二○一三年，是Beyond成立三十周年，也是昔日主音兼結他手黃家駒逝世二十周年。

照常理，Beyond三子黃家強、黃貫中（Paul）和葉世榮，應會藉此重聚跟樂迷一起紀念；

誰料到，官方的紀念活動沒有了，只有家強和阿Paul的不和升級，雙方透過微博隔空開火，擺明車馬唔妥對方……

至於向來是Beyond中最溫文、最平和的世榮，對此事只是說：

「我冇感覺，唔畀意見，講乜都好，我唔想回應，我驚會將件事更加複雜化，

唔想有乜是非，講多錯多，我唔當自己係娛樂圈人。」

畢竟Beyond是香港如此一隊經典的樂隊，今天發展到這樣的地步，難免令人感到欷歔。

就連這個於開火前接受的訪問，世榮亦只是淡淡然的說：「Beyond其實已經解散咗。」

就這樣畫上句號，捨得嗎？

「Beyond當年宣布解散時，我哋已經各自安排咗分開之後要做啲乜，條路點行。

「有捨先有得。人唔可以太貪心！你背負住咁多嘢，唔放低佢，點攞前面嘅嘢？」

世榮說罷，給了我一個很祥和、親切的笑容。

看着看着，我忽然很懷念家駒仍在時的Beyond。

○八年，為紀念家駒四十六歲冥壽，已解散的Beyond三子，難得再上台。

八十年代初成名的Beyond，除了（左起）世榮、家駒、家強和阿Paul外，還有負責結他和鍵琴的劉志遠。

前成員

世榮說，Beyond解散，其實已經是○五年的事。「我哋○三年重組，到○五年係解散。嗰陣有咗呢個打算之後，已經各自安排好晒之後分開要做啲乜，條路要點行。

「依家我世榮，只係前Beyond成員。」

可是，Beyond解散，會否有違背家駒延續音樂的精神？「家駒講過，佢最大嘅夢想，係做世界巡迴演唱會。呢樣嘢，我哋三個响○三年至○五年已經做咗、完成咗。」

決定解散，真的是因為傳聞多年的不和？「有幾不和呢？點解啲人成日都會覺得啲成員分開做嘢，就係不和呢？我哋咁大個人，可以仲有好多發展空間，唔可以好似歌迷希望嗰種，永遠跳跳紥喺度夾band，我哋唔可以只係停留喺嗰個位置呀！」

那你跟家強和阿Paul還是好兄弟嗎？有說你連前年結婚也沒有通知他們啊。「我同佢哋冇嘢，依家仲有聯絡，只係少見面。加上我住咗喺北京十二年，每次返嚟香港都未必會有時間同佢哋見面。

「至於我結婚，我太太係內地人，我喺北京擺酒，都唔方便通知咁多香港朋友。同埋我唔想咁鋪張，請得圈中人嚟，自然會有好多記者，咁會好混亂。本來我打算之後返香港再搞一次婚宴，但我太太有咗，先冇搞到。」

○三年，Beyond重組，演唱會台上，他們把家駒的影像投射到台中央，場面感動。

跟家駒（左一）於八十年代初夾band時，Beyond還未出現，家強還是一身baby fat。

離咗婚

今年是Beyond成立三十周年，又是家駒離世二十周年，外界總會認為Beyond是時候再重組，與樂迷一起紀念。「重組，我諗係啲製作公司最想囉！逢五進一，五、十、十五、二十（年），然後開晒，又賺一筆！真係一個好好嘅商機！（苦笑）

「係，重組可能會賺到啲報道所講嘅數字（千幾二千萬），但事實上唔係咁簡單，我哋要做新歌、要重新建立過默契、要做宣傳，甚至開埋show，前前後後又話兩、三年，跟住又話下一個五年好快到……咁我哋點做到自己嘢？雖然話，有好多唔同年代出世嘅樂迷，都好想睇到Beyond嘅演出，但如果真係要滿足唔同年紀嘅樂迷要求，我哋係咪要八十歲都仲重組緊？一對離咗婚嘅夫婦，冇理由仲會復婚，之後又離婚再復婚，仲要生埋仔o架嘛！

「所以，我世榮，係唔會再參與Beyond任何嘅重組！」

要是其他成員想重組，又可會考慮？「我唔會參與，但亦都唔會反對其他成員重組Beyond。

「Beyond除咗家駒、家強、阿Paul同我之外，其實仲有好多成員。八十年代啱啱起步嗰陣，仲有阿潮（李榮潮，bass手）、William（鄧煒謙，結他手）、Owen（主音結他手）、阿安（陳時安，主音結他手）同劉志遠（結他及鍵琴手），佢哋對於Beyond嚟講都好重要，所以重組，都會關佢哋事！」

黃家駒

不想參與重組，亦因為家駒。「自從家駒離開之後，我哋三個每次上台，我都係喺後面打鼓，阿Paul同家強都係一左一右，中間位置都係空咗出嚟，一係得支咪……呢個感受，我哋三個喺台上最明白，一場show三個幾鐘，要我哋每次都咁樣承受幾個鐘，真係唔好受o架！」

