男友連續兩次夜會「小三」斷正，身在英國工作嘅超蓮 BB都忍唔住要自拍張扁嘴相宣示不滿。不過唔使驚，超浪漫嘅克羣使三兩下功夫就氹番賭王女。
封面
5年食 5女 夜會混血模 餓狼吳克羣呃掂超蓮
賭王何家最索千金何超蓮自去年初成功撻着台灣男歌手吳克羣後，由 fans變女友，二人不時在微搏傳情，今年情人節更自爆人在馬爾代夫，即被踢爆其實孖實吳克羣度假共處一室，甚至瞓埋一張床。
但男人睇唔實好易作反，超蓮自從 3月飛到英國倫敦工作，遠在台灣、又出名係溝女王的吳克羣即刻「放監」，先於月前在台灣包場請「好兄弟」徐若瑄睇《 Iron Man 3》；話口未完，上月底再被影到夜會混血女模 Rima。連衰兩鑊，紀錄已經花晒，但 33歲餓狼吳克羣一樣有計呃掂 22歲超蓮，繼續食住上。
上月何超雲單拖返港，正式同陳山聰一刀兩斷，估唔到細妹超蓮同樣情海翻波。
一次又一次
賴混血模放料
前年 8月台灣傳媒發現歌手吳克羣駕戰車「大黃蜂」載超蓮夜遊陽明山，從此二人愈行愈埋，今年情人節，二人更孖住去馬爾代夫秘密拍拖 4日 3夜，戀情漸漸浮面。
正當二人打得熱，出名係溝女王的吳克羣，卻趁超蓮 3月飛到倫敦工作，即刻作反。
吳克羣先在 4月底包場請「好兄弟」徐若瑄睇《 Iron Man 3》，上月底又被影到孖實混血女模 Rima到戲院睇戲，連衰兩鑊，不過吳克羣處變不驚。何的密友透露：「上次包場嗰件事，超蓮真係好嬲，不過佢係嬲 Vivian（徐）多啲，因為佢覺得克羣個人唔識 say no，所以好多事佢都係被動， Vivian仲要喺 facebook度講，擺明落佢面。克羣當日都即刻搵超蓮自首，又唱歌又講笑，氹咗一大輪。由於超蓮真係好仰慕吳克羣，所以最尾都係心軟原諒咗佢，同埋怪佢唔早啲講囉。今次同混血模更加冇事，因為克羣講到明係俾個 model擺上枱，加上猷啟又飛咗過去陪超蓮，所以大家都係得啖笑，不過克羣就有啲嬲囉。」
11年 8月，吳克羣載住超蓮遊台灣陽明山首度斷正，二人至今交往 1年多。台灣《壹週刊》圖片 
去年底「好兄弟」徐若瑄現身吳克羣新碟發布會，吳克羣即誇到跪地送花，使唔使咁冧呀！《蘋果日報》圖片 
MV攬實上年徐若瑄幫吳克群的新歌〈因為你是女人〉填詞，更以性感打扮跟吳拍 MV，留意吳克群冇着上身衫，二人夠晒熱辣辣。台灣《壹週刊》圖片 
鬧八婆今年 4月克羣包場請徐若瑄睇戲，翌日超蓮即喺 Instagram po上一張佢戴住「 bitch」（八婆）的相，鬧爆情敵。
暗交 7年
22歲的瑞瑪（ Rima），爸爸是黎巴嫩人，媽媽是台灣人。出道 7年， Rima曾參加 11年總統大選其中一個微電影拉票，亦跟小豬羅志祥拍過廣告、庾澄慶拍過 MV。
15歲當年已被吳克羣睇中做歌曲〈殘廢〉 MV女角，所以相識都 7年有多，難怪上月底約出嚟聚舊！
剛大學畢業懂國語、法文、英文和阿拉伯話，雖然 Rima冇超蓮咁犀利有大學榮譽畢業，但同樣有樣有學識，仲識多國語言，唔怪得連出名奄尖的克羣都𥄫中散玩。
31/5夜晚 11點，吳克羣帶住 22歲混血女模 Rima到台北東區附近戲院睇戲，當晚二人一路行一路講一路笑，睇嚟好開心。台灣《壹週刊》圖片 
掂膊頭Rima充滿鬼妹仔性格，同吳克羣邊行邊傾，講到興起仲打咗吳克羣膊頭一下！ 
06年，只得 15歲嘅 Rima被吳克羣睇中揀佢做〈殘廢〉 MV女主角，一早撻着。
性格 open的 Rima擁有噴血身材，經常替雜誌影性感相，吳克羣冧佢當然有原因。 
