於北角康宏理財返工， Rocky放工後會搭港鐵去鰂魚涌 Fitness First操肌。
真面目 求愛大作戰
求愛大作戰 話題王 《求愛》盛男大追蹤 大隻 Rocky搞喊女
週一（ 10日）首播的真人騷節目《求愛大作戰》，由 8位唔同背景的港男做主角，力追 5位單身港女。
一班盛男中有富二代、博士生、夜場 DJ甚至處男，不乏有錢有學歷男士，不過當中最搶鏡的，則算係由二百幾磅大肥仔激減變大隻仔的 Rocky。早前本刊踢爆 Rocky BB勁多女埋身，上週六（ 8日）《求愛大作戰》記招舉行期間， Rocky BB竟然當眾搞喊疑似女友，事後仲由得對方喊住自己走。對女咁絕情， Rocky好難溝到女喎！
英國留學、任職康宏理財首席顧問的 29歲 Rocky，由大肥仔變成擁有 8嚿腹肌的大隻仔，而且表演慾超強，經常自動波騷肌冧女，又曾在 facebook讚自己身形拍得住張家輝！
操 fit後的 Rocky非常自戀，最近更將谷肌相放上 Instagram任人睇。 
記招上最多人撐場的 Rocky，連影大合照都有得企中間位。
唔認有女
自稱現時冇拖拍 dry爆，生活十分規律，每日放工後健身。不過本刊發現 Rocky的 fb有大量攬女相，張張攬腰頭貼頭。
上週六（ 8日），《求愛大作戰》在尖沙咀舉行記招，有數十個朋友撐場的 Rocky，全場表現風騷，活動尾聲時， Rocky突然離開大隊行落台，與一名身穿背心短花裙的長髮索女傾密偈，但最離奇係長髮女竟然傾到喊，而 Rocky則一臉無奈，不斷安撫對方。當記者上前影相時， Rocky即望鏡變臉大笑，反而長髮女反應唔切，眼腫腫呆企。
疑似女友
長髮女扁晒嘴一副慘樣對住 Rocky，又不停用紙巾抹眼淚，而 Rocky就頭耷耷唔敢正眼望對方，唔通做錯嘢要解話？
'03肥腫難分
'13fit爆踩車
上週三（ 5日）， Rocky獨自到鰂魚涌做 gym，一邊踩單車一邊㩒電話，好忙喎！
配對失敗
人緣唔錯的 Rocky，收工後不時約埋同事食飯吹水，不過全男班齋咗啲喎！
Rocky拍片 sell自己
上年《盛女愛作戰》爆出，今年 TVB再次添食玩盛男，新節目《求愛大作戰》以真人騷形式進行， 8個唔同年齡唔同背景的港男要與 5名單身港女進行配對，而節目週一(10日)開始一連 3星期播出。
勁識冧女的大隻仔 Rocky，在記招上熊抱節目編導岑應，難怪可以由頭帶到尾，更成功殺入四強，可以豪飛峇里拍外景。為增加人氣與曝光， Rocky與另一位大隻參盛男、 31歲 I.T人 Cyrus搞了網站「 WECANDOIT.hk」，入面除了不停宣傳《求愛大作戰》外，兩人又拍片力谷私人「 after show」，呼籲觀眾睇完節目後上網站留言，更自爆會有盛男內幕！出咁多力撐自己，睇嚟佢兩個真係好想入行！
記招上主動抱起編導岑應（左圖），想唔帶 Rocky去峇里拍四強外景（右圖）都唔得啦！ 
Rocky（左）同 Cyrus（右）谷晒肌拍片叫人撐自己，可惜網站只得 3百幾人 like，少咗啲囉！
再溝 Cicibaby 最靚仔 Vincent深圳溝女
Rocky最大隻，至於 8位盛男中最靚仔嘅，就係高學歷、高薪厚職及高大身形過六呎的 Vincent，在節目中被封為「英國紳士」。他於英國長大及讀書，拍過 5、 6次拖的 Vincent 38歲，以前女友全是 ABC或外國人，不過回流香港 3年，做了多年 dry爆盛男的他，連口味都回歸東方。
本刊週日（ 9日）發現家住灣仔的 Vincent，下午一支公趕頭趕命咁由灣仔坐港鐵去深圳會展中心睇車展，不過見佢喺車展行咗一陣又坐深圳地鐵轉場去附近商場星巴克，冇耐就有兩個北方佳麗赴約，睇落兩女同 Vincent係第一次見，雖然開頭三人表現生疏，之後 Vincent表現健談兼風趣，仲叫兩女記住星期一睇《求愛大作戰》添，睇嚟 Vincent真係當自己明星咁 sell喎！
週日（ 9日）見 Vincent一個急急腳趕上深圳，原本以為係心急睇車展，點知車展只不過係前菜，之後約會兩位北方佳麗歎茶先係重點。 
北上花 50蚊人仔睇車展的 Vincent，全程𥄫女多過睇車，其間曾有 friend會合過，但佢最後都選擇「孤身走我路」。 
