點解？點解？點解無我份？（設計對白）
連任全國政協委員的李家傑（中），有機會與李澤鉅睇齊做常委，輸咗嘅郭炳湘（左）同劉夢熊（右）只能酸溜溜。插圖：詹震寰

中環人語

政界最傻問題

2013年02月07日 ~~ 第1196期 香港《壹周刊》

近日全國政協名單出籠，被炒何•何柱國封為「諸葛張關合體」、對 CY有一定功勞嘅尖啤，名落孫山，失落嘅尖啤封晒口。

相反，同樣被「搣柴」嘅新鴻基地產前主席郭炳湘，就激到生蝦咁跳。佢向身邊朋友炮轟，自己並非新地案被告，又唔使做證人，又無亂講嘢，點解全國政協無佢份？佢再數，身為被告嘅郭炳江雖無得連任上海市政協，但其子郭基輝卻為新一屆廣東省政協；就連後輩、恒基副主席李家傑可連任之餘，仲有機會「升呢」做全國政協常委，咁點解忠心為梁粉嘅佢，咩都無呢？水哥不斷四圍問：點解？點解？計小宗話，政治從來「無得解」，有時離奇墮馬，好可能只因傻到好似尖啤咁，不斷爆料問：「點解？」

大陸奇景

神州大地，千奇百趣。本月中，小宗北上採訪，途中喺一個地方見到個房間，上面赫然寫住「未成年人禁止入內」，出入門口者皆為「雄性」，而且個個出來都面容甚為舒暢，舒筋活絡咁款。小記好奇，於是在門口探頭入裡面窺個究竟，大家又估唔估到，呢間係咩房﹙答案見後頁﹚？ 

Give me a book
「樓神」睇書搵突破

Give me a break今期變身 Give me a book，大家得閒抖一抖之餘，亦要勤力睇書增值，今期恒基「樓神」林達民（ Lam哥）就有心水推介。上週四佢去利嘉閣周年晚宴，推介咗近期至愛
——《雲水日月：星雲大師傳》俾小宗。本書係台灣佛光山開山宗師、有「政治和尚」之稱嘅星雲大師嘅傳記，裡面講咗唔少佛學哲理； Lam哥話本書俾到好多衝擊佢，「人到中年有好多框框衝唔破，大師嘅經歷、言行，喺思維上俾到啟示我突破框框。」呢啲正面又積極嘅思想，教曉佢做人要隨緣，「幫我減輕咗工作上嘅壓力。」
無獨有偶，佢嘅女友鄺美雲（ Cally），亦係出名虔誠嘅佛教徒。林達民本來無宗教信仰，而家熱愛咗佛教書籍，今年四月星雲大師來港時，更會正式皈依。最大得着，應該係同 Cally多咗一個共同話題也。


Cally曾對外透露，男友在她家看過星雲大師的佛學書，看來是這本了。


拍拖未夠一年， Lam哥在女友耳濡目染下，已計劃正式皈依。

萬邦投資食食食

上咗市足足四十一年、持有中環萬邦行嘅萬邦投資（ 158），咁多年來發展悶到打呵欠，又非藍籌，本為人所遺忘。不過咁，佢仍有一個亮點，就係年年股東會都「出手」闊綽，令一眾老股東難捨難離。
講緊嘅，係股東會後嗰餐飯；上週五佢哋就一如以往去咗翠亨村開餐。年年彤叔都會親自撐場，今年病咗缺席，就由比佢更老、今年已九十三歲嘅創辦人鍾明輝主持大局；現場見鍾明輝仍精神奕奕，難得！小宗望一望張菜譜，有蝦餃、燒賣、有魚又有元蹄，算係咁，班老股東個個食到捧腹。鍾明輝個仔鍾賢書，被問到公司有咩大計時，好坦白咁話「未來無大計」；既無新發展項目、亦無嘢出售，賣殼更加唔會。怕且繼續落去，萬邦俾人嘅印象，就係經典老股。


挨年近晚，一班老股東坐埋開餐，菜式、場面都似團年，圖中的為元蹄。


九十有三的鍾明輝雖要人扶實嚟行，但紅光滿面，精神奕奕。（張國慶攝）

本週告示
風筒仲可以吹乜？

銅鑼灣三 C紀利華木球會男更衣室貼有告示，話其風筒「只供吹頭髮」——即係 hair on the head——而不能作「其他用途」。除咗用嚟吹頂上青絲，風筒仲可以用嚟吹乜呢？引人遐思也。
三 C會喺一八九四年由英國人 W.D.Braidwood創立，現任會長劉志宏博士，係工程師，又係英倫 King's College之榮譽產品，而其榮譽贊助人並非別人，正是前特首曾蔭權爵士也。陣容咁強盛，呢個會竟然要出到咁丟架嘅告示，其尖頭曼之風何存呢？
仲有，告示兩三句英文而已，竟然搞成咁嘅款，此又豈不愧對前人？點對得住 Braidwood老祖呀？

金牙大狀講嘢
一百卅一億元黑錢？

集友銀行冇反對羅俊城存入、調走一百三十一億元，咁佢犯咗乜罪先？

上期敝刊報導集友銀行捲入一百卅一億元洗黑錢案，涉案雙程證青年羅俊城被重判十年半監。呢單畸士古怪也。
誠然，八個月間羅俊城確係利用佢集友銀行戶口作超過八千三百次交易，存入、調走達一百卅一億元。但咁極其量只係頻密使用佢個戶口而已，集友銀行都冇話唔得，咁佢犯咗乜嘢罪先？
洗黑錢係刑事罪行，即係非但要舉證，證據更加要 beyond reasonable doubt至入得罪。倘若果如控方所指，呢一百卅一億元係黑錢，咁啲錢點黑法先？打劫搶返嚟㗎？販毒嘅利潤？抑或係阿爾蓋達分子嘅資金吖？喺庭上通通都冇講到，咁又點可以叫人信服呢一百卅一億元確係黑錢呢？
我哋唔敢話羅俊城呢十年半監係寃獄，而頻頻存入、調走資金又確係有異尋常，但要入佢以罪，都要證明呢啲錢係黑嘅至得㗎。依家咁判法，唔夠說服力噃！ 

廣告時間

你有某財團嘅黑幕想爆？
你知邊間上市公司造假？
你仲想舉報地產霸權嘅不公？
歡迎你將財金界嘅寃屈或過癮八卦事，爆俾《壹仔》財經組知，一切報料，均會保密！
爆料熱線/whatsapp: 6829 5929

大陸奇景答案：

此乃河南鄭州機場候機室的吸煙房。點解寫到咁委婉，都唔寫明係吸煙房？此不免令小宗𢱑頭也。

中環人語迷你版

現階段並不適合參與全國政協的高層工作。

估中邊個中環人講呢句說話，送你 JWATCH J-37尊貴版藍寶石鏡面限量版手錶一隻有意參加者，請於二月十一日 24:00前將答案電郵 mailto:centralman@nextmedia.com
小宗只接受電郵，郵寄免問。 

上週人語揭曉

我就由國金二期頂樓跳下，一死以謝天下。

答案：劉夢熊
得獎者： Lee Far
中獎時間： 1:00pm 30/1/13

本刊員工及直系親屬不得參加。
為求公平及杜絕偷步搶答起見，請於星期三下午一時後來電郵競猜答案；在此之前發出之電郵作廢。
超過一位讀者估中，先到先得，恕不接受上訴。
答案及中獎者姓名將於一三年二月十四日本欄揭曉。 

(宗菁華)