢就開咗《男親女愛》，我估，當年我錯失嘅就係《男親女愛》。嗰陣時啱啱畢業，讀嘅係舞台，所以一心一意想繼續做舞台……人細個，想法就會太狹窄，倒番轉頭諗梗係好錯，其實去到邊都係演戲，行任何一條路，都唔會係寃枉路。」
在舞台上打滾十八年，初踏進電視台，蝦頭說無綫每個人都異常「醒目」。這個形容詞，我聽着像貶意，蝦頭卻說真心讚，即使是對戲路極膠、觀眾受落程度跌進史上最低谷的徐子珊：「我哋做舞台劇嘅，閒閒哋至少有一個月時間排劇，畀你慢慢順住個故事發展認識對手、找感覺。但係呢一個月，擺喺其他行業，尤其係電視台，係一件好奢侈嘅事，仲要係呢個 shot拍完，下個 shot跳咗幾集，鏡頭與鏡頭之間發生咩事，我要諗好耐，但係佢哋班電視演員個個嚟到都話嚟就嚟、話入就入，呢啲就係醒目。就算徐子珊，我都喺佢身上學到嘢，無論 take幾多 take，情感話到就到、眼淚話嚟就嚟，仲要係真眼淚喎！呢啲就係專業。」
接受學院派教育、經歷舞台式磨練，如今在電視台跟徐子珊學專業，聽落我覺得蝦頭有些自貶。
「詹 Sir教落，作為一個演員，應該唱得演得主持得，做舞台得做電影得做電視亦都一樣得，藝術理應係互通。我哋大家都係睇無綫大，我哋大家亦都讀過中史，知道一個朝代有興就必有衰，冇可能持續興盛幾百年。無綫經歷緊衰落，需要新血、新嘅火花帶佢進入新一輪興旺。而我，係想做一個有影響力嘅演員，想有朝一日，楊詩敏，會係香港喜劇界嘅一個代表人物。」
在《 My盛 Lady》中扮演盛女之一、幼稚園教師兼黃子華前女友，在結局篇最尾 3集才現身的蝦頭說：「我扮徐子珊係因為劇情需要，呢條橋好重要，唔穿得住！」 
縱橫劇場十年、再得詹瑞文調校五年，今年三月蝦頭正式離開 PIP，自導自編自演兩部舞台劇：「係詹 Sir教我，演員亦可以係創作型。」
別了詹瑞文
從小在鰂魚涌長大、父親是五金鋪東主、母親（圖右）是家庭主婦：「讀演藝，最慘係見到啲同學俾屋企人鬧讀嚟冇用，所以我有父母支持真係好幸福。」
正經的大道理說完，是時候說說蝦頭不正經的一面。而我認為蝦頭最不正經的時刻，體現在她喋喋不休強調自己是靚女時。我問她覺得自己靚在邊？她這下答得最正經：「我靚喺個心度！」
「呢句說話唔係醜人先會講，真正嘅美麗唔應該局限喺外表！你要知道靚嘅人通常有嘅缺陷，演員係一個展現自己嘅工作，嗰啲缺陷一定會被人睇到；靚嘅人，太多嘢容易得到，就會少咗由自己實實在在去做嘅過程；靚人冇保障，有日唔需要外表，可能會冇第二樣嘢可以用；有人覺得呢個人靚，但係亦會有人覺得佢唔靚，或者你靚，但係你觀眾緣不如我，所以我話呢個世界好公平。」
世界真的公平嗎？
「世界其實唔公平，唔係我當年就唔會入演藝讀導演，因為知自己唔夠瘦唔夠靚；係公平，我嘅演出就唔會永遠被定型係女主角個 friend，啲仔永遠俾女主角溝晒，我就係饑渴盛女；係公平，靚人就唔會一行出嚟就有優勢，而要我去行咁多寃枉路……世界其實亦都好公平，至少我睇別人，靚與唔靚從來唔係做人必需嘅條件。先天生得再靚，內心空洞，一樣會變得面目可憎，呢啲就係公平。」
起碼，舞台劇界要比電視台來得公平，蝦頭 06年憑《愈笨愈開心》，獲得香港戲劇協會年度最佳女主角大獎，角色就是一個師奶； 07年走進 PIP劇團，就一直是詹瑞文眼中不二的女主角人選。
「入 PIP係我嘅演戲分水嶺，詹 Sir係父母以外，演戲生涯影響我最大嘅人。 07年，我做咗幾年戲、攞埋女主角獎，去到詹 Sir嘅劇團、演一齣反串做反叛少年嘅戲，簡簡單單一個動作『跨過』，做極佢都唔收貨。係詹 Sir親自示範畀我睇，『跨』唔係得兩隻腳踏出去，而係一個牽涉身心、四肢嘅 movement； 07年以前，我淨係一個收到劇本就演戲嘅演員，係詹 Sir要求我做一個創作型演員、可以自編自導自演、唔係再滿足於收到劇本；以前，我貪圖安逸太依賴，係詹 Sir叫我出去闖，所以 2013年，我終於做到楊詩敏，而唔係再 under於詹 Sir之下。」
得詹 Sir帶摯，把《潮性辦公室》從舞台帶上大銀幕，讓蝦頭成為近年電影圈搶手綠葉。 
06年已經是香港舞台界劇后，蝦頭的知名度則是 07年加入 PIP劇團後才暴漲。圖為 11年詹瑞文舞台劇《女人之虎》，蝦頭與泰臣扮演張栢芝、陳冠希機艙重遇。《蘋果日報》圖片
求戀休漁期
一說愛情，蝦頭就不忘提到俄國戲劇大師契訶夫那句影響她最深遠的名句：「要是心裏冷冰冰，沒有一點愛情，青春就是虛度，生活就等於零。」所以， 38年以來，她不放過任何的戀愛機會，與各行各業各個國家的異性發展過戀情：大學教授、編劇、藝員、電視藝員、手語專家、銀行家、模特兒，甚至日本廚師和泰國街頭藝人，對上一個，據說是中學教師。
「被人拋棄過、又拋棄過人，試過愛情至上，亦都試過追求事業，咩人都遇過、咩拖都拍過後，我將我嘅大部分愛情經歷，寫咗喺我自編自導自演嘅獨腳戲《求戀期 Q娃》裏面。人生喺唔同階段，總有唔同追求，同對上個教師男朋友拍咗拖一年，分手兩個幾月，我想停一停，人愈大愈了解自己，我太唔定性，不如同異性朋友 keep住個友誼好過。畀我一個人闖吓啦，畢竟我 38歲，係第一次冇個護蔭，可以獨當一面、一個人生存。」
我的情敵龍小菌
今年初離開詹瑞文後，蝦頭現時的經理人是邵子風，同門還有另一個藝人——龍小菌。外傳蝦頭與邵子風識於微時感情深厚，被龍小菌後來居上橫刀奪愛，蝦頭當然否認：「邵子風係我一個好重要嘅朋友，喺我好多個人生低潮時陪我度過。從前我極度冇自信，係佢幫我發掘好多連我自己都見唔到嘅優點。」
哦，看到蝦頭的優點是一回事，被拍到與減肥成功又靚又瘦的龍小菌十指緊扣又是另一回事，其實很悲，但又不得不承認：你的樣子如何……
蝦頭的感情生活一向豐富，近年與經理人邵子風傳緋聞（圖右），不過被拍到與邵子風十指緊扣的則是龍小菌。網上圖片 
撰文：朱小博
攝影：范仲良
化妝： Macy@K8M make up workshop
髮型： Kenny@hair Corner
形象： Bryan@the Flaming
留言列表
