So Comment

老嘢去 Happy Hour　 Bloop

2012年12月28日 ~~ 第909期飲食男女

蒲點
剛落機的 18歲靚女告訴我，佢約咗啲英國同學 31號喺 Bloop Countdown。
朋友的囝囝去 Bloop勤力過返工。哈！真像我當年晚晚蒲「 DD」一樣！唔出「 DD」周身唔舒服，星期日係 kids' nigth，冇酒飲，全部 18歲以下小童出現，我同陳百強死都要去打個白鴿轉，食杯紅豆冰，開心！
蒲的 99%廿多歲， young and beautiful，真係 18冇醜婦！最正嘅係佢哋 full of energy！開心的一群！

鯊魚！

「 Bloop」係海底深沉的低音。點解叫「 Bloop」呢？因為 bar內有一個長長扁扁的魚缸，養咗 4條小鯊魚。呢啲咪聰明囉，起碼有個話題俾人講吓。 4條友仔游得好快㗎，因為我想影佢哋，一啲都唔容易。我最 curious係咁 4條友仔大咗咁點算?!原來，鯊魚放在小地方咁就唔會大，就睇住佢哋游來游去都幾優游自在。
其實全間店同其他 bar冇乜唔同，特別之處全在小地方。像𨋢門一開便會見到一個頗大的「 Bloop」字 in the shape of a shark！藍色燈底，有海底 feel， logo已解釋咗開店了。叻！
再入內，小小的 bar，對住 bar有一行好窄的地方放咗幾張枱，枱側就係呢個廿幾呎嘅 shark tank。跟住就係露天，未坐低都覺得冇乜特別，一坐低就覺得自己好似跳樓咁，因為圍欄係落地玻璃，真係落到地下，咁坐低之後，你隔籬只有幾吋就直望落地面！不要忘記，我在 21樓呀！救命呀！

SHISHA...

水煙，唔識食，真係攞你命，食水煙係吹嘅，唔係吸嘅。一吸……哈哈……一口都係煙水。
好記得細個時喺成和道「和興」門口的報紙檔老闆就係吸「水煙帶」，一支粗的直竹，老闆就拿住香，不停地點火，老闆將個口埋在竹筒的頂頭，只聽到「 boo-loo-boo-loo」聲，有煙出，好奇怪！完全唔明！
直至自己試了 shisha，啊！多年的謎打開了！今次冇食 shisha，所以冇影相了。
各位老嘢又想八吓後生仔蒲也，我勸大家去 happy hour好了，$60一杯嘢，又平！唔好阻左啲後生晚上去蒲嘞！自己後生去蒲都唔想碰到自己老竇老母啦！

Bloop
地址：中環德己立街 38-44號好利商業大廈 21樓
電話： 2686 1234

蘇施黃
資深電台人，天生異「口」，除了講嘢叻，食嘢同樣嘴刁，近年開咪、上電視做主持都不離教人食得精，吸引大批粉絲跟佢搵食。