大陸中學生遊學團大 show國旗，喺美國三藩市市政廳外留影。 

壹路向北

暴發族出籠　三十萬強國學生外遊血拼

又到暑假，又係強國父母煩爆安排仔女去邊度玩（大陸新貴嘅字典入面，唔使使錢唔算玩）嘅時候。暴發家長愈來愈多，遊學公司順勢推出超豪華遊學團應市。據內地傳媒引述遊學機構金吉列負責人預計，今年中國學生出國遊學高達三十萬人次。
曾經喺美國納斯達克上市嘅環球天下教育科技集團，就搞咗個名為「天才之旅 TOP名校修學體驗營」，三個禮拜盛惠七萬九千八人仔，行程賣點包括︰紐約 Woodbury Outlets掃貨。

佢哋咁介紹︰「在這裡您可以用比中國至少便宜三分一的價格購買到心儀的 Nike、阿迪達斯、銳步、 Coach、阿瑪尼等名牌商品，價廉物美，保證您有意想不到的收穫。」未完，仲有︰「午餐發放餐費給同學，你可自行購買麥當勞、肯德基或 Burger King店，感受美國本土速食品牌的美味。」
舊年去咗美國？冇相干，今年去歐洲。呢排因為套《中國合伙人》又再出名嘅新東方教育科技集團，就搞咗個名為「縱貫英歐英倫文化與北極圈探秘三週遊學營」，收費四萬三千九。呢團主打吃喝玩樂，因為三個禮拜得兩日參觀大學。
想搞搞新意思？新東方搞咗個東非團（冇錯，係去非洲遊學），名為「肯尼亞、坦桑尼亞快樂發現親子互動成長營」，十日每位盛惠三萬二千九。不過 sorry，叫得「發現親子」活動，一定要父母是但一個陪同，雙計即係六萬五千八。 Well，平過去美國。
Out budget？唯有留喺大陸，參加北京大聰教育搞嘅「夢想北大清華青少年成長訓練夏令營」，十一日收費唔使兩萬蚊，最正就係有禮品︰紀念營服三套、北大同埋清華校徽各一枚等。最後謹此呼籲，出國請勿塗鴉。

內地遊學公司預計，今年中國學生出國遊學高達三十萬人次，總經濟規模將近八十億人仔。 

舊年暑假，有大陸網民喺紐約 Woodbury Outlets影到，十幾個參加遊學團嘅北京小學生踎街食 M記，途人為之側目。 

余杰新書解毒國民教育

舊年出走美國嘅內地異見作家余杰，今個月就會出版新書《解毒國民教育——通往心靈自由的五十本書》。
「讀一本好書，對抗一種邪惡。」余杰將佢喺中國運到美國嘅一大箱書中搵出五十本推薦，並寫成讀後感言俾年輕人，當中不乏王丹嘅《六四回憶錄》、梁慕嫻嘅《我與香港地下黨》等。書中除推介外，更狠狠地批評習近平鍾意讀嘅《中國震撼：一個文明型國家的崛起》同埋《苦難輝煌》是鼓吹民族主義，「唯有垃圾人愛看垃圾書。」
余杰直言：「國民教育問題比普選、二十三條等更加嚴峻！」事關中國青少年正正就係受呢種狼奶教育之害，變成憤青、法西斯主義者。佢讚嘆香港反對國民教育的事件中，反倒是青少年嘅覺醒早於成年人，行動也走在民主派嘅前面，學民思潮嘅黃之鋒小小年紀有如此識見，後生可畏。當睇到佢喺台灣與王丹等前輩學生領袖嘅交往，「有一種斷裂的時空被銜接起來的感覺。」

「我在媒體上看到黃之鋒的訪問等訊息，他小小年紀，就有如此識見，讓我有後生可畏之感，我在他那個年紀，才剛剛覺醒呢！」余杰說。（李育明攝） 

本週圖片

又有淫官一路向西！上個禮拜，中國旅遊與經濟電視台女主播紀英男喺網上有相又有片大踢爆，聲稱被大佢十六年嘅中央檔案局法規司副司長范悅「誘騙」做二奶，之後遭𡁻完鬆。廿六歲美女主播更巨細無遺透露，兩人同居四年以來，曾去 Prada掃廿幾萬人仔名牌，又先後添置奧迪 A5同埋波子 Cayenne，共值超過二百萬人仔。同居初期，淫官更每日俾一萬人仔二奶做零用錢。近日披露影片又顯示，淫官同紀英男及另一女子玩 3P。新華社禮拜一報導，范悅已喺事件曝光後辭職。

（人民監督網創辦人朱瑞峰提供圖片）