黑白圓點 bowtie$1,900
白色禮服恤衫$5,200
Both from Tom Ford
黑色西褲價格待定 3.1 Phillip Lim
閃綠色乾濕褸價格待定 Burberry Prorsum
動物雕刻雨傘$1,790 Fox Umbrella from initial
Midnight in Paris玫瑰金鑲砂金玻璃及
霜面藍水晶袖釦$63,000 Van Cleef＆ Arpels
黑色咖啡枱 Bontempi Casa
Cover Story
我的 2012 黃偉文
執筆之日，還有兩天，便到所謂的地球末日終結時；末日前還在趕稿，既是殘酷現實，也相當超乎現實。
如何面對 12月 21日？如 Wyman借唐滌生《紫釵記》之劍合釵圓其中一句話齋：「有生一日都望一日呀！」盼望中暗藏希望。
何嘗不是正面人生的積極態度？世界不滅，生命還是要繼續，年終的回顧與前瞻仍得薪火相傳延綿下去，更何況 2012年的香港，山雨欲來，波譎雲詭。
「 2012係有辣有唔辣，我諗都算得上係十年來最多上街最多遊行嘅一年。唔好地方係：如果唔係發生咁多唔對路嘅事，就唔使上街，唔使遊行，唔使有咁多社會上比較明顯嘅表態；掉返轉頭睇，就係依家啲人唔再逆來順受，响大事大非面前，會表態會遊行會用盡方法去 voice out自己。姑勿論要彈劾特首件事結果係點，都係我哋以前唔夠膽、或者唔知道自己原來係享有權利做嘅事。而重點，已經唔係梁振英做得好唔好，呢個特首係咪稱職；而係我哋終於有自醒同判斷能力，為自己認為對的事爭取表態。呢啲咪國民教育，梁振英咪係國民小先鋒囉，你睇佢帶領我哋做咗幾多嘢，哈哈
哈哈∼」
既然家事國事，亦是他也是你和我的天下事，就請敝刊的 Guest Editor黃偉文由自身、衫國以至詞海，回顧 12，前瞻 13。
關於自身
黃色菱格紋 bowtie$1,900
白色禮服恤衫$5,200
黑色西褲$11,000
All from Tom Ford
黑色 Astrakhan雙面外套$274,700 Hermè s
金色星星閃片手套價格待定 KTZ
Chair One白色椅子 Constantin Grcic
回顧
2012係好特別的一年！大概十年前開始，我的人生規劃，就係盡可能每日唔做多過四個鐘頭的工作，更加唔要一個星期做足七日。套用蘇民峰講法叫舒服得財，我覺得如果做到，都係幾好人生目標，即使唔得財，舒服都要行先。所以這幾年的工作都好俾心機去做，總之貴精不貴多——其實一路以來都守得到，除了每星期要交的專欄、出席時裝活動、去時裝周之類無日無之飛嚟飛去常規工作以外，每年我只會接一項新的工作，叫做俾自己調劑一下。但這一年突然有好多事發生，全部都超額完成。最大 project當然係演唱會，然後為了這個演唱會再開發了很多邊際產物，例如 CD和 DVD，臨近歲晚仲趕緊隻 Blu-ray俾大家做聖誕禮物。同一個本地時裝品牌做了 crossover。為深圳 衞視做了十集歌唱比賽評審，正式踏入神州娛樂事業。中途無端端殺出個哈佬喂聖羅蘭，代言都做得古靈精怪過人……因為已有多年維持在睡火山式、或者係低空飛行待機狀態，直到咁樣去花時間密密做，仲要係一路做一路推咗好多 job，只做自己覺得好玩唔做唔得的工作，竟然都唔覺辛苦，仲非常感受到嗰兩個好老土的字「起勁！」。所以若要總結這一年，我覺得係有趣，開心到不得了，如果要寫日記或年刊記錄，好應該得到燙金字同零舍大本啲。 
