Wyman Wong
白色印字棉質 tee（未定價）
啡色格紋麻質單膊連身裙（ showpiece）
洗水牛仔褲$2,690
卡其色猄皮 Pirate boots$5,890
all Vivienne Westwood
cover face
Wyman“夢想鳥”
做時裝/睇時裝/買時裝，個個對於一年兩度國際時裝周趨之若鶩，「 Fashion Week」套餐，包括呆坐長途機捱時差捱肚餓趕睇騷順便睇埋官方對口單位面色；然而，有機會親睹大師風采有份參與第一手資訊有得俾你摸住潮流脈搏，作為業界一份子，又抵嘅！
時裝光環一戴十數寒暑， Wyman攀上頭排之列，每年每季，頻撲依然，有自唔在攞苦嚟辛。
「自己唔食，細嘅（讀者）都要食；「我好似一隻大雀，定期飛去巴黎米蘭捉啲蟲俾大家囉！」
去年， Vivienne Westwood來港搞騷，邀他貓步，今年，踏上米蘭台板，「個人時裝事業，今日所得，已賺到。」
夢想號列車終於駛上高山，這一隻快樂鳥娓娓道來時裝冷、熱感，就如一代宗師講江湖，圍觀者，請接招。
Profile
黃偉文
出生日期： 1969年 5月 21日（雙子座）
出生地：香港
身高： 5呎 10吋
語言：廣東話、普通話及英語。
學歷：香港中文大學社會工作系畢業
簡歷： 91年，大學畢業後，加入商業電台當唱片騎師。 93年，首次發表填詞作品，此後獲獎無數。 98年起，為雜誌撰寫飲食及旅遊文章，並逐漸擴展至時裝領域。 04年，首次將專欄結集成書《 Y》。 05年，獲得「香港時裝設計師協會第十九屆十大傑出衣著人士」獎。 12年，舉行「 Concert YY黃偉文作品展」音樂會，建立填詞事業上一個里程碑。
主要作品：歌詞《非常口》（ 93），《你沒有好結果》、《小玩意》（ 95），《垃圾》（ 98），《漩渦》（ 00），《 Shall We Dance》（ 01），《露絲瑪莉》、《好心分手》（ 02），《奇洛李維斯回信》（ 04），《浮誇》（ 05），《囍帖街》（ 08），《罪與罰》（ 09），《陀飛輪》（ 10），《那誰》（ 11）。書籍《 Y》（ 04），《黃偉文作品——俗 Loud》（ 05），《生於天橋底》（ 08）。
微博： http://weibo.com/wymanwong
我係特例
時裝周， Wyman也由企位做起，一樣落足本穿上靚靚戰衣走入戰場，當儲積分，儲咗兩年，換個頭位不特止，剛過去的米蘭男裝騷更上埋台行貓步，你話，係咪賺凸先？
「行騷之前，冇任何 expectation，因為，我冇預計過有呢件事發生。
「 11月，香港行騷，對方叫我不如 1月再行，呢個世界最美麗嘅事情叫做『等待』，如果 6月話我知，仲有半年時間俾我，依家咁短，就連呢份期待都剝奪埋！年尾又忙，更加冇心思去憧憬。
「有人想行都冇被揀中，咁睇，我又幾好彩囉！
「 Fitting時，西太后攤開幾百套衫任揀，懷疑佢想睇吓我性格，好似考幼稚園，結果，我跟佢揀嘅好唔同，佢揀嗰套，我點都唔會揀，太素喇！
「貓步唔緊張，行路之嘛！睇過咁多騷，個身要斜幾多度、扭幾多下、塊面要幾黑，乜都見過啦！我仲同雜誌行家講『你哋個個都識行㗎！』
「我記得，演唱會後，彭羚話『呢個係一場美夢，夢要醒，繼續努力生活。』學到嘢喇！騷行完，重回崗位。個人時裝事業，從冇諗過點樣至滿意至算有交代，今日所得，已賺到。
「回頭睇，我好似變形金剛，一人分飾幾角，今次，我 3點上台 4點半已換好衫坐番喺度睇騷，由模特兒變番記者，呢種精神分裂，幾有趣。」
Wyman Wong
藍色格紋西裝外套$11,600
淺藍色條子恤衫$4,990
