囡囡讀英基
陳慧珊老公鍾家鴻去年破產,家庭經濟有壓力,但陳一向愛錫囡囡鍾律然,堅持要讓女兒讀每月近萬元學費的英基國際學校,每日更風雨不改到學校接囡囡放學。

娛聞樂
𢱑無綫有阻滯 陳慧珊轉行教書
42歲陳慧珊,曾是炙手可熱的無綫花旦, 96年拍第一部劇集《壹號皇庭 V》已成功上位,幾年間躍升一線, 02年更憑《絕世好爸》攞埋視后。
不過陳慧珊自 06年下嫁經理人鍾家鴻後,自此專心相夫教女,縱使答應無綫拍台慶劇《衝上雲霄 II》,她亦埋門一腳辭演。據知其老公鍾家鴻自去年申請破產後,一直賦閒在家,近日更不時到雀會消遣,一家生活重擔便落在陳慧珊身上。
本刊收到消息,正在港大讀碩士的陳慧珊,近日積極𢱑無綫拍劇。監製陳維冠原先在新劇預留一個角色給她,但至今仍未得高層樂易玲同意。翻兜隨時凍過水,陳慧珊日前親口向本刊表示:「拍唔到劇,會去教書囉!」

初出道發展便超順利的陳慧珊,曾與蔡少芬、宣萱及郭可盈齊名,被無綫捧為四大當家花旦。可是 06年她下嫁經理人鍾家鴻及秘密產女後,老公慫恿她離開無綫向外闖,事業開始插水。

陳慧珊每逢星期三晚上會到港大返學。不用在幕前出鏡的她,返學時不施脂粉牛記笠記孭背囊,十分樸素低調。

在港大修讀教育系的陳慧珊,坦言還有兩年才修畢課程。她表示若然返唔到無綫拍劇,便會的起心肝舉家移民美國教書。

06年下嫁經理人鍾家鴻後,陳慧珊自此相夫教女。但近日鍾經常唔黐家,孭起成頭家的陳慧珊,惟有硬着頭皮向無綫𢱑撈。
推劇激嬲無綫
自從丈夫去年初宣布破產,陳慧珊曾答允無綫復出拍《衝上雲霄 II》賺錢養家,但到劇集正式開拍,她卻忽然辭演,激到監製梁家樹生蝦咁跳。「價錢、時間乜都傾好,個期都盡量遷就佢湊女。點知佢話套劇要周圍飛,陪唔到個女,所以推咗。今次 Tommy(梁家樹)同樂小姐真係好嬲,講到明短期內唔會再用佢。」知情人說。
之後,陳慧珊曾私下向相熟監製潘嘉德、王心慰和陳維冠等𢱑撈,更坦言就算做第二女主角亦冇問題。
據知近日監製陳維冠開新劇《 Aerobic Girls》,原定預留女主角位給陳慧珊,但開會時,製作資源部總監樂易玲卻唱反調,不滿拍劇要遷就陳的湊女時間,最重要認為她不復當年勇。知情人表示:「樂小姐都係睇數做人,佢覺得 Flora(陳慧珊洋名) 09年拍《搜下留情》演技回晒塘,套劇收視又麻麻,所以唔贊成監製再用佢。」對此樂易玲亦承認陳慧珊尚未落實演出新劇。

湊女推 job
03年陳慧珊夥吳鎮宇拍《衝上雲霄》,原定《衝 II》一直有預陳份,無綫更罕有給她每集 2萬蚊高價酬勞,但陳最後以湊女為由,埋門一腳辭演。

據知無綫高層樂易玲對起用陳慧珊一直有保留,加上陳推《衝 II》得罪埋梁家樹(圖左),即使新劇《 Aerobic Girls》,預定她做女主角,極有可能唔成事。《蘋果日報》圖片
老公唔黐家
陳慧珊急於復出拍劇,老公鍾家鴻卻嘆慢板,除了平時陪老婆買餸過日辰,近日不時相約三五知己到雀會耍樂。知情人說:「阿 Mike(鍾家鴻)間市場推廣公司破咗產之後,呢一年佢都冇乜嘢做,唔係留喺屋企,就係約朋友打牌, Flora又忙湊女又忙返學,都冇時間理老公!」
讀碩士課程
四年冇拍劇,連搵快錢的公開活動亦寥寥可數。陳慧珊近日重返校園,於香港大學修讀為期兩年的英文碩士學位課程。若然無綫冇聲氣,她畢業後便會舉家移民美國,實行轉行教書。
日前,記者發現她風雨不改偕傭人湊女放學,冇工開老公鍾家鴻卻未有現身。傍晚,她獨自駕車到港大返學。對於翻兜無綫極有可能撻 Q,她不願多談,只說:「我只可以講大家好開心,拍唔到劇,會去教書囉,都希望可以喺教育界貢獻吓!」睇嚟她已為自己諗好後路。
衣食住行 慳得就慳

大屋搬細屋
陳慧珊不惜工本讓囡囡讀國際學校,至於衣食住行慳得就慳,除了會到超市執特價貨,以往 10多萬租住薄扶林碧荔道 2,000呎豪宅的她,近日便以 4萬改租同區冠冕臺洋樓。

轉揸舊款寶馬
除了換細屋外,以往出入一直揸開 50萬平治四驅車的陳慧珊,近日改揸二手價值僅 5萬元的舊款寶馬代步,慳得就慳。

撰文:娛樂組 
攝影:攝影組

arrow
arrow
    全站熱搜

    tvb4life 發表在 痞客邦 留言(0) 人氣()