樊小姐如今不求道歉，只望甄燊港收口，讓她重過普通人生活。（鄒潔珊攝） 

時事短打

人力高層重提舊事　非禮案苦主挺身反擊

兩年前，人民力量副主席兼前綫召集人甄燊港爆出醜聞，涉嫌非禮女義工被捕，案件經調查後，去年初警方決定不予起訴。事隔一年，甄無故於網上電台重提舊事，更暗示事件有「背後力量」。女事主樊小姐不堪受辱，網上大爆當年案情，更不惜容貌曝光接受訪問，只想甄燊港收口，還自己與家人平靜生活。

今年三月，甄燊港捲入「收共產黨錢」疑雲，他出席香港人網節目《天外有天》時澄清，其間有主持人問及兩年前的非禮案。甄燊港答得隱晦，「非禮案嗰單嘢呢，好多內情係唔講得嘅，不過咁，警方通知我，律政署決定唔起訴我，佢（警方）話縱使起訴，亦都會告唔入。」
言談之間，甄燊港更暗示事件受背後力量操控：「到今時今日，我亦都搞唔清背後嘅力量係乜嘢，雖然我係有猜度一啲，但今日，請大家原諒我，我真係唔適宜再喺度講呢樣嘢……從我私人嚟講，即係我亦都光明正大講俾大家聽，係絕無其事， OK？絕冇非禮！」
非禮案追溯至前年九月，當時正值區議會選舉前夕，甄燊港被揭發涉嫌同年八月中至九月初，六度非禮已婚女義工而被捕，甄當時形容事件乃「政治抹黑」。根據女事主提供的口供紙，甄曾觸及其大腿、胸部及下體。案件交旺角警區重案組跟進，經調查及徵詢法律意見後，甄去年二月獲無條件釋放。

精神科醫生與臨床心理學家的證明書指出，樊因前年曾遭受「 sexual assault（性侵犯）」及「 sexual harassment（性騷擾）」而患上「 Post-traumatic stress disorder（簡稱 PTSD，創傷後壓力症）。 


樊去年二月求醫，須按時服用抗焦慮藥和抗抑鬱藥。

企圖自殺　拒絕覆診

甄燊港堅稱遭人誣衊，直指樊背後有「人渣」慫恿。（江永健攝） 

女事主原名姓樊，前年六月開始為前綫做義工，因而認識甄燊港，後來在甄建議下，正式加入前綫並成為社區幹事，準備參與同年區議會選舉，亦因此經常與他碰面。她向記者講述案發經過時，初時情緒仍然平穩，但講及最「狼」一次非禮過程時，一度要求暫停訪問。她稱，曾先後求助於精神科醫生與臨床心理學家，被確診為創傷後壓力症，須按時服藥及進行心理輔導，「有次我喺屋企，突然之間好𤷪𤺧，諗番起呢件事，覺得好多憤怒，好多怨恨，然後我坐咗喺窗邊……原本我要覆診，但我完全無力行番出去，我已經好攰，嗰陣淨係諗，不如跳咗落去算數啦……」後來診所護士來電，才阻止不幸事件發生。直至去年八月，她的情緒才告穩定，停止治療。
然而，樊的情緒再因甄燊港而起變化。她在 Facebook上看到朋友轉貼甄的節目，好奇之下收聽，卻聽到他重提非禮案，既愕然又憤怒，「我一路聽晒兩個幾鐘，當中無諗過會有我自己嘅嘢……」樊當晚失眠，之後情緒變得不穩定，不但發噩夢，更曾試過無故落淚。

要求與甄當面對質

甄燊港三月底出席網台節目《天外有天》，其間提及非禮事件，稱「搞唔清背後嘅力量係乜嘢」，暗示有人在幕後操控事件。

樊向記者談起該節目內容，強調自己並無所謂「背後力量」，愈說愈激動，「你（甄燊港）個動機究竟係咪真係想我死？我死咗對你有咩好處？」她曾在 Facebook發炮，要求甄與她當面對質，更將自己描述當年案情的聲帶放上 Youtube，決意公開一切，更不惜現真身接受訪問，「我無嘢希望，我唔需要佢道歉，唔需要佢承認，俾番我過普通人嘅生活，已經好足夠……點解我寧願出埋自己個樣，都要講件事出嚟，就係學佢話齋，做人最緊要正直，我講緊嘅係真話，何妨講出嚟？」被問及丈夫如何支持她時，她一度嗚咽，後來更多次表示欲以性命換回一家安寧，情緒明顯不穩。現時她正向婦女組織尋求協助。
樊的丈夫謝先生談起妻子近期的情況亦顯得憂心忡忡，不斷嘆氣，「佢一個禮拜都有幾次（發噩夢），成日扎醒，有時佢會嗌，仲會喊，喊到我都醒咗。」他感到自己與妻子再被「侵犯」，亦不知如何幫助妻子，「有時我做做吓嘢都會諗，點解會搞成咁，好似無啦啦被人追殺，但受到傷害嗰個係我老婆呀……」
甄燊港對本刊堅稱非禮案純屬誣衊，並再三強調樊背後有人慫恿，直指「有人」是前人民力量成員，「我仍然只係覺得，後面慫恿佢嗰啲人，嗰啲先係人渣！」他又稱節目內只是「被迫答一兩句」，不想傷害任何人，「如果佢怪我喺《天外有天》嗰次（發言），咁你話我甄燊港向佢道歉……我都希望佢好好哋生活，我都祝佢好運，但唔好再糾纏不清啦。」

再度傷害　須尋輔導

關注婦女性暴力協會總幹事王秀容指出，由於涉事人已獲無罪釋放，按法理來說，並不能禁止他的言論。但她認為有關情況或會對事主造成「再度傷害」，「一般受害人睇報紙，見到同類個案，會再度勾起被侵犯經歷嘅創傷。如果佢認為傷害過佢嗰個人，又要開口講番件事，當然（創傷）個 intensity（強度）係會更強。」
王秀容表示，一般而言，若受害人遇到「告唔入」的情況，會因尋求不到司法公義而感到耿耿於懷，但若出現情緒不穩，甚至影響生活，則須尋求輔導或治療，「譬如幾年前發生，依家講番，都係會瞓唔到，食唔到嘢，好驚，甚至個腦經常浮現番嗰啲（被侵犯）影像，影響返工、返學，就要搵人幫手。」

撰文：時事組