藍綠色玫瑰印花 bow tie$930
all Vivienne Westwood
Wyman Wong
黑白格仔絲絹束繩上衣
橙色棉質長袖 tee
灰藍色印花低襠褲（ all showpieces）
黑色羊仔皮木屐 ankle boots$6,590
all Vivienne Westwood
年紀大，忿氣喇！
經驗是累積，思想是沉澱， Wyman從來沒教你教我點樣著衫，連每日一 look都慳番，自求我道，閱衫無數，近年，更推動歐美日新牌子入屋，也算是一份功德吧！
「依家，睇騷對我來講，第一係現場第一手接觸實物，感覺模特兒喺身邊行過嗰嗖風；第二個 layer，過咗幾個星期、幾個月，平面媒體再見某一件原本冇乜感覺嘅衫，忽然又覺得幾靚，買又好，寫又好，感覺好唔同。
「始終自己唔睇，都要照顧一班想睇嘅讀者；自己唔食，細嘅都要食，我好似一隻大雀，定期飛去巴黎米蘭捉啲蟲俾大家囉！
「近幾年，男裝一係實用親民，一係追求夢想，我覺得，後者最靚，時裝合該有咁嘅 vision。
「正如今年大家熱哄哄討論 J.W. Anderson係咪癲咗？（編按：女裝男穿）起碼佢做咗啲嘢令大家反省、討論，比起成個 scene死氣沉沉好得多。
「我真心鍾意嘅設計師，跟潮流無關， COMME des GARÇONS、 Yohji Yamamoto及 Vivienne Westwood各有一套造衫方法，某程度上等於超越時尚。
「唔好問雙子座成世人若只可著一個牌子的話，究竟係乜？揀唔到呀！ Touch wood有日破產，或者答到你。
「揀衫睇騷，只考慮一樣嘢，若要踩足 13、 4個鐘至有機會返酒店換衫，後生時，唔會理舒唔舒服，依家，要理囉！所謂貪靚嘅衫，唔會舒服得去邊；年紀大，忿氣喇！」
最佳位置
幾時都話「模特兒飯唔容易食」。
之前幫西太后踩過兩次台板，今次真真正正可以踏上國際貓台，由 fitting到埋身肉搏出場，我有幸貼身追蹤，睇住阿 Y變臉之快……咪鬧我住，意思係工作時認真到唧都唔笑，等埋位時即刻嘻嘻哈哈生猛晒，阿 Y永遠識得喺唔同時候安守自己位置。
綵排時，自得其樂同前面男模比身高，其實阿 Y都有搞鬼一面。
西太后御批俾阿 Y揀「黑眼圈」位置（睇下圖），阿 Y地位可見一斑。
Vivienne Westwood
阿 Y由西太后親自 fitting，比起其他名模更高幾班。
後台等出場，冇飽飯落肚惟有水果充飢，「 嗱 嗱 嗱，模特兒咁瘦，就係咁樣煉成㗎喇！」
阿 Y一出場，眾行家即議論紛紛「好得意」、「乜咁 cool！」，見佢又真係幾淡定喎！
後記
Wyman Wong
酒紅色茄士咩毛氈外套
灰色棉質連身褲（ both showpieces）
黑色羊仔皮木屐 ankle boots$6,590
all Vivienne Westwood
在米蘭，跟阿 Y，四圍騰，很精采。
微雨天對住鏡頭擺甫士， showroom對住 Vivienne Westwood試衫 fitting，後台對住眾男模等化妝等出場，作為旁觀者，每一個場景每一種角色每一件工作，也是難得經驗，這感覺，不止我，男主角也有同感。
如他所言，西太后很有眼光。 Fitting時，阿 Y拿起大會預備的戰衣，「吓！呢套呀？」定一定驚睇真啲，「著咗上身，發現佢哋啱晒，著得舒服，出台時，唔使掛住理件衫，搞到誠惶誠恐；「對方真係一個好值得信賴嘅團隊。」
如此識得賣口乖，對我來說，何嘗又不是一次增廣見識的經驗。
Vivienne Westwood銅鑼灣百德新街 42-48號 B-D號鋪 2894 9088 
留言列表
