面對面
保護色 周麗淇
約了下午 3時做訪問，一到現場，見到周麗淇四處找尋她點了的餐蛋治。反正時間多的是，打算做好心讓她食個麵包才開始訪問，點知瘦到似一推就跌的周麗淇，一口拒絕。
「工作時工作，但一停機我好玩得，同打燈搭景的幕後都可以玩埋一堆，所以咁多年都好少關於我同人不和的新聞。」
自認世界 friend，難怪現時的朋友圈子包括住緊幾億大屋的甘比。
「我同佢識了十幾年，當時佢仲未係𠵱家咁㗎，唔通我有預知能力咩？」沒有預知能力，但周麗淇的防護能力的確高。
入行 14年，她仍然對記者充滿戒心，高度設防。唔願提前度鄭嘉穎，否認同紗廠太子係情侶，連提起由記者變闊太的甘比，她亦煞有介事急急扯開話題…… 33歲周麗淇最肯花口水傾的，是工作。係喎，新劇《好心作怪》熱播中，貴為女主角無論有多不願都要對住記者傾足幾粒鐘。
想撩周麗淇拉高肚皮同你講心事？得，除非你是甘比。
同嘉穎冇事啦
在搜尋器打「周麗淇緋聞」 5個字， 8成以上結果出現「鄭嘉穎」。入行 14年，周麗淇緋聞不多，的確只有 03年撻着、 08年被佘詩曼撬牆腳的鄭嘉穎印象最深。提起前度，對住記者問題諗過度過的周麗淇，答得更小心。
「我冇公開過，在我口中亦從來冇講過 yes或 no，係大家自己不停討論。」
有傳因為姣佘介入拆散 5年情，男友偷食喎，分手仲唔數臭佢？
「都過了咁多年，當時唔承認又唔否認，呢刻更加冇理由搬出來再講。始終感情事會牽涉另一個人，唔係得我自己，或者人哋現時有自己諗法呢！無論分了手好、拍緊拖好，我都有責任去顧及他人感受。
「要好自私地去做一件事，唔係我性格，我好 care我身邊人、我錫的人，未必係好事，但我個人係咁，我唔想佢哋受到不必要的傷害，無論係文字上定生活上。」
鄭嘉穎仍然屬於「錫的人」範圍之內？
「我同佢冇事啦，作為同事，或者一個合作過多次的人，我都希望佢好。如果在橫店見到面，都會打個招呼。（會同枱食飯嗎？）有時間咪食囉，不過我應該都冇時間喇！」
答得大方得體，但我相信，整段答案的最後一句，才是周麗淇心入面真正想法。
家姐周汶錡去年 9月與法男 Julien拉埋天窗，周麗淇同父母專誠飛去康城出席。 
與甘比是閨中密友，有幾密？「牽涉到人哋嘅嘢，我唔講咁多喇！」係嘅係嘅，唔想講無謂勉強。 
03年拍第一套 TVB劇《翡翠戀曲》，亦是第一次與鄭嘉穎演情侶。假戲真做，可惜 08年被佘詩曼介入， 5年地下情玩完。
資料錯對象啱
新劇《好心作怪》入面，分別同 Bosco、三哥都有激咀戲，周麗淇話，係佢拍劇以來最搏一次。
花心前度不值一提，現任紗廠太子爺男友肯講吧？據報道，周麗淇與紗廠太子 Eric10年撻着，因對方父母棒打鴛鴦被迫分手，但去年底又復合。
「我只想講，關於這單新聞，好多資料都係錯，但我唔想澄清，雜誌鍾意寫就寫，我同佢知道唔係就可以？」
資料有錯，但對象冇錯吧？
「我可以話你聽，我呢刻真係冇拍拖。同佢係朋友，冇特別話要有任何關係住，因為我自己都有好多諗法，事業上又好，心態上都係，好多事要諗清楚先！」
以為終於撬得開周麗淇把口，點知原來從未放鬆戒備，感性兩秒後轉頭又落閘否認同紗廠太子拍過拖。
「我乜都冇講過呀！感情事我一直都好低調，到有日搵到真正 Mr. Right，我就會公開！近年我發現到自己有咩問題，就係揀對象要求太高！我唔想因為其他人叫我快點嫁而嫁，我唔想將來後悔，所以畀時間我睇清楚諗清楚先啦！我諗我好有機會係冇經過拍拖就宣布結婚的人！」
愈問愈唔答你
試過被拍到與紗廠太子 Eric Cheuk出街食飯，男方又曾上周麗淇貝沙灣屋企過夜，多次斷正都唔肯認。
