高海寧：聽講有金牌送（真實對白）
娛樂喧
無綫縮皮減騷 高海寧硬食 Bob微博寸爆
無綫綜藝科總監余詠珊，自上場以來掀起不少風波，最近又多添一鑊：由她策劃的節目《反斗紅星放暑假》，因為縮皮竟然唔計騷，又欠缺保安、化妝及髮型師，加上接駁車安排差，搞到天怒人怨。
本周一首播的《反斗紅星放暑假》，動用過百藝員到迪士尼及廣州的長隆水上樂園拍攝。據知無綫收取了兩個樂園各一百萬贊助費，但出席藝人卻冇錢落袋，只象徵式收個金牌。難怪藝員私下呻爆，更有女藝人不忿致電公關部投訴。
打正「 Amazing Summer」旗號的遊戲節目《反斗紅星放暑假》，無綫安排陳百祥、薛家燕、謝天華等過百藝人參加拍攝，執行一連串任務，每位藝人參加拍攝的日數約 1天至 5天不等。雖然好多藝人都俾面撐場，但今次無綫以金牌代騷錢的做法，令上下藝員怨聲載道。
「 TVB收咗長隆同迪士尼各一百萬搞呢個節目，但啲藝員用咗全日時間上去長隆拍攝竟然冇騷計。原本話會有個紀念金牌送番俾啲藝員，但到個節目拍完都冇人知個金牌係咩樣！」知情人士說。
余詠珊入無綫後，風波不絕，早前又因為插手揀選劇集角色，與阿叻鬧不和。
呻爆貼錢開工
冇錢收不特止，最慘還要貼錢開工。據知，每次拍攝的藝人多達二、三十人，但化妝、髮型師僅得一、兩個。女藝人在長隆拍攝期間，落水後個妝溶晒都冇人補，搞到她們「烏 wet」出鏡。現場又冇保安，男泳客圍住她們爭影合照，嚇到藝人要周圍匿，認真陰功。
「以前上綜藝節目，兩集活動當一個騷計，有時還有一百至五百元利是不等，依家利是 cut埋。有部分藝員仲要自費坐火車上廣州，拍完又要逼黃巴返港，車錢都蝕埋，慘過做義工。好多人呻爆，但大部分敢怒不敢言。」
就金牌代騷錢一事訪問了幾位女藝員，她們個個都推說不清楚，但就承認聽過送金牌一事。高海寧避重就輕謂︰「呢方面（計騷錢）係經理人安排，自己不嬲都冇理，不過聽講會有金牌送。（咁金牌到手未？）未見過，應該遲啲會俾番我啩！」
至於莊思敏則無奈表示︰「由長隆返香港嗰晚太夜，要轉三程車先返到屋企，當係經驗囉，髮型同化妝我都要自己搞掂。至於泳客埋身，係拍激流環節嗰陣，其他時間都同泳客隔開，而我就會自己保護自己。」
6月中，阿 Bob到長隆拍攝期間，更上載微博，刻意寫上每日使費，暗寸父親節要自費開工。繼微博發功， Bob亦直言：「去咗長隆拍攝兩日一夜，知道完成特別任務後會有金牌。計唔計騷？真係唔知喎，冇刻意去問， TVB都冇講！至於開工嗰兩日嘅使費，唔會同公司 claim番。」
麥玲玲得悉冇騷錢計，十分緊張，更隨即找《反》的監製何小慧問個究竟。
𡃁妹李綺雯就話一向接無綫嘅工作都唔會刻意去問有無騷計。
就「冇計騷」風波求證余詠珊，她承認曾有藝人就此事向她反映。但問到化妝、髮型師不足，交通及保安安排失當，她就前後矛盾，一時話冇認真跟進，一時又話夠。
記：《反斗紅星放暑假》參加藝人係咪冇騷計？
余：（激動說道）點會冇！之前都聽過某啲藝人問點解冇騷計，根本就冇啲咁嘅事，我喺之前冇講明即係有啦。
記：據知遊戲節目《獎門人》都冇騷計。
余：《獎門人》唔同，因為好多獎金獎品，唔同節目有唔同計法。點樣計騷唔會話俾大家知，但絕對唔會要藝人蝕底。
記：聽聞活動欠保安，搞到女藝人俾泳客圍？
余：唔會，我哋每次搞呢啲活動，一定安排足夠嘅工作人員，加上今次地方好安全。
記：咁今次安排咗幾多個保安、化妝同髮型師去長隆？
余：我冇認真跟進，但不嬲都會安排足夠工作人員去保護，啲古靈精怪嘅傳言唔知點嚟。
記： Bob話去廣州食嘢同搭車都要自費！
余：藝人可以同公司 claim番錢。
記：今次同長隆、迪士尼合作，佢哋係咪俾咗各一百萬贊助費？
余：其實我本身想搵主題公園合作，所以就主動同佢哋傾，至於贊助費就一部分啦！
據藝員透露，無綫一貫慣例，有騷價的活動，事先會同演員講清楚，與余詠珊的「冇講即有騷計」的講法相反，記者再致電外事部求證，但截稿前仍未獲回覆。本刊下期再為大家跟進啦！
溶妝冇人理
長隆騷化妝髮型師不足，好像莊思敏落完水拍攝，溶晒妝都照出鏡。
泳客圍女星
雨僑在長隆等候拍攝期間，被四名半裸上身的男泳客要求合照，但無工作人員幫忙阻止，雨僑只有乖乖就範。
排隊逼黃巴
岑杏賢晚上大約十一點回家途中更新微博，話玩完水上活動甩晒妝，仲 post咗張跨境黃巴士飛。
眾星在長隆酒店門外，齊齊等巴士離開。
出騷收 buddy
昔日小生花旦亮相無綫節目不足三十分鐘，亦可當一個騷計，騷價視乎藝人身價而定。在出騷前，會向藝人講明有錢收。
09年，藝人為綜藝節目做嘉賓，變成以利是代替騷錢，分別是一百、三百及五百元（按藝人級數及年資而定）。
11年開始，無綫慳皮行為再升級，於《都市閒情》及《兄弟幫》等節目做嘉賓，只送價值 68蚊嘅 TV Buddy公仔或金牌代替利是。
留言列表
