今日好玩嘢

日本最紅　熊本熊

6、 7月飛日本機位爆到喊，人人都儲足彈藥準備一次過去掃射，不過記住咪掃錯隔籬堆 Hello Kitty、 EVA或者 One Piece，事關𠵱家日本最紅嘅卡通人物，必數呢隻來自九州熊本縣嘅吉祥物 Kumamon熊本熊，唔買番隻，真係咪話畀人知你去完日本呀！
點解呢隻住喺熊本城嘅黑熊可以紅成咁？其實佢自從 2年前出任「熊本縣營業部長」之後，鬼咁勤力，四圍現身宣傳。唔只咁，佢仲開放個熊樣畀人自由做 product，卒之成功搞到全日本都見到佢個熊樣，日本全國卡通吉祥物，都以佢熊首是瞻！

熊本熊係乜水？

熊本熊 Kumamon，日文音係【 Cool麻忘】，去到日本咪諗錯！
佢本身為宣傳 2011年通車嘅九州新幹線之吉祥物，所以生日日期同通車日期一樣，係 2011年 3月 12日。後來熊本縣委任咗熊本熊做「熊本縣營業部長」，經常周圍去宣傳九州，咁勤力，終於出世第一年已經奪得全日本地方吉祥物大獎第一名！

原來熊本熊好鍾意跳健身操，仲拍埋片放上網。快啲睇定條片，下次撞到佢，就識一齊跳啦！網址： http://www.youtube.com/watch?v=mBN_FzDCA2k

佢個官網，仲有埋 Wallpaper、大量靚相畀粉絲 download，即睇！網址： http://kumamon-official.jp

因乜解究熊成咁？

作為吉祥物，熊本熊真係非常勤力！幾乎日日去到唔同地方現熊身，但出巡得嚟仲好「玩得」，同小學生種植、賣粟米、坐人力車，畀人感覺極之活生生。呢隻熊唔只 cute，當地政府都好出力 sell。九州政府免去熊本熊的肖像費，只要肖像係用於宣傳熊本縣、推廣熊本縣產品或者採用熊本縣產物造嘅商品，都可以免費申請用佢個熊頭，成功令熊本熊產物出到成行成市，而呢隻肥黑熊亦因此紅爆。記者同事 4月去九州，真係十步一熊，呢種拋磚引玉的宣傳手法，真係值得學習！

全日本熊蹤處處

熊本縣的天子水公園搞咗個菖蒲祭，熊本熊勁鬼馬咁走去坐人力車。

去學校出席種植活動，熊本熊仲落手落腳同小學生一齊種，好抵錫！

到福岡的山鹿觀光物產展，成功爭取電視台採訪，熊本熊仲出力幫手 sell粟米。

去熊本玩，必到阿蘇火山！上到火山口，你就可以見到全國唯一一隻 cosplay成熊仙人 look的 Kumamon，支仙人棒係咪好似龜仙人呢？

熊風手信
夾公仔係佢、買手信係佢，想飲杯日本梅酒都有熊仔版揀。

出沒相機
熊本熊出沒注意！呢款貼紙相機 app〈 Kumamon Kasha〉，有 38種 sticker任扭任拉，去九州玩影相放 FB必用！

iOS/ free

熊 X貓攻港

Kumamon喺日本咁紅，但喺香港人氣先開始起步。所以殺入香港第一波，就係搵嚟精品元祖級人馬 Kitty姐，同埋 fashion界紅牌 Ne-Net貓搞聯乘，帶旺人氣。好似 crossover Hello Kitty咁，就主打精品為主，精品店老闆都話估唔到咁好賣，下個月準備再入一批新貨。而同 Ne-Net貓嘅聯乘，變身布袋熊夾係日本雜誌一齊買書送袋，幫 Kumamon打造潮味。

熊．貓手挽袋正面：個袋其實好大個，擺三、四十本《 FACE》都冇問題。熊頭圖案仲內有間隔，幾實用。

背面

買雜誌套裝除咗送布袋，仲有埋個筆袋。布袋一面係 Kumamon，一面係 Ne-Net，勝在兩隻卡通人物都咁大隻。$178（ b）

熊抱哈囉咪咪手掌咁大嘅 Kumamon攬實 Kitty，勁 sweet！$268（ a）

文房六寶日本入口嘅呢 set Kumamon文具套裝，雖然貴少少，不過個 packing夠晒靚，好有日本味！$200（ c）

打開包裝，一套 6件文具，其實都幾抵。

日本 nya-shop.net仲有同系列聯乘熊貓 tee。（男/女 size各 2,940日圓，可找日本代拍店購買，約$300。）

大頭散紙包呢個 Kumamon散紙包脹卜卜，仲毛茸茸，真係 cute到暈！$68（ d）

背面大大隻字 Kumamon，內籠嘅布同鬆弛熊一樣係波點款，卡嘩兒！

雜誌本身就係講九州旅遊同 Kumamon商品，仲有 Ne-Net貓布偶同 Kumamon四圍合照。

shop list

（ a）卡通天地 2308 1552
（ b）宇宙船 2882 8308
（ c）日本書蟲 9166 0211
（ d） JAP-PON 6464 2757

吉祥物總選舉

日本乜都選得一餐，熊本熊同日本各區吉祥物（日本人稱為 YuruKyara/鬆弛系卡通人物）亦搞過「鬆弛角色格蘭披治 GP」全國總選（每年 8月舉行）。 Kumamon係 2011年度冠軍， 12年有 864隻吉祥物參選， Kumamon已讓出第一位寶座，即睇出爐三甲！(網址： http://www.yurugp.jp )