Rex現在每日駐場打理 LUDDITE，出入時難免與在隔籬開鋪的舊拍檔
Raymond碰頭，但二人已成陌路人。

壹盤生意

打不死　復古店谷底翻生

2013年02月07日 ~~ 第1196期 香港《壹周刊》

做生意，有股東出走，自立門戶，是常見的事。今次生意主角、懷舊男裝店 LUDDITE老闆高子康（ Rex），不但被遠房親戚兼舊拍檔 Raymond「起飛腳」，對方還在隔籬鋪位另起爐灶，擺明車馬對着幹。初時 Raymond不肯退股，令 LUDDITE幾乎要清盤，最後出動家人調解，才「妥協」以高價賣股。 Rex堅信自家設計及二手的懷舊服裝「有得做」，於是向家人借錢，買回股份，重新起步，咬實牙關道：「我唔信佢整得死我！」

由銅鑼灣崇光百貨走到禮頓道的禮信大廈，差不多要十分鐘。大廈地下商場入口並不起眼，一不留神便會錯過。場內燈光陰暗，白色天花剝落，電線鋪塵，有茶餐廳、貨倉、生果鋪及五金鋪，除了午飯時有白領來吃飯外，其餘時間如同一個死場。但偏偏在這個老香港式的商場內，開了兩間歐美式服裝鋪。從門外看，兩間鋪都是黑色門框，配以落地玻璃，鋪內同用昏黃的燈泡，加上木製的枱 櫈，雖然一間賣西裝，一間賣懷舊服裝，但「巧合地」同賣美國式的狩獵服裝、款式相近的煲呔、針織呔和襪等配件，價錢相若。記者好奇問 Rex，才知道兩鋪早有「淵源」。


Raymond招積道：「我以前 serve客 serve得好好，依家舊客都話佢（ Rex） serve得差！」但訪問前，記者曾以顧客身份逛過該兩間鋪， Rex會主動介紹貨品，但 Raymond店內的售貨員則自顧自忙。


熟客阿 Mo是歌手梁漢文的髮型師，經他介紹，梁漢文亦來幫襯，最新唱片《 E.d.M.O.N.D》封套上的一身裝束都是來自 LUDDITE。

蜜月期

約六百呎的 LUDDITE掛滿上百款貨品，包括狩獵外套、工人服、帽、煲呔及皮鞋等，只剩下兩條狹窄通道，有客人喜歡貨品和價錢夠多元化，亦有人嫌花多眼亂。

「律師都話我蠢，容易信人！」今年三十二歲的 Rex，二十三歲去了日本讀服裝設計，畢業後留在當地打工，兩年前才回流香港。大概每個讀設計的人，都想有屬於自己的服裝鋪，所以他在禮信大廈開了間男裝店，他解釋：「香港好多男裝店，但無乜懷舊、歐美軍事風格嘅專賣店，就算有都好貴！」
剛好遠房親戚 Raymond在澳洲過了一年工作假期後回港，尚未找到工作，主動找 Rex合作，「當時我需要人幫手，佢又係讀設計出身，咪合作囉！」二人同樣喜歡美國工人服、狩獵服裝等，一一年七月合資三十多萬，在禮信大廈開設 LUDDITE。「我唔鍾意香港 啲商場個個都一樣，反而想搵有老香港特色 嘅地方，一般人都不會選呢度，當年業主知道我賣衫，都話：『吓？你哋有冇錢交租㗎？』」
二人一同打天下， Rex靠設計行內的朋友介紹，一邊從日本購入古著，一邊在內地找廠做衫。「初時信晒佢，邊度入貨、邊度搵廠做衫，都教晒他。嗰時我喺油麻地開咗間『文化屋雜貨店』，賣日本雜貨，所以睇鋪多數由嗰個人負責。」 Rex說。自拆夥後，他都用「嗰個人」稱呼 Raymond。本來相安無事， LUDDITE接受過多間服裝雜誌訪問後，漸漸吸引到一班熟客，開業大半年後已月賺二、三萬元，最高峰時有五萬元。 

