余文樂成晚滿場飛，話晒係沈嘉偉好友，當然要招呼吓朋友，不過，對住 JM就傾得最開心。
真面目
夜場殺手 攬完 Kary 餓狼余文樂進擊爛醉 JM
上週二（ 19日），本地時裝品牌 I.T在尖沙咀圓方搞 25周年派對，老闆沈嘉偉和老婆邱淑貞，一班巨星好友如張曼玉、吳君如和梁朝偉，連韓星 G-Dragon和太陽都畀面出席。
巨星眾多，大會在 after party設了 VIP區，閒人免進。而余文樂和舊愛吳雨霏 Kary分手後首次碰面，本刊全程直擊，初時兩人都顯得避忌，但在音樂加酒精刺激下，余文樂愈跳愈埋，仲忽然攬住 Kary，嚇到 Kary O咗嘴。撩完前度，余文樂進擊女神 Janice Man，飲到爛醉的 JM亦來者不拒冇篩選！好亂喎咁！
今年 6月，余文樂和 Kary爆出分手後，今次 I.T的 25周年派對是首次同場，雖然前後腳到達，但在 VIP區內就另一番春光。
見到 JM，余文樂揸住成支香檳，準備同 JM乾杯。 
余文樂一見到舊愛 Kary，即刻撲上前撩傾偈，之後仲乾脆一手攬住 Kary，但究竟余文樂知唔知當時有好多對眼望住㗎？ 
放肆任玩
晚上 10時多，一眾嘉賓如余文樂、官恩娜、 Kary、 JM、松岡李那和梁詠琪旗下名模藍婷芝 Amber等等，陸續到 Sky100的 after party，由於要出示手帶確認身份，一班明星在 VIP區可以放肆狂歡。
整晚最矚目是余文樂和 Kary，原本余文樂和陳偉霆、李璨琛一班 friend吹水， Kary就同 Ground-Zero的細佬設計師 Philip Chu傾偈，但余文樂跳吓跳吓，就跳到 Kary隔籬，身邊的人開始你眼望我眼，余文樂突然出手攬實 Kary，完全懶理其他人目光，之後仲拖住 Kary，拉佢一齊影貼紙相；影相時，余文樂仲搭住 Kary助手的膊頭，不過 Kary就似乎唔太領情，影完相就急急鬆人。
攬完 Kary，余文樂轉頭已經同 JM糖黐豆咬耳仔，仲愈企愈埋。 
甚有女人緣的 Eric，逗到 JM笑到四萬咁口，仲唔覺意攬住 JM條腰。 
Eric Chu（朱鑫駿）為本地時裝品牌 Ground-Zero創辦人之一，'10被拍得與梁政珏拍拖行街，不過二人於去年底分手，但 Eric與不少圈中女星相熟，好似薛凱琪和阿嬌等。
Eric Chu朱鑫駿（左）和 Philip Chu朱柏弘（右）兩兄弟創立本地時裝品牌 Ground-Zero，大哥 Eric先後和梁政珏、松岡李那拍過拖。 
梁詠琪簽下的名模藍婷芝 Amber，去年來港發展，當晚 Eric Chu亦 mark實 Amber。
Kary：佢飲多咗！
余文樂刻意叫 Kary影貼紙相， high爆的余文樂全晚表現風騷，可惜最終食白果。
前度唔多受，余文樂都不愁寂寞，見到 JM在附近，話咁快又撲上前撩傾偈，兩人愈傾愈埋，不過 JM身邊太多護花使者，又有經理人在場， Ground-Zero的大佬設計師 Eric又攬住 JM條腰，余文樂只敢同佢乾杯。開始有醉意的 JM又愈飲愈 high，企都企唔穩，經理人便拉她離場。「進擊」唔成功，余文樂走埋一邊煲煙，繼續拎住支香檳喪飲自 high。
本刊事後致電 Kary，問到在派對被樂仔攬一事，說：「我諗佢飲多咗啫，其實嗰晚係分手之後第一次見面，大家都仲係朋友嚟嘅。」
勁過台慶
I.T 25周年慶祝派對星光熠熠，一班極少出席活動的巨星都有到場，連王菲長女竇靖童（箭嘴）更以男裝打扮首度出席香港活動。 
I.T老闆沈嘉偉和老婆邱淑貞碌盡友情牌，個個畀面出席撐場，老闆娘邱淑貞在 VIP區頻頻招呼賓客。 
當晚巨星雲集， cool魔張智霖成為「集郵」目標。
採訪、撰文、攝影：娛樂組
留言列表
