當記者步入 Tommy父母的家就被 6至 7隻狗包圍,但 Martin卻因為怕陌生人,所以只躲在遠處觀看。 

Petbook

助小黑狗搵好歸宿

雖然有好多無良主人遺棄寵物,但有愛心人也大有人在,如在元朗經營寵物店的阿詩,四圍救狗,並為牠們找好歸宿。最近阿詩救了隻有 4、 5個月大的小黑狗 Martin,幫牠治理傷勢,及找到熟客 Tommy的父母收養牠。阿詩希望所有人養寵物前要三思,要做一個負責任的主人,便可減少狗狗被遺棄、流落街頭的悲慘命運。

 


這是阿詩剛剛抱 Martin回店並替牠洗完澡後的情況,「要即時同佢清潔,以免受細菌感染。」 

訪問當日,記者去到流水響,甫踏入 Tommy父母的村屋家門,已被 6、 7隻狗狗包圍,幸好 Tommy出來迎接,記者才放鬆下來, Tommy說:「唔使驚,佢哋唔會亂咬人,放心行入嚟啦,有我喺度佢哋唔會咬你㗎。呢度唔似屋邨,唔會有保安看門口,所以我父母會養唐狗嚟看吓門口,防止有賊入屋偷嘢。」
任職警察的 Tommy現雖不與父母同住,但每星期放假都會來探望他們,所以這裏的狗狗都很聽他話,「呢度係偏遠咗啲,但勝在地方夠大,狗狗可以通山跑,活動空間夠晒大,所以佢哋特別粗生,好少話病,比城市狗更健康。」
當 Tommy拿起狗零食,原本圍着記者的狗狗便一窩蜂的跑向他身邊,除了其中的一隻小黑狗 Martin,牠沒有跑向 Tommy,反而走向另一邊的草叢,看似很怕陌生人,「 Martin身世好慘,所以見到陌生人會驚,平時佢唔係咁,好鍾意同人玩。」

父母收養被棄唐狗

Tommy父母的家中養了 11隻狗,當中 5隻是收養回來的,而 Martin便是最近加入的成員,「我係《寵物宅》嘅常客,平時會帶屋企隻史納莎去沖涼同剪毛,我知老闆阿詩會幫被遺棄嘅寵物搵主人,咁啱喺 4月尾從阿詩口中得知有一隻唐狗待領,我見父母平時都會收養人哋唔要嘅唐狗,早 2、 3個月佢哋都收養咗 4隻附近車房唔要嘅唐狗,所以就問佢哋會唔會收養埋 Martin,父母聽到佢咁可憐就一口答應收養佢。」
自細離開媽媽流浪,啱啱執番嚟嗰時個頭同啲手腳受晒傷, Martin在 Tommy父母家中住了約 1個月,已適應了這裏的生活,全因《寵物宅》老闆阿詩在 Martin受傷期間的悉心照顧,令牠可以脫離生命危險,還得到有心人領養。


Tommy的父親(成哥),母(琼姐)收養了 Martin個多月, Martin開始適應這裏的生活,有時會跟其他狗狗玩耍。 

Tommy父母的家很大,給予狗狗們足夠的空間走動,身體特別健康。 

Martin很喜歡跟 Tommy玩,因為他經常會餵牠吃零食。

散步遇到被襲小黑狗

阿詩說:「今年 4月,我喺元朗同朋友散步時,突然聽到有狗嘅打鬥聲,跟住就見到有 3、 4隻狗圍住一隻黑色嘅狗仔嚟打,我見到就立即上前嚇走嗰幾隻狗,隻黑色狗好細隻,可能得 4個月大,手手腳腳俾班狗咬到流晒血,個頭仲穿咗 3個窿,咁落去佢好可能會死,由於佢好驚人,我都埋唔到佢身。」
之後阿詩叫朋友去買些狗零食回來,成功減低 Martin的戒心,「我用零食餵佢,佢好快就食晒,對我嘅戒心都低咗,於是我用毛巾包住佢拎返鋪頭,幫佢洗傷口同沖涼。我曾經遇過一隻狗又係個頭穿咗窿,但發現得太遲,佢俾烏蠅蟲咬大咗個傷口,直頭見到個腦,最後救唔番,我好怕 Martin會變成咁,所以第一時間幫佢消毒,好彩佢傷口算細,結果冇事。見到佢𠵱家喺 Tommy父母度生活得咁開心,我都好滿足。」


對流浪貓狗甚有愛心的阿詩,在店內設有義賣貨架,並把賣到的錢全部用作捐助流浪貓狗糧食及絕育用途。 

阿詩是《寵物宅》的老闆,平時除了賣寵物用品、提供寵物美容及住宿外,還會收養被遺棄的狗隻,並替牠們尋找新主人, Martin的個案令她最為深刻。 

拉布拉多犬待領


姓名:冬甩(已絕育)品種:拉布拉多犬年齡: 1歲姓別:女 

約 1個月前入住阿詩的狗酒店,主人最後沒有回來,將牠遺棄了。阿詩現正為牠找尋新主人,「我接收過 100隻狗狗,當中超過一半係啲主人因為甩拖或者要結婚生仔而唔要隻狗,我希望大家知道狗狗可能只係佔你人生嘅 5分之 1,但你就係狗狗嘅一生,所以養狗前請諗清楚要負責任,唔好話養養吓唔養。」

待領查詢:《寵物宅》
地址:元朗上章圍 250號
電話: 2479 9999


撰文:何倬然
攝影:彭自維
部分圖片由被訪者提供

arrow
arrow
    全站熱搜

    tvb4life 發表在 痞客邦 留言(0) 人氣()