So Comment

一係好食!一係難食!  TANGERINE

大吉利是! 乙-
開間鋪叫"Tangerine"喺 Peel Street真係大吉利是!被人剝皮的橘子?!好彩開鋪嘅係一個泰國女子 Ulinda,住喺香港廿多年,講得一口好廣東話,仲有啲沙律類都係佢預備的。

食乜?

Thai Tapas餐牌有兩面,一面係普通泰餐,另一面係 Thai Tapas,我專注 Tapas那面,睇吓有乜特別。全心希望佢係一間好食嘅泰國鋪,因為香港食越南餐同泰國餐都難搵間好食嘅店。

食物

1."Laap Moo"( minced pork$70)。我自己都做得唔錯的一道泰國餸。其實簡簡單單一些碎豬肉,一些 lemongrass碎,芫荽碎、乾葱粒仔、乾辣椒,汁係用魚露、鮮青檸汁、糖。肉碎會變得酸酸辣辣,用生菜包住,好開胃的。 Tangerine那個仲 present得好,生菜剪得齊齊整整放在小兜內,一碟有 4小兜,食起上來又方便。亦算好食。
2.Pork Neck$78。這個燒豬頸肉愈食愈好食,切得細細片,外面燒得又香又脆。汁又好味(我叫了不太辣),這個燒豬頸肉係我食咁多豬頸肉最好食的一個,一層層的豬頸肉片下是糯米飯呢!
3.粉絲沙律( not on menu)$88。老闆娘臨時做的,係蝦冇厘味道,粉絲還可以。



 

Tangerine頗奇怪,一係就好食,一係就好難食,以上係可入口而頗好食。以下係可以退貨的!其實煮功 OK,係料唔好。

1.春卷$68。 Presentation幾得意,將春卷斜切一半,放在小杯內,餡料好味,但春卷皮好硬好實,嘥晒!
2.Deep Fried Tofu$70。嘩!未食過咁難食嘅豆腐,我相信係用板豆腐,嘩!啲豆腐乾過我荷包!食落口啲豆腐會散的,完全係來貨嘅問題。
3.Papaya Salad$88。喺泰國,我見啲工人係咁攞住個 Papaya喺手度,用把刀劈落個 Papaya度,吓吓好似割脈,咁啲 Papaya就會切到一絲好幼的。而 Tangerine一定唔係割脈式切絲,一條條鬼咁粗,食起上嚟好韌。牙都痛,係牙肉都痛!
4.Sizzling Prawn$88。上枱時好吸引,好似波士頓餐廳上牛扒咁,熱到起泡的!食落你話係蟹又得,雞又得,乜都得,因為簡直冇蝦味,唔係!係乜味都冇,原來雪藏的威力咁猛,唔怪得人瓜咗都要入雪櫃啦!
5.仲有個 Beef Roll$80。唔記得影相,係牛肉 warp住幾條芽菜咁幼嘅蘆筍,有一個好「椰」的汁。唔好食,牛肉又老,蘆筍又長又幼,汁又太椰子味。
6.Morning Glory$58。啲貢菜老過我,老闆娘話係用本地貢菜。屙唔出去食就啱晒,好多纖維。
7.Mango Sticky Rice$58。啲糯米飯起角。
咁你話怎麼辦?一定好想返去食 Pork Neck,希望老闆娘能改善貨源,其實味道唔差,係貨源太差了。 Good Luck, Ulinda!





Tangerine

地址•中環卑利街 51號地下電話• 2546 6162

蘇施黃

資深電台人,天生異「口」,除了講嘢叻,食嘢同樣嘴刁,近年開咪、上電視做主持都不離教人食得精,吸引大批粉絲跟佢搵食。


撰文、攝影:蘇施黃

arrow
arrow
    全站熱搜

    tvb4life 發表在 痞客邦 留言(0) 人氣()