甜蜜一年半
超蓮自從於 11年被拍到人肉速遞跟吳克羣去陽明山睇夜景後，二人雖然分隔二地，但就經常去外地拍拖，難怪賭王女冧爆。
二人先約定情人節喺馬爾代夫過，吳克羣仲自爆包起小島兼帶女友坐直升機睇風景，咁浪漫，簡直係港女夢寐以求的白馬王子。 
3月吳克羣來港拍戲時，超蓮就專登由英國返港，買外賣入迪士尼畀男友食，仲送埋上房。《蘋果日報》圖片
《蘋果日報》圖片 
4月吳克羣拍戲拍到以色列，超蓮同樣跟到足，先返英國再約埋朋友一齊過去邊探班邊曬太陽。
食住賭王女
33歲吳克羣入行 13年，緋聞名單早已水蛇春咁長，奈何超蓮年前開始追星，結果自己送上門，吳克羣點會掉低呢位最索千金？
據知吳克羣冧女一向有一手，不但識作詩，而且專溝有錢女、叻女或超靚女，一般貨色絕對唔吼。而且吳為人浪漫到暈，日前吳克羣於台灣替斥資逾千萬港元成立的「和群娛樂」做宣傳，便自爆「你想得到的瘋狂、浪漫事，我都會去做。」
面對記者，吳克羣不避嫌話自己好大男人，「和朋友出去，從不讓女生付一毛錢。」被問到帶超蓮去馬爾代夫旅行唔怕被偷影？「那邊可以包下小島，不被任何人打擾。」其後又自爆曾包直升機帶女友看夜景，瘋狂浪漫，雖然冇指名道姓，不過都估到那個「女友」就係超蓮。
已經開始返工嘅超蓮，要面對公司的壓力，突然男友克羣又整單杰嘢，唔怪得佢要去遊樂場 Alton Tower玩吓輕鬆吓。 
本來要返香港探媽咪嘅猷啟為咗陪家姐，專登由美國飛過英國，再同家姐去遊樂場玩確保佢開心番，呢個細佬用心良苦呀！ 
氹掂女友，吳克羣一身鬆晒，仲識同猷啟開玩笑。
超蓮同猷啟係孖生姊弟，雖然大家生活喺唔同地方，不過關係勁好，吳克羣識得向猷啟埋手，果然醒目。 
《蘋果日報》圖片
呃氹呃氹
被吳克羣氹番後，超蓮冇再嬲，仲暗寸某些傳媒唔好再編故事。而吳克羣就夾晒口供話：「沉默……只是從不喜歡自己的私生活在別人編的故事集裏……」風暴似乎告一段落。
向超蓮弟埋手
11年超蓮拎住吳克羣隻 CD放上微博，當時大家只係知佢追星，誰不知後來俾個星追番轉頭。
雖然上月底吳克羣與混血模 Rima約會睇戲被踢爆，而吳克羣亦好快氹掂超蓮。不過為求安心，吳克羣都安排超蓮孖生細佬猷啟過英國陪家姐散心。
「猷啟同克羣幾好傾，可能大家男仔，都係傾 war game、時裝咁樣，加上猷啟都有見超蓮拍拖之後開心咗好多，所以猷啟都幾鍾意克羣。上月底單嘢出咗報紙，因為克羣要搞新公司行唔開，所以佢就問猷啟方唔方便過英國睇家姐，結果猷啟咪專登飛咗過英國。」
雖然克羣至今都未見過何家兩老，不過冧得掂超蓮，而且自己有錢又有事業，下場點都唔會似陳山聰啩？
速食 5女神
唱作才子吳克羣氹女最耍家都係靠才華，一把啷過油嘅嘴，講盡甜言蜜語仲識作詩，呢 5年內就最少冧掂圈中 5大女神。
08年 王心凌
08年主動公開表示欣賞台灣女歌手王心凌，又度身訂做歌曲送給對方，更在王心凌生日派對驚喜現身，因此傳出緋聞。
08年 黃荻鈞
有傳表面花弗，吳克羣實情正印是唱和音的台妹黃荻鈞，不過戀情從 08年維持至 11年，雙方表示回復單身。
12年 8月 鍾欣桐
至於同阿嬌去年在台灣飯聚傳出緋聞，其實二人各自心有所屬，緋聞純為合唱新歌宣傳。阿嬌更飛去北京擔任吳克羣新碟發布會嘉賓，手拖手合唱。
12年 11月 徐若瑄
台北新碟發布會，同吳克羣傳過緋聞嘅徐若瑄就現身支持，吳克羣仲跪地獻上 99枝玫瑰當眾示愛：「她是我最重要的女人。」
留言列表
