上流滙
陳君宜 極罕袖珍貴婦狗
前玩具城董事鄭躬明太太陳君宜( Qinnie),自小對細型狗情有獨鍾,近年多次專程飛到日本揀狗,皆因日本袖珍貴婦狗品種純正,毛色勁靚。「我覺得 teacup poodle(茶杯玩具貴婦狗)好得意,身形的骰又聰明,好易打理。不過香港較難搵到純種,選擇唔多。幾年前我買過兩隻,點知俾人呃,愈養愈大,唔夠 1歲體形已經兩件階磚咁大。」
現在家中最細的狗女「富子」,就是由日本空運到港,成為鄭家一分子。

陳君宜( Qinnie)早年因玩具貴婦狗熱潮,一見愛上。自此她對狗愛不釋手,愈養愈多。「 teacup poodle(茶杯玩具貴婦狗)好得意,又聰明,教兩個禮拜就識自己去廁所。佢哋本身好鍾意乾淨,而且唔甩毛,我有鼻敏感都唔怕。」陳君宜貪茶杯玩具貴婦狗體積夠細,只得 2、 3磅,出街只須帶少量食物、水,就可以日日結伴周圍去。

 

嬌嗲黐身
兩隻狗女小寶與富子表現嬌嗲,一直跟實陳君宜,動作優雅,好有淑女 feel。

孖住出海
陳君宜出動,總有一兩隻寶貝狗陪住。早前她出海曬太陽,愛犬亦黐到實。

 

出世紙
出世紙會列明狗隻已接種 3支防疫針及其出生地、日期,更有標明已做了絕育手術,還有一撮毛作 DNA證明。
日本尋純種

陳君宜活躍 ball場,與千億新抱徐子淇乃老死。她沉醉時裝愛扮靚,早前揼本開網上時裝店 zeuz.com,周圍飛入貨過手癮。

經過兩次買狗被搵笨,陳君宜索性專程飛去東京搵純種狗,帶牠移民香港。「日本嘅 poodle特別可愛,身同腳比例係一個正方形,對腳修長、頭仔細細比例好靚。」最後她揀了出自名門的玩具貴婦狗女。「第一眼已經覺得佢好可愛,可能係緣分,佢一落地就淨係跟住我,我抱咗佢成個鐘,心大心細都冇買。不過行完街仲好掛住佢,於是返狗店再望吓,老公話佢好黐我,不如帶佢返香港。」
之後她找了一間香港公司,包辦運狗、文件申請等一條龍服務,手續簡單。前後 3星期愛犬便到港,買狗加埋飛機運費,埋單 7萬。「佢血統好好,父母分別係日本 JKC(有 50年歷史的全亞洲最大型狗展)嘅冠軍狗,所以身價要成 5萬港幣,起初老公都嫌貴,不過最後心軟囉!老公想叫佢做旺財。我話佢係㗎妹,所以改咗佢個名叫富子,英文名 Tomi。」

頑皮整斷腳
陳君宜的寶貝狗身形嬌小,手腳只有手指骨般幼,要特別保護。「照顧要好小心,因為佢哋太細粒,手腳好幼。好似小寶咁,隻狗女養咗個幾月,自己爬上個籠勾住咗,咁就整斷咗左腳,最後要做手術駁番。」由於狗仔食量小,為了令寶貝狗更健康,陳君宜在狗糧加上新鮮雞肉及牛肉,還要牠們定期食美毛粉及維他命。
熱愛時裝的陳君宜,每季都會幫狗仔換新衫,我會去唔同地方買,泰國、日本、韓國、米蘭都有,最靚係日本貨,質料好兼手工細緻。」

巴黎 Cashmere衫
狗仔有齊 4季衫,這件購自巴黎的 Cashmere,貼身柔軟,索價千六蚊港紙,是最貴的一件。

愛扮靚的陳君宜,連狗帶都特別過人,這條珍珠款狗帶購自日本,盛惠 7百元港幣。

珍珠狗帶

貴氣外套
茶杯貴婦唔夠 4磅


貴婦狗分為 4類,以嬌小型茶杯貴婦最為矜貴,其體重在 1.8kg以下為標準。牠們只有單層毛,屬不脫毛兼有潔癖的犬種,打理方便,只要血統健康,壽命可達 15年。性格活潑,機靈且喜愛社交,是小型狗種中智商最高的類別。由於體形細小,母犬一般需要開刀手術來助產,每胎有 1至 2隻,而一生中只可生產 3至 4次,因此極為罕有,價錢由 2至 8萬不等。
日本運狗易
日本有不少公司代辦運狗隻到香港的一條龍服務,公司會替買家包辦運狗、文件申請等,將狗隻由店舖運到日本機場,到香港後直接送到買家府上,手續簡單。而日本出口的狗隻須滿 60日大,身上植有晶片,確保身份。
寵物入口香港,狗隻須先向漁護署申請特別許可證,有些是需運往檢疫站隔離檢疫,有些是不需要,視乎從那個國家/地方入口而定。署方現時把狗隻許可證分為三組。第一組是狗隻來自狂犬病絕跡的地區,包括日本、英國等八個地區;第二組有三十八個地區,多為歐洲國家。第一、二組的狗隻可免接受檢疫,其他的均屬第三組,包括大陸,必須接受為期四個月的檢疫。

 

 

 

富子剛到港時,因為坐完飛機,軟癱在牀休息。

撰文:蔡靜雯
攝影:陳偉強
錄像:湯文峯

arrow
arrow
    全站熱搜

    tvb4life 發表在 痞客邦 留言(0) 人氣()