石詠莉涉傷人被捕
■石詠莉前晚同樓下食肆負責人爭執有碰撞，佢都因涉嫌襲擊俾警方拘捕，保釋候查。資料圖片
前女子組合Freeze成員石詠莉，噚日朝早喺微博貼咗手臂受傷嘅相，仲留言話：「為了保護媽媽，被無恥食店男老闆打傷了手臂，石妹決定報警處理！」根據警方消息，住喺西貢嘅佢，前晚同樓下食肆負責人口角，石詠莉同食肆劉姓女負責人發生推撞，有人指話腰部受傷，混亂中石詠莉又話俾食肆姓張男負責人打傷手。
警方接報到場，將石詠莉同姓張嘅男負責人以涉嫌普通襲擊罪拘捕，兩人帶署後獲准保釋候查。
石詠莉最近因為不滿樓下賣雞煲嘅食肆油煙太大，早排已經向食物環境衛生署同埋議員投訴，估唔到前晚搞到爭執起嚟。
手臂受傷
馮仁昭噚日打畀石詠莉，佢話：「噚晚我同媽咪去完街返屋企，食肆嘅人又出言侮辱，媽咪同佢哋嘈起嚟，我喺旁邊勸交，想調停嗰陣，我拍咗一拍女老闆嘅膊頭，又拉開媽咪，但男老闆好緊張衝過嚟，我擋佢嗰陣俾佢打傷咗手臂，爆咗微絲血管，咁混亂所以我報咗警，落咗口供同去驗傷。」
而食肆嘅員工噚日指兩位男女負責人都冇返，街坊就話唔信男負責人會打人。
撰文：馮仁昭
■石詠莉自稱為咗保護媽咪同人爭拗，佢仲將手臂受傷相貼上微博。
微博圖片
■食肆員工指涉事男女負責人噚日冇返工。
全站熱搜
留言列表