拆檔反目

以為迎來春天，怎知卻是寒冬。去年中，隔壁鋪位放租， Rex見生意有增長，提議租入鋪位，遭拍檔反對。「佢話有朋友租咗來做餅店。」蒙在鼓裡的 Rex就此作罷。怎知有天 Raymond來電，說會到隔壁店做西裝生意。「嗰吓好突然，感覺好像老婆突然出去勾佬！」 Rex氣憤道。幫襯了一年多的熟客阿 Mo亦看不過眼：「 Raymond初時仲話係 LUDDITE分店，只係做唔同路線嘅衫。」
股東糾紛，最麻煩還是「掟煲費」，「最初佢唔肯退股，我賺錢無可能仲要分俾佢，但佢有一半股權，可以要求清盤，要我賤賣間鋪來分錢。」 Rex惟有尋求律師協助，答案是：「律師話可以告他『以股東身份損害公司利益』，但民事訴訟可以拖三、四年，其間要凍結鋪頭資金，加埋律師費，我邊有咁多錢？」最後在家人介入下， Raymond開價二十多萬賣股， Rex無奈向家人借錢買入：「當時 LUDDITE未回本，剛開始有錢賺，廿萬梗係唔合理。」
雙方拉扯了近四個月， LUDDITE以往每兩個月入一次貨，亦要暫停。「 啲客成日問：『有無新貨呀？』我都唔好意思答。」生意由盈轉虧，每月蝕萬多元，加上要買回股權， Rex已負債纍纍。但另一邊廂， Raymond的西裝店裝修得如火如荼，「街坊行過，還恭喜我又開新鋪，連隔籬裝修師傅都走來問我點裝修，因為以前 LUDDITE裝修都係他負責嘅。」 Rex沉着聲道。
記者找 Raymond回應，他對舊公司的事支吾以對：「唔好講啦，係 啲小器 嘅人搞咁多嘢之嘛，之前係有傾，但嘥我時間，俗 啲講句，唔好阻住我發達啦！」一臉不屑的 Raymond彎彎嘴角，忍不住偷笑。


Rex每週總會花兩、三個早上到深水 埗買皮料，待沒有
客人或收鋪後，自己做牛仔帽及為皮具加工。


LUDDITE內有一半貨品均由 Rex設計，再交由大陸工廠製造。

重新出發

銅鑼灣禮信大廈有多間平價茶餐廳，每逢中午都吸引一大班在附近工作的白領，但其餘時間則較為冷清。圖右的「文化屋雜貨店」亦為 Rex所有。

開業以來， LUDDITE七成貨品是男裝，主要是美國工人服、軍服、軍用品、狩獵裝，還兼售皮鞋和帽，「有一半係二手嘅，有時自己旅行搵返來，或託朋友幫我喺唔同國家 嘅二手店搵；其餘係自己設計，去深水埗買布、配件，再寄上大陸嘅廠做，每款做二十件左右。」 Rex說，店內有兩成貨是衣服配件，如煲呔、針織呔和襪，來自日本認識的一班設計師，最後一成是從日本古著店找回來的女裝，「女仔愛乾淨，所以古著衫嘅客以男性為主。」 Rex笑說。
和拍檔的四個月糾紛中， Rex集中設計新款及找古著。為免被 Raymond抄襲， Rex找新廠做衫，及親自飛到日本找新貨源。去年十一月，新貨終於到齊， LUDDITE總算有個新開始。「油麻地間雜貨店無做了，依家星期一至日都係自己睇鋪，最多請兼職頂半日。」現在， Rex早上到深水 埗買材料，下午在鋪頭邊看鋪，邊設計及車衣，「幾乎晚晚都做到兩、三點先走，係辛苦 啲，但我好享受依家生活，可以做自己 嘅設計、賣自己想賣 嘅衫。」糾紛後，有批熟客走了， Rex並不擔心：「我睇過一本書，裡面講到：『用最好的心情，面對最壞的事情』，佢整我唔死，但我以後都會學識保護自己，不再太容易相信人。」 

開業成本（ 07/2011）

租金*：$80,000
入貨：$150,000
裝修：$100,000
雜項：$30,000
總投資：$360,000
*兩個月按金、 1個月上期

營業資料（ 12/2011）

營業額*：$100,000
租金：$20,000
入貨：$45,000
人工*：$20,000
水電：$1,500
盈利：$13,500
*一個老闆人工

一點
意見

吳伯恩（恩記），鉅龍酒家老闆。○三年他和黃永幟（幟哥）夾股開設龍皇酒家，後來因意見不合，最後吳伯恩憤然退股離開。這次以作為過來人身份，為 Rex提供意見：
1.合作做生意講個信字，但為保護自己，必須先小人後君子，花一筆錢在合作前上律師樓簽好協議，解釋所有股東嘅權利同責任，免得最後公說公有理，婆說婆有理。
2.開鋪前先註冊一間有限公司，由公司持有服裝店，這樣雙方股份、賺蝕更加分明。兩個人開會，都叫做股東會，要寫會議記錄，最好錄音。我以前不肯做，覺得令股東之間無了互信，但之後卻發現有人反口覆舌。 

撰文：楊慕珠
攝影：于港民