So Comment

努力搵錢食壽司　鮨魯山

鮨佐瀨有勁敵……（甲＋）
多年來要食壽司，不二想，一定係鮨佐瀨，最近出現了勁敵，就是林建岳的鮨魯山。兩店都超貴，無千多元一個人都落唔到樓（鮨魯山一個價$2,380/人），但比起在東京一流壽司店要 3、 4萬 Yen一個人亦便宜了。

大廚功架

大廚 Masa， 40歲，來自北海道，功架十足，反手做壽司，壽司板上常放一嚿冰，就係要 keep住塊板 cool。
有兩招大開眼界，切青瓜薄片，請看圖
手先按在青瓜面，牙籤係個 guide，刀放在牙籤上，於是與枱面有個小距離，刀沿住牙籤打橫的路線向青瓜切去，青瓜便變成薄片！另有個切好像洋葱，乾葱質地的葱，一個五毫大的圓柱形，圓柱形打平放在板上，手按在圓柱形，鋒利的長刀快速地一下一下向圓柱平㓟埋去，同時間按柱的手一路轉柱，接住 Masa將刀在柱打直切了兩下，五秒間，葱柱變成葱粒!!!喂，條小柱得 5毫咁大，下下快㓟，把刀又長又利，嚇死！

食物

1.一片薄薄的蘿蔔包住 Tuna，片蘿蔔薄到近透明，夾住 Tuna，但仍非常爽口，好 refreshing。

2.小帶子和魷魚仔，我不大喜歡食帶子的，我好怕煮得太熟好似食香口膠咁，煮半生，我又驚來料唔靚會生病！哈！真麻煩，既然自己咁麻煩，不如唔食帶子了。但這個小帶子 perfect，因為細所以質地好嫩，汁反而我嫌甜了一些，魷魚 baby都未有墨，連中間的透明 fins都未生，好食！香港每年呢個時候開始就有好多 baby squids（吋半至兩吋長，連鬚），可惜我哋可愛的政府又唔畀漁民在港域拖網，乜都無得食！而家在海鮮街市魷魚毛都唔見一條！唉！
3.剝皮魚加佢嘅 liver sauce，嘩，攞命！我的肝已經爆煲咁滯，以 liver補 liver?! Sauce好鮮，好味道，剝皮魚是脆的，正！

4.響螺片加紫蘇花，生平最憎食日本生鮑魚，貴到飛起，硬過石頭，又腥，當 Masa在切響螺時，我見唔到，不然，我一定話唔要，既然響螺片已在面前，沒抱半點期望放入口，朋友望住我……唔腥，亦唔太硬，雖然不是我喜歡食的質地，味道（灼一灼，又唔同咁講法！），但 OK啦！

5.北海道毛蟹腳　 Yummy Yummy, Yummy！甜，甜係鮮甜！
6.鰹魚（即日本常見的木魚片的木魚），不喜歡那個 garlie Sauce。
7.煮物•煮赤鯥魚，朋友食櫻花蝦，他不喜歡櫻花蝦的質地，好似霉霉哋喎，我的赤鯥魚好正呀！不過不及下一道魚！
8.燒物•燒馬頭魚，上面有青豆 peree，炸魚鱗及用梅醃過的蘿蔔，每一樣都好正！魚鱗又脆又鬆，馬頭魚 just right，青豆 peree好味道，蘿蔔少酸，脆爽，食完燒嘢，炸嘢正合！噢，點解唔記得影相?!