很掛念他嗎？「咁多年到依家，我anytime都會！我仲會成日夢見佢，同冇事一樣，大家一齊夾band、一齊玩。

「最親嘅人同最好嘅朋友離開咗，呢個心情永遠都唔會平伏到o架！」

始終，他和家駒的交情不止於Beyond。「我最懷念啱啱識佢嗰段時間，嗰陣連Beyond都未有。」

八一年，還在就讀中六的世榮，經一名bass手朋友介紹下，在土瓜灣一間琴行認識了家駒。「我嗰陣喺大坑返學，記得有次食晏，我走咗去銅鑼灣通利，陪佢買結他，佢就買咗支紅色Fender！」

後來，世榮投身社會，在保險公司任職商業保險經紀，入職不久便介紹家駒做自己的同事。「佢本來做緊製衣廠嘅布料買手，但係我覺得佢份工發展空間唔大，就介紹佢嚟我公司做。份工好自由，好多時我哋朝早返咗公司，晏晝就會返屋企彈結他！哈哈！

「我哋嗰陣都有同另外兩個人夾咗隊band，參加過比賽；後尾人事變動，我哋兩個就同阿潮、William組過另一隊band，William就改咗Beyond呢個名。跟住阿Paul同家強再加入，我哋簽埋經理人，就開始全職玩band。」

再後來，更有「二樓後座」成為了他們的band房。「嗰度本來係我阿嫲住，後尾阿嫲過咗身，我哋就用嚟做band房。」

豬肉榮

世榮現在已長居北京，他說，要不是○一年推出過一張個人大碟《美麗的時光機器》，他大概也不會轉攻內地。

「我喺Beyond三子時期，為咗唱和音，學過三年唱歌。○一年出碟，發覺我喺做主音方面嘅經驗太少，而且呢張碟亦都好難聽！就係咁，我好想攞多啲做主音嘅演出經驗，諗到內地會有比較多呢啲機會，就由深圳開始，大大小小嘅演出場地都去毛遂自薦，跟住就開始愈唱愈北。」

除了登台演出，他也會做音樂幕後，以及培育新人。「我依家係知天命之年（五十歲），人生第一個三十年，已經喺Beyond裏面奮鬥過；下個三十年，我好想畀番自己，做自己嘢，人生無常，有夢想都應該要去實行。」

不怕外界會把你的人生上、下半場作比較嗎？「我話你聽，就算我今日轉咗行喺街市賣豬肉，啲人見到我，都會話：『Beyond嘅世榮呀，畀斤豬肉我吖！』Beyond係我嘅歷史，點搣啫？除非我去非洲隱姓埋名啫，哈哈！」

可是，Beyond曾經有首歌叫〈Amani〉（非洲語，和平的意思。）呀！「係喎！真係抹唔甩！哈哈哈！」

世榮說，現在盡可能不會跟家強或阿Paul再合作。「最近同家強喺《勁歌》合照，啲人都會諗起Beyond。」

最近推出新歌《薪火相傳》，致家駒的；七月會舉行歌迷聚會，唱Heavy Metal！「我啲火都放喺音樂度。」

薪火相傳

的確，有捨才有得。

今天的世榮，放下了Beyond成員的身份，卻肩負起薪火相傳的使命。

一一年十二月，他跟內地模特兒張偉玲拉埋天窗，彼此年紀相差廿二年，曾惹來外界一些閒話。「依家係我娶老婆，又唔係人哋娶，我同我老婆覺得OK咪得囉！」

結婚前可有告訴已故前妻許韻珊（冥婚妻子）？「有！我同太太都有去拜佢，同佢講聲。我覺得有需要o架！同埋，我覺得佢見到我依家幸福，佢都會開心囉！」

去年中，他更初為人父，女兒葉凱淇本月底也一歲了。「佢預早咗成兩、三個星期出世，嗰陣我飛緊去第二度做嘢，一落機就收到電話……睇唔到佢出世，係有啲遺憾，陪唔到我老婆生，又有啲慚愧。」

事隔一個星期，他回到家，才看到正在熟睡的女兒。「睇到佢瞓喺張牀仔度，我好感動！感動到我眼濕濕！佢對眼好似我，身形同皮膚都好似媽咪，好靚女，白白淨咁，覺得好奇妙！」

現在女兒正在出牙仔，學企學行中，最愛呱呱嘈。「佢好有中氣，成日大嗌，仲要嗌好耐唔停；有次食飯，佢嗌到嚇親隔籬枱兩個小朋友！哈哈哈！佢節奏感都幾好，聽到Gangnam Style會手舞足蹈，我諗我可以教佢打鼓！哈哈！」

這個使命，就是世榮的人生下半場。

○二年，女友許韻珊離世，世榮陪她走最後一程，現已視她為前妻。

前年十二月，他迎娶內地模特兒張偉玲，雖然年紀相差廿二年，但彼此溝通得很好。

去年六月，世榮初為人父，抱着女兒葉凱淇，他一臉幸福。