九三年，鄧文迪去梅鐸旗下嘅星空傳媒（ Star TV）做實習生，喺公司酒會識咗梅鐸，之後仲登堂入室。各位港女，學吓嘢啦。（法新社圖片） 

中環人語

鄧文迪￥ 335到$78億

傳媒大亨梅鐸，要同老婆鄧文迪結束十四年婚姻，震動國際。梅鐸旗下嘅新聞集團（ News Corp），持有廿一世紀霍士電影公司、《華爾街日報》及 Dow Jones等數之不盡的媒體，總資產達五千億港元。不過，鄧文迪有得睇、就無得分；據知她和梅鐸有婚前協議，不會分得新聞集團任何股權。但其贍養費用，就可能高達七十八億港元！一樣羨煞一眾大陸女子。

鄧文迪只係來自大陸江蘇徐州市，睇番佢呢幾張童年舊照，樣子黑實樸素，一啲都唔起眼。佢仲係徐州少年排球隊成員，位置是副攻，難怪前年有人襲擊梅鐸時，她能第一時間走出來「扣殺」！當年佢入讀高校，申報家庭經濟收入，父母加埋姐姐與叔父，總共一個月只賺取三百三十五元人仔！其後鄧文迪輾轉離開中國、結識梅鐸，改寫人生，婚後她在夫家新聞集團，只做過網站 Myspace董事，翻查新聞集團年報，○九及一○年的報酬，分別只有七十一萬及七十八萬港元，即一個月只有幾皮嘢。不過當巨額贍養費落實，今年只有四十五歲的她，便一鋪賺突，此乃一生最佳投資！

鄧文迪鄉下啲同學仔話，文迪（原名文革）細個好黑實，成個男人咁，對佢哋來講無咩吸引力﹗ 

鄧文迪家境清貧，家庭總收入只係幾百蚊，難怪自小滿懷大志要脫貧。 

寸嘴英「舌戰」小辣椒

插圖：王健威 

出名寸嘴嘅豐盛金融資產管理董事寸嘴英（黃國英），早輪喺伊利莎伯體育館開 talk show，有唔少人捧場。但佢不嬲都牙擦擦窒人唔使本，佢話：「公司搵代言人 sell產品，賣三千蚊嗰啲肯定好賣過三十蚊嗰啲。」寸爆當晚都有出席、幫大家樂賣三十蚊套餐廣告嘅青姐（胡孟青）。有股壇小辣椒之稱嘅青姐，條氣即刻好唔順，連續幾日喺報章專欄反擊，話寸嘴英乞人憎，好重火藥味。
不過近日小宗再同寸嘴英傾，問佢同青姐之前係咪有好大牙齒印，佢竟然一臉無奈咁話：「無喎，我哋本身唔識㗎喎！」佢之後仲突然好興奮，叫小宗用手機睇青姐嘅加長版大家樂廣告，片中大 sell溫情，「我即刻 whatsapp條 link俾你，快啲睇，真係好好笑，哈哈，真係笑死我喇，哈哈哈﹗」再辣火頭？難道他不明白，爛佬怕潑婦的硬道理嗎？

77歲照賽車

本週二，長居美國的潘炳烈（左）帶同老婆黃夏蕙（右）出席 Lotus賽車記者會，佢話一年會返香港探夏蕙姨幾次，圖中為 Lotus代理商黃毅力。 

賽車界響晒朵嘅潘炳烈，今年已 77歲高齡，照樣參加本週末喺廣東肇慶舉行嘅 Lotus賽車賽。佢去邊度比賽，就成為邊度最老車手。 Lotus最快時速達二百多公里，心血少啲都出事。潘炳烈淡定話：「我十歲開始打獵鍛鍊身體，啲後生話我阻住晒，但我次次贏佢哋噃！」好嘢噃！

Give me a break　中環求愛大作戰

上週六嘅中環 speed dating，雖然男女質素唔差，但從大家嘅對話同眼神所見，港男港女都幾猴擒！ 

大把港女想做鄧文迪；成功，係要爭取的！就如電視節目《求愛大作戰》，一出街，花生期貨即時抽高！大家剝住花生，睇吓在女多男少嘅香港，港男港女有幾猴擒！
要識人，坊間有不少婚介及 speed dating公司，中環亦有三、四檔。上週六就有活動喺中環一間餐廳包場舉行，一共二十男、二十女。當晚大部分男士都不超過三十歲，有會計師、核數師、工程師，條件不差，還要樣子不俗，睇到一班女仔雙眼發光。佢哋異口同聲話，工作太忙，加上圈子窄，想來識多啲朋友。計計數，一晚活動每人收費三百多元，扣除包場、晚餐成本，一場四十人的 speed dating淨賺四千，如果日日有場，一個月可賺十幾萬；未釣到金龜，搞手先發達！
現時 Speed dating公司競爭激烈，傳統 table for six滿足唔到客人，老字號 214 dating公司就諗到同現時最 hit嘅密室逃脫 crossover。「呢個遊戲最睇到啲人係聰明，蠢定鍾意幫人！」負責人 Tammy教路，剩男最忌炫富，剩女就唔好扮 cool，雙方睇人品同性格，比職業更重要。

本週「企」

（干港民攝） 

一直都話，內地無嘢多，人最多！是故蘇州呢間服裝鋪，唔要木架、金屬架，寧願搵來「人肉」架，整番個「人肉 stand」，你就知內地人命何價喇！

金牙大狀講嘢　 689唔係毛主席

689以為自己係毛主席。插圖：祝健中 

官家發出 2,500個白表買居屋許可證，非但居屋價格馬上創下$6,662一呎實用面積之歷史高位，漣漪效應之下，私人屋苑樓價同步攀升亦意料中事。咁顯淺嘅常識道理點解 689同埋佢班蠶蟲師爺諗唔到？
箇中道理一啲都唔難明。 689有言在先，佢會「有膽有識有目標有規劃有步驟」咁「適度有為」，大幹一番。各位， 689呢十七字真言，用乜嘢行頭吖？冇錯啦，就係個膽字啦！佢顯然認為只要夠膽、夠狼，而且目標明確，則其他乜嘢規劃、步驟就自然水到而渠成矣。
689呢個心口掛住個勇字嘅施政手段並非佢自創者，而是師承毛主席之「為有犧牲多壯志，敢教日月換新天」。既然天都換得，白表買居屋壓抑樓價點解唔得先？如果你係毛主席，梗係乜都得啦。但你 689係唔係毛主席呢？照吓鏡啦！唔該！

中環人語迷你版

“我將命運交予港人。”

估中邊個中環人講呢句說話，送你 JWATCH J-37水晶版藍寶石鏡面限量版手錶一隻有意參加者，請於六月二十四日 24:00前將答案電郵 mailto:centralman@nextmedia.com小宗只接受電郵，郵寄免問。

本刊員工及直系親屬不得參加。
為求公平及杜絕偷步搶答起見，請於星期三下午一時後來電郵競猜答案；在此之前發出之電郵作廢。
超過一位讀者估中，先到先得，恕不接受上訴。答案及中獎者姓名將於一三年六月二十七日本欄揭曉。

上週人語揭曉答案

“我哋今日有唔和平咩？”

戴耀廷
得獎者： Lee Far
中獎時間： 1:00pm 12/6/13

廣告時間

你有某財團嘅黑幕想爆？你知邊間上市公司造假？
你仲想舉報地產霸權嘅不公？
歡迎你將財金界嘅寃屈或過癮八卦事，爆俾《壹仔》財經組知，一切報料，均會保密！

爆料熱線/whatsapp:6829 5929