作風向來較保守的恒生，旗下恒生證券被業界批評用「陰招」買窩輪，負責證券業務的執行董事馮孝忠（右）不無責任。圖左為六月上任的恒生銀行副董事長兼行政總裁李慧敏，接替退休的梁高美懿。（于港民攝）

財經脈搏

恒生證券　「陰濕」買窩輪

2012年12月27日 ~~ 第1190期香港《壹周刊》

最近，有行內人爆料，指每日競價時段，恒生證券於近百隻窩輪掛「陰濕」買盤，開價只是現價的六分之一至七分之一，價位看上去十分吸引，但其實少一個小數點，即是兩仙以為是兩毫，懷疑是搏投資者睇錯價而出貨。不時有心急為客出貨的經紀「中招」，有經紀甚至因此要賠償六位數字款項予客人。本刊過去兩週，追蹤恒生證券的窩輪買盤，發現每個交易日都大規模擺下「陰濕」陣，恒生證券卻厚顏回應：「我哋完全合法㗎喎！」但行內老行尊則推斷有市場老鼠利用股民弱點來搵食。

每個交易日的競價時段，恒生證券都掛出大量「超低價」窩輪買盤。如上週五，美林發行的和黃認購證（ 20618）前一日收市價為$0.165，恒生證券掛出的買入價為$0.024。

「每朝九點至九點半開市前的競價時段，近百隻窩輪都會出現恒生證券買盤，開價同前一日收市價相差好遠，但驟眼望落去會以為個價好吸引，好似隻 19270（聯想荷合三一認購證），現價係$0.3，恒生證券落個買盤價就$0.04，誤導啲唔小心嘅投資者，以為現價係$0.4，急急腳沽出。」宏高證券分析員梁杰文月初向本刊報料，指斥恒生證券有「搏大霧」之嫌，欲以七分一價錢買入「平輪」，誤沽貨者只得一殼眼淚。

過百「陰濕」窩輪盤湧現

宏高證券分析員梁杰文指，香港應參考新加坡做法，立例保障買賣衍生工具投資者，假如買賣價與現價偏離超過兩成半或廿五個價位，可以錯誤交易為由，要求取消。
（張國慶攝）

在過去兩週的交易日，記者在每日的競價時段，查看多隻上市窩輪的落盤情況，發現踏入九時，恒生證券即於短短兩分鐘內，掛出近百隻窩輪買盤，金額通常為十萬元，開價與前一日收市價相差約六至七倍，日日如是。當中涉及不同發行商出的窩輪，並遍布多個板塊，如中資股工商銀行（ 1398）、華晨中國（ 1114）、崑崙能源（ 135），本地薑思捷（ 330）、和黃（ 13）等都被揀中。例如上週四，約於九時十九分，法興的工行窩輪（ 21158），按盤價為$0.229，但恒生證券則掛$0.034。
恒生證券漁翁撒網式落盤，上月就有「盲頭烏蠅」不慎中伏，受害人更是經驗老到的股票經紀。「平時入貨唔會咁唔小心，恒生證券喺好多窩輪落盤，而且報個價咁似高過現價，完全捉到我當時緊張嘅心理。」該經紀憶述。由於窩輪市場波動較大，熟手炒家買入窩輪後，會於即日沽貨獲利。他有次代客購入一隻由麥格理銀行發出的窩輪後，即日未等到理想價錢，便冒險「揸過夜」。「買輪那日，我買賣其他股票已經愈輸愈寒，於是第二朝急住放隻輪。開市後輪商遲遲未報價，我見到恒生開個價幾好，就即刻沽俾佢，成交後先知中招，嚇死我！」原來他錯把$0.022看成$0.22元，結果輸掉約十萬元，須自掏腰包償還予客戶。他嘆口氣道：「唉，我不嬲唔鍾意 trade（買賣）窩輪，以後避得就避！」

如何中招

恒生證券經紀以某窩輪現價六至七分一價位落盤買貨。

買盤價數字看上去大於現價，但其實少一個小數位。

急於幫客散貨的經紀，以為買盤價為$0.2，賣出窩輪。

交易完成，才驚覺「中招」，要賠錢予客人。

走法律罅執死雞

事實上，港交所規定，所有買賣盤的落盤價，不可超過現價的九倍或少於九分一，而恒生證券掛的「陰濕」盤剛好介乎現價的六分一至七分一之間。買盤於競價時段內掛出後，若該窩輪交投淡靜，沒有其他更高價的買盤出現，恒生證券的買盤會在開市後，持續成為該窩輪的買入價。如有客戶落「柯打」以市價賣出窩輪的話，便輕易中伏。梁杰文認為此舉非常不公：「佢係無犯法，但市場應該係一個公平買賣的平台，確保每個人都係 well-informed（得到足夠資訊），而唔係專吼人哋啲 careless mistakes（不小心的錯誤）來賺錢。」
能夠如此大規模、固定的「漁翁撒網」，不少行內人都認為有幕後黑手策劃。有外資大行衍生工具部高層說：「其實大家都有眼睇㗎啦，每個盤都有一個 owner（持有人），可以係散戶，但亦唔排除係證券行自己部門負責做呢啲交易。」記者曾以自己的恒生證券戶口落盤，由輸入資料到落盤，過程需時最少二十秒。恒生證券每個交易日都可於兩分鐘內落近百隻類近的「陰濕」盤，絕非個別網上散戶所為。買家亦有可能於九點前已透過經紀落盤，但香港證券及期貨從業員工會會長林德明就質疑：「如果個差價咁大，經紀通常會建議個客唔好開個咁誇張嘅價，呢個係職業道德嚟。」梁杰文更懷疑有關買盤是電腦預設的程式盤，每朝「自動波」落盤，才可如此「快、狠、準」。

近年包括恒生在內的各大銀行均大力發展證券服務，搶走中、小證券行不少生意。（關永浩攝）

高盛烏輪事件的投資者，曾公開向高盛追討賠償，及向前立法會議員涂謹申（左一）求助。（《蘋果日報》圖片）

行內人鬧爆

詹培忠
前立法會金融服務界議員

「呢單嘢我聽過好耐㗎啦，擺明係人為控制，根本就不公平、不合理，我覺得係有伙記有目標及有意策劃，透過技術性方式獲取利益。因為未有人集體受害，所以無人理。以前迷債都無人理，出咗事先有人理！我哋同證監、港交所嘈咗好耐，但政府聽而不聞、聞而不做、做又不切實際，有乜計？」

張華鋒
現任立法會金融服務界議員

「我有聽過你講嘅事，競價時段啲差價差好遠，好似$0.01睇錯咗做$0.1，一個唔覺意就搞錯。證監同港交所都要對競價盤有價格限制，但政府唔夠膽郁啲大行，人哋有大把律師，吓吓同你講法律原則都煩死你，散戶只有任得佢屈咋。」

李細燕
香港證券學會會長

「有唔少客都同我提過：『嘩，又有錯盤喇！』有啲客仲一次過 trade（交易）咗十萬蚊。我幾個星期前已同港交所反映過，依家仲未有回音。港交所應該設定個買賣盤限制，保障番投資者。」

譚紹興
香港投資者學會主席

「以前都試過有人喺開市前競價時段亂咁擺盤， 09年亞洲果業（ 73）試過前一日收市價係$5.89，開市升咗近九倍到$51.25，要即刻停牌。唉，競價時段亂咁開價都得㗎，散戶要小心睇實。」