佔中面對「離地」、「唔入屋」等批評，陳健民（左）學精咗，喺班基層婦女面前賣口乖，話基層嘅抗爭方法好有創意，值得借鏡。（江永健攝） 

八卦陣

陳健民糯米雞佔中

佔領中環一向俾人感覺唔夠入屋，點樣將運動推向基層，佔中三子都相當頭痕。不過首個商討日過後，佔中開始露曙光，一班基層婦女本週日自行開會商討佔中可行性，然後邀請三子之一陳健民到場出席記者會。呢班婦女認為民生問題源於市民冇得揀特首，冇辦法用選票監督政府工作，於是率先表態支持和平佔中行動，咁究竟基層婦女有乜嘢幫到佔中運動呢？

估唔到佔中嘅「物資」之一，竟然係陳健民最愛嘅糯米雞。 

陳健民講笑咁話，如果下年真係要佔中，都要諗吓辦法醫肚，「我諗佔中佔一日都幾肚餓！如果你哋包糯米雞俾我食就好喇！我最鍾意食糯米雞！」此話一出，氹到班師奶不知幾開心，一對巧手原來都有用武之地。
咪睇小基層唔識和平抗爭，陳健民話佢廿幾年前做社工時，第一次參加社會運動，就係一班基層婦女搞嘅。當年政府要拆街市，但部分檔主被列為「非法擺檔」而不獲賠償，之但係政府之前一直收佢哋差餉喎。呢班檔主為咗爭取應有賠償，大條道理繼續「非法」擺檔，有警車嚟嗰時就自動搬晒啲菜上去，去到差館就狂搽白花油，搞到成個差館都好攻鼻，成個行動相當和平理性。當局自知理虧，最後都賠番錢俾所有檔主。陳健民大讚基層嘅抗爭好有創意。

佔中秘書處義工陳玉峰（右）被政治檢控，唔少基層人士話會撐佢撐到底！（江永健攝） 

佔中三子嘅努力並冇白費，港大週一公布首個商討日嘅初步報告顯示，一百名對照組市民重點關注點樣宣傳佔中、提高參加人數；又擔心外間勢力滲入令運動變質，甚至警方最後武力清場同政治檢控；更有市民提出罷市罷課，對抗中共同爪牙嘅施壓同挑釁。呢堆意見同當日在場嗰六百名佔中參與者提出嘅七大議題方向一致，睇嚟佔中冇走錯路。

肉麻鄭國漢：要做學生爸爸

嶺南大學校長陳玉樹因病辭職，任期今年九月結束，由陳智思擔任主席嘅遴選委員會，推薦「梁粉」鄭國漢成為唯一候選人接任校長，被外界質疑係咪梁振英收編學術界嘅政治任務。
三百幾個嶺大學生、教職員、校友帶住滿腦子疑問，本週一「坐爆」諮詢會，逼校方撤回人選，公開遴選制度，否則九月開學罷課抗爭到底。現年六十歲嘅鄭國漢係科技大學商學院院長，佢自稱係保護學術自由嘅守護神，又承諾唔公開評論政治議題，仲話當正五千幾個學生係仔女一樣看待，學生梗係唔受落，話晒同阿鄭生唔係太熟，未做校長已走溫情路線令人打晒冷震。
諮詢會完結後，幾十個學生繼續喺場外抗議，身兼校董會主席嘅陳智思聲稱雖然鄭國漢係唯一人選，亦唔代表佢一定做到校長。結果係點？就係順利通過囉！

三百幾個嶺大學生出席遴選校長嘅諮詢會，反對校方委任「梁粉」鄭國漢（小圖）做校長。（梁偉聰攝） 

騎呢奀星狂言護港

中港青社聯本週日舉行反佔中論壇，參加者有一堆奀星，包括劉少君（右一）、李健（左二）、吳啟龍（左一），梁美芬（左四）同林煥光（右三）已經相對正常。（江永健攝） 

近期「愛」字行頭嘅組織好似細胞分裂咁愈嚟愈多，好似今年二月先成立嘅騎呢組織「愛中港青年文化社團聯會」，創會主席係民建聯成員楊君豪，副主席係每次出席撐 CY活動都熱血到嚇親人嘅嬸嬸陳玉娥。唔識佢哋唔緊要，事關佢哋搞過幾次愛國論壇，記者永遠都多過支持者，報導多數石沉大海。
本週日佢哋又喺政總搞論壇，出席嘅包括行會召集人林煥光、立法會議員梁美芬，仲有幾個奀星，聲稱代表演藝界出嚟反對佔中喎。究竟呢班「星」有幾出名？原來係喺《真情》扮過郭少芸老公嘅劉少君、 Google都搜尋唔到拍過乜戲嘅李健、自稱「情歌王子」嘅金光，同埋喺《殘酷一叮》入面扮悟空玩呼拉圈唱《這個冬天不太冷》、結果廿六秒俾人叮出局嘅吳啟龍。

唔係話奀星唔可以愛國，不過下次要做足功課。事關佢哋連反對乜嘢都未搞清楚，開口埋口都係反對「佔據香港」同「侵佔中環」，至於「佔領中環」同上述運動有咩分別，劉少君諗咗兩秒，口窒窒咁答︰「總之都係唔啱啦！」查實班奀星同電視台冇約喺身，個個北上搵真銀，為咗出名乜都做，唔爭在擦埋大陸鞋啦。
林煥光同鼠王芬似乎 feel到氣氛唔對路，坐咗十分鐘就藉詞閃咗，唔使獻醜。

劉少君十幾年前已經淡出娛圈，依家喺香港、北京同天津開咗間製作公司做總監。 

李健係婚禮統籌製作總監，當年佢拍過乜嘢電視劇或電影，就完全冇人記得。 

自稱情歌王子嘅金光，廣東話都未讀得正，同王子似乎有一段距離。

嫻姐粉紅 Look　沙田出巡

嫻姐著住條迷人 shocking pink連身短裙出席議辦開幕，獲得街坊大讚「好靚」，身穿橙紅外套嘅林鄭差啲被比下去。（鄒潔珊攝） 

自從葉偉明舊年立法會選舉落敗後，工聯會喺新界東嘅勢力漸減。亡羊補牢，工聯會決定勞煩「德高望重」嘅陳婉嫻出手，首次跳出佢嘅九龍東老巢，喺沙田乙明邨開辦事處，為下屆選舉鋪路。
嫻姐有錢又有面，請到政務司司長林鄭月娥本週日去新辦事處剪綵，為隆重其事，六十七歲嘅嫻姐一改平日素色打扮，換咗套熒光粉紅 one piece短裙出場，班公公婆婆睇到眼金金，大讚嫻姐「你今日咁靚嘅？未見過你咁著喎，後生咗十幾年！」嫻姐當然心花怒放，仲反問班街坊係咪真係咁省鏡，「以後都咁著好唔好？」
林鄭亦唔輸蝕，當日著咗鮮橙紅套裝，同嫻姐孖公仔咁款喺議辦附近出巡兼派燒肉。嫻姐聲稱自己係超級區議會選出嚟，要服務港九新界市民，所以先喺新東開辦事處，真係信不信由你。有份出席嘅劉皇發見慣大場面，對於嫻姐咁明艷照人都冇乜反應，可能佢個心想快啲返屋企湊孫啩。