愛車的 Vincent在 facebook亦上載不少出席車展的相片，不過香車始終不敵美人關。
白 tee撐 Rocky、先撩 Kitty
穿上 Rocky有份搞嘅網站「 WE CAN DO IT」 tee，單拖 Vincent選擇坐 MTR北上，全程佢都係低頭族，用電話同「 Kitty」互動，唔知「 Kitty」最後有冇上深圳呢？
再溝 Cicibaby
之後去到車展， Vincent再同名叫 Cicibaby的女性朋友 WhatsApp，自爆節目講佢上北京溝北京妹，又自吹《求愛》有超過 200萬人睇，節目未出街已經好有信心。
Chris惹火女友爆做媒
同樣身形高大，在夜場做 DJ的 Chris則被視為「花花公子」，週六（ 8日）在《盛男》活動途中， 8位盛男只得 Chris風騷拖住惹火女入場，本刊問惹火女同 Chris係咪男女朋友，該女士就好怕醜咁話：「呢方面你問番佢（ Chris）啦，我哋識咗廿多年，都係岑應（節目監製）朋友！（ Chris參加《盛男》你唔呷醋咩？）佢最後都失敗咗啦！」
當日着住粉紅色衫勁搶眼的 Chris，同着住粉紅色緊身裙的疑似女友情侶裝出現，之後本刊問索女是否 Chris女友時，索女即忍唔住掩面大笑，並怕醜說：「你問番佢啦！」
Justin富二代 ABC
做洋酒生意的富二代 Justin，樣貌有幾分似鄧浩光，可惜身高只約 5呎 4，有啲輸蝕。 
做得富二代當然愛夜蒲，在 fb亦發現 Justin與《求愛》監製岑應（中）及盛女 Mandy（右二）聚會。
整容狂 Queenie 豪做法拉鄰居
盛男個個自信十足，背後一班人生教練一樣夠搶鏡，例如今次在《求愛》擔任首席導師、教導盛男美容心得的陳莉敏（ Queenie）。她 95年參選港姐輸畀楊婉儀後，曾做過空姐及 model，其後加入 TVB8當主持，一直發展平平，直至 06年改做 blogger狂拍美容自學片，先在 OL界冒起，吸引大量美容粉絲。
已屆 40歲中女之列的 Queenie，五官好似公仔般標致，其實全部後天加工，難得她曾自爆全身上下整過超過 30次，加埋起碼用咗過百萬，係正式「整容狂」。而 Queenie曾獨居西貢清水灣的二千多萬獨立屋，本身有家底的 Queenie最近更搬到何文田半山壹號豪宅，與陳法拉做鄰居，超富貴。
買完面罩就搭的士返何文田半山壹號， Queenie一落車就巧遇鄰居陳法拉，兩人又攬又摸，仲傾咗一陣，而 Queenie嘅傭人就企埋一邊等主人吹水。 
上週六（ 8日） Queenie出席完《求》在尖沙咀的宣傳活動後，就急急腳自己走先，原來趕住去附近的藥品買「防油濺面罩」（小圖），究竟 Queenie係煮飯時用定係為美容？要佢自己先知喇。 
何文田半山壹號面積由千一呎起表，月租最平都要 3萬 5千。
呢個脹爆 pizza面係未經百萬豪裝的第 1代 Queenie，註明冇任何 PS過㗎！ 
Queenie自稱整容超過 30次，最近更將第 2次隆鼻手術後的情況拍片放上 YouTube。
人生教練 Karl Hui男定女？
除 Queenie搶鏡外，首集面試團中人生教練 Karl Hui最爆，網友最關注「她」的衣着和性別，其實纖瘦的 Karl Hui 100%係男人，做過李蘊和林莉的形象指導。
Karl Hui許嘉浩外形大改造 
心理誘導追女仔曹佑謙 
相學及風水改運陳定邦
Thomas黄金處男
一話係「處男」全場哄動， Thomas自稱後悔咁坦白，不過睇現場班女嘅反應，認處未必係壞事喎！
Guy IQ140準博士
同樣 29歲的 Guy，在一班盛男中學歷最勁，曾在中文大學擔任助理講師，現正於英國 King's College攻讀博士。華富邨出身的 Guy，曾為賺錢交學費而同時間做 3份兼職，搞到冇晒社交生活， 4年冇拖拍。
身為能源學專才， Guy成日周圍去，尤其經常要北上內地出席研討會，而佢喺 facebook內亦自嘲似阮兆祥添。
如有各盛男或人生教練料爆，快打報料熱線 91062799，電郵報料： mailto:mailto:facenews@nextmedia.com
留言列表