在香港娛樂圈，有資格絕口不提感情事的，肯定要有一定分量，例如劉華；偏偏周麗淇有本事唔靠緋聞，但又成功爭取報章雜誌版位。
「曾經有人提議我用感情做宣傳，但我性格唔係咁，私人事唔想同公眾分享，你愈想知我就愈唔講，你愈係日日問我，我就愈唔答你！好在我唔需要靠炒作都有今日成績，我算好好彩！」
講彩數，又實在沒有太多人如周麗淇幸運，冇後台冇老闆開條大喉射住，最多只有一個早她幾年入行做女模的家姐周汶錡。
「家姐冇幫過我入行，佢根本唔識呢行的人， model界同娛樂圈，當年完全係兩個圈子，只不過現時大家都出現在娛樂版，讀者先會混淆。原本我打算繼續讀書，唔知點解行緊街俾人發掘，同謝霆鋒拍了第一個可樂廣告，發現做 model原來搵咁多錢（ 99年拍可樂廣告有 10萬酬勞）！後來不斷有人搵我拍戲，不過我當時冇興趣，一直推推推，直至馬偉豪搵我拍《百份百感覺 2》。我記得我孭個背囊上去 casting，鄭保瑞一見到我就話『你同陳曉東、楊千嬅、容祖兒、陳奕迅一齊拍啦！』嘩，個個都好紅，得我一個新人傻下傻下！」
傻人有傻福，無心入行反而愈行愈順，頭 1年入影圈已接了 4部戲， 03年又得到無綫監製王心慰賞識，拍了第 1齣電視劇《翡翠戀曲》，入到觀眾屋之餘，亦入埋鄭嘉穎間村屋。
「我唔係 TVB出身，好多監製都係原本唔識，但唔知點解佢哋好眷顧我，主動搵我合作。我最記得添哥（李添勝）搵我拍《我的如意狼君》，當時我有合約風波拍唔到，但添哥竟然公開話會等我，我同佢見過一次面，佢同我講『冇事係解決唔到，呢個角色一定要你做，否則我寧願唔拍，你返去睇睇度唔度到期畀我！』好在我同 bma得番幾個星期約，最後都放我走！」
鍾意福將呢個名
開口埋口「唔知點解」的周麗淇，其實心知點解。不斷有監製開劇捧做女主角，原因簡單不過：周麗淇，就是收視保證，比很多視后（包括鄧萃雯）更有資格稱得上是「福將」。
「哈哈，我好鍾意『福將』呢個名！上次《女警愛作戰》一早被 TVB賣埠，心諗『死梗喇，隔成年先播，有 20點都偷笑』，點知又 OK喎，都有 30幾點！今次呢套《好心作怪》，唔知去唔去到 40，不過我同 Bosco、三哥一人 10點，起碼有 30點！（實情首集平均收 24點、最高 25點）」
過氣情敵佘詩曼，一度亦是無綫「福將」，不過姣佘現時已北望神州，同鄭嘉穎一齊賺人仔。三角關係過了 5年依然大把是非，最新鮮熱辣是有傳周麗淇爭贏姣佘，接拍劉家豪梅小青監製的內地劇《大漢賢后衞子夫》。
「內地一直都有人搵我拍劇，但個期唔夾，我又同嗰幾個單位唔熟，所以推唔少；今次係家豪哥親自聯絡我，我見個期可以就到，之前家豪哥同小青姐又好照顧我，我咪接囉！而且我新簽俾小齊間《大岳文化》，嚟緊會着重內地市場較多，今年又會出國語碟。至於錢方面，我其實唔太緊張，反正一向都唔差！」
05年憑《秀才遇着兵》得到 TVB「飛躍進步女藝員」，焦點唔係身旁的池珍熙，而係周麗淇唧極唔出的眼淚。 
與謝霆鋒拍的可樂廣告，盛傳當時仍然讀緊書的周麗淇有 10萬落袋。
慢熱
周麗淇很慢熱。慢到訪問的頭 15分鐘，依然是問一句答半句。
去年有報道指周麗淇小腿生瘤，原本打算問候一下兼乘機打開話題，估唔到她說：「隻腳冇事，唔使覆診。」大大盆冷水照頭淋。
螢幕上的周麗淇，唔係大笑姑婆，就係小鳥依人；現實中的她，卻強悍又寡言，冷靜兼慢熱，想博周麗淇對你甜蜜如軟糖？得，除非你是紗廠太子。
撰文：湯勵貞
攝影：范仲良
化妝： Navi Lam
髮型： Debby Kwan@Hair
場地提供： Hair@CWB
服裝： Helmut Lang， Ilaria Nistri, MMM， IRO@I.T
配飾： Just Gold， Philip Stein
留言列表
