梁柏堅表示已經將〈亞牛〉歌詞畀咗陳奕迅，但估計他不會公開唱，他又說梁班子政府個個月都出事，大把嘢寫。
搜尋氣
惡搞「牛丸」歌 詞神梁柏堅：粗口係廣東話精髓
惡搞歌〈如果李慧琼〉玩到變神曲，搞事源頭就是資深填詞人梁柏堅，惡搞過〈富士山下〉變成〈富士康下〉、〈陀飛輪〉改成〈窮飛輪〉，最新神曲是講牛丸冇牛肉的〈亞牛〉，在討論區瘋傳。
其實正職做銀行的 37歲梁柏堅，填詞只是副業，作品有陳慧琳的〈點心〉、容祖兒即將派台新歌〈七不思議〉等，但他慨嘆現今做填詞人好難撈，最慘係為討好內地要自我審查，連詞神 Wyman都逃唔過被改寫命運。
梁柏堅為陳慧琳寫的〈點心〉都抵死啜核，將 Kelly一對囝囝填進詞內「我看着那蒸包一個……你注定與蝦餃一對」。
〈如果李慧琼〉係喺搭港鐵時候寫嘅，寫嚟只係玩吓，寫咗幾句諗住畀小克駁落去，點知 Wyman駁埋一份。而〈亞牛〉係因為有人將牛丸冇牛肉呢單嘢填咗首〈如果這是牛〉，我覺得用隻有牛字嘅歌啱啲，自然就用咗 Eason首〈阿牛〉。
首歌有粗口，粗口係廣東話精髓，可以好粗鄙又可以好搞笑！譬如牛丸、譬如元秋（蔣麗芸），你一見到佢就想講粗口啦！
𠵱家做填詞人首先要識押韻，但好難入行，要識人先得，填詞費幾千蚊囉，有時歌手趕住出碟但欠一隻歌， 3日時間要交貨，有時又會俾人彈回頭，好多時胎死腹中連歌星係邊個都未知；俾人改幾粒字更加唔奇，有時驚過唔到大陸市場呀，自我審查一定有。 Wyman直情試過俾人抽起幾句，搵第二個寫過，咁佢可以點？填詞人呢行好難撈，林敏驄九十年代已話係夕陽工業啦，做副業就 ok嘅！改詞最緊要緊貼時事，例如「低調通緝」、「內交」咁，我都要跟貼啲。
〈亞牛〉牛亦信（節錄）
填詞：梁柏堅
一盤肥牛
黑沉沉膠流流一盤肥油
可恨在是我點一盤肥牛
擺明流唔要罷就係咪咁低手
肉丸一粒 早已將 賤肉去轉嫁別人
我說 別生吞 仍能加重味精去賣人
臭肉雜肉 裡面唔知幾斤
拿來賣 你尚有餘的惻隱
憐憫 你用低手搵笨
不緊要 貴鋪就嚟含 X
好貪心 人人都貪心
連牛丸都昆 呃你兩三蚊
不甘心
明明嗰幾蚊 就是不甘心
今次我好滾 我點 X樣忍
〈相約中環〉（節錄）
改自〈相愛很難〉
填詞：梁柏堅
佔領呢個中環
就源在其實中方佢有佢寄望 特首辦
振英靠西環
受太大的禮做特首 佢會全力歸還
你想搵佢攀談
又唔願提及起點 再要過五年 前途黯淡
我等到生癌
又撻訂 七老八十 都要再等大陸歡顏
陳淑莊本週舉行 7場《出得嚟環》，也找來梁柏堅度稿及寫詞，以佔中為主題將〈相愛很難〉改為〈相約中環〉。
接極都有
〈如果李慧琼〉未玩夠，梁柏堅接受訪問時又彈出幾句講佔領中環，叫大家接落去：「如果戴耀廷，佔中搞禿鷹，黃之鋒都撐，直接上北京……」。
留言列表
