胡先生到法國醫院做通波仔手術，付了十萬六千多元，但因賬單沒細分手術室費及麻醉費，令他無法全額索償。（江永健攝）

投訴

法國醫院唔肯列明收費　保險 claim唔足

2012年12月27日 ~~ 第1190期 香港《壹周刊》

本刊早前踢爆聖德肋撒醫院（即法國醫院）搏大霧亂收費，事隔兩週，又再收到投訴。有讀者進行通波仔手術後，因醫院不肯詳列各項收費項目，最終未能向保險公司索取十足賠償。

胡先生九月初突然感到心口翳痛，遂到法國醫院檢查，「醫生檢查完之後話我有條血管塞咗七成，要做通波仔手術。」手術費連住院三日，共收取十萬六千多元。胡先生其後向昆士蘭保險公司索償，卻發現只獲賠三分一費用，僅三萬六千多元，「佢張單寫得咁求其，手術室費用同麻醉費用都冇分開寫，冇咗呢兩個項目，我 claim少成萬蚊！」

跟進　企硬唔改單

法國醫院最後只肯為事主簽發信件，證明事主曾進行麻醉，但保聯主席潘榮輝批評做法極不合理。

胡先生經一輪投訴，院方仍只肯分開列明手術室收費。記者其後陪同胡先生到法國醫院查詢收費事宜，醫院行政部職員梁小姐仍企硬拒改單，只肯寫信證明他有做過麻醉手術，但不會列明收費，「你做嘅係局部麻醉，條數已經計咗入物料費，我哋唔會 break到個數出嚟俾你。」 

專家話　醫院有錯

香港保險業聯會保險總會主席潘榮輝批評，法國醫院不肯列明各項收費，極不合理，「消耗性物料，好似棉花、藥物、麻醉藥呢啲大 item，好容易計到用咗幾多，一般都可以細分個價錢出嚟。」胡先生曾向昆士蘭保險公司查詢，該公司表示，就算在手術中未有麻醉科醫生在場，只要列出在手術過程中所涉及的麻醉費用，亦可索償。
心臟科專科醫生鄭長華亦指，醫生在進行手術前，一般都會先向病人解釋清楚手術流程及費用，法國醫院明顯處理失當，「一早講清楚，等佢可以問定保險公司，再同醫生配合番點收錢，咁就唔使拗嚟拗去。」


醫院行政部職員梁小姐企硬拒改單，只肯寫信證明事主有做過麻醉手術。（袁筱儀攝）


法國醫院屬被投訴賬項收費混亂，消費者找數時最好查單。（郭永強攝）

回應　拒不改單

本刊把胡先生的投訴轉介至法國醫院，其發言人重申，由於胡先生做的是局部麻醉，故不會單獨在單據上寫上麻醉費用，還說︰「好似剝牙咁，都要打麻醉針，你都唔會分開寫喺張單度㗎！」（馬梓皓）

壹判官

法國醫院唔肯清楚列明收費項目，市民若果要 claim保險，真係要諗清楚！
評分：劣劣劣劣劣
（五個劣為最嚴重）