閃藍色禮服$30,900
紅色 bowtie$1,900
白色禮服恤衫$5,200
All from Tom Ford
水晶裝飾絲絨 loafers$12,500 Giuseppe Zanotti
Limelight Party 18K白金面具
鑲嵌 400顆共重 14.02克拉圓鑽與
3顆共重 1.29克拉梨形切割鑽石$1,320,300 Piaget
Voido Chair黑色安樂椅 Ron Arad
前瞻
放眼 2013，我唔會有任何特別計劃，你知香港娛樂圈就係咁，無得預亦唔到你計，但我相信當你郁咗其中一樣嘢的時候，其他板塊就會自自然然跟住移動，而甚少唔會引起任何地震與海嘯效應。就正如我响 2012年最出力一定係演唱會，如果無演唱會，唱片出唔到咁多，亦未必有人會記得我然後拍咗個好入屋電視廣告，更加未必有大陸電視台搵我做評審，所以我深信有啲板塊 2013年會繼續餘震。唯一唔關事，係將會為一本大陸雜誌寫專欄。點解？講個偉文解密你知，咁多年來長期服務嗰幾份報章雜誌，之所以能一直合作，一來風格夾到，我本身鍾意睇，更關鍵性係因為熟朋友叫到我至做。我覺得要有恒心、毅力、每個禮拜每個月交稿到一個地步而無令朋友兄弟失望過，都係一種好大動力。基本上亦係我這十幾年來做事主調，即是要熟朋友、有緣人先會做囉！
關於衫國
水晶耳飾$6,590 Givenchy by Riccardo Tisci
黑色恤衫價格待定 Dolce＆ Gabbana
黑色 bowtie$1,900
黑色繡花晨褸$44,200
Both from Tom Ford
Constellation Monoceros白金鑲鑽石及粉紅藍寶石獨角獸胸針價格待定 Van Cleef＆ Arpels
白色花形吊燈 Kare Design
回顧
我會覺得哈佬喂聖羅蘭係一個幾好玩的 project，有少少係我 set咗個波俾羅蘭姐埋門一腳射龍門囉！成段片我拍咗 70%，羅蘭姐只得 3秒，我一路帶住個波俾位佢射，我係好榮幸能夠做到這個位置。我好鍾意這位前輩，雖然同羅蘭姐唔熟，私下亦無乜通電話，但記得佢當年攞香港電影金像獎時，唔知點解會請我食飯。其實嗰餐影后飯仲有幾個後輩麻甩仔「圍威喂」一齊食，包括鄒凱光同葉偉信，我只係掹衫尾其中一個；事後始知羅蘭姐攞影后以來都係人請佢，掉轉頭佢請人的，唯獨這餐限量版飯，哈哈哈！
我想講的是，細個時候，身邊好多人都講到「入屋」係一件好正的事，只係我好清楚知道自己選擇行嗰條，並非一條咁易為普羅大眾所明白、討人歡喜易入屋的路，試問執意安排自己去塞外、上冰川，點會易入屋，係都揀條近市區少少嘅路啦！事實早年也曾做過兩年《勁歌金曲》主持，嘥咗一年時間去拍咗套好難睇處境劇，做盡入屋之能事，但都不果；結果拍這個廣告反而更入屋，連耆英都知，噏唔出個名都識嗌我做聖羅蘭！年紀大咗，終於體會到有啲事情真係好奇妙：當你好想得到一樣嘢，用盡各種方法好努力都得唔到，放低，明白世界好大，人生應該仲有其他目標可以追求時，啲嘢唔知點解就會自自然然返嚟。正如我 30歲前會覺得人生起碼要令自己上一次封面，那怕只得一次，然而一直都得唔到；直至 30歲覺得係人生重要分水嶺，應該清楚邊啲值得努力，邊啲唔好再嘥時間停留——因此決定實實在在寫好歌詞同專欄，鍾意時裝就去多啲呢類型活動，其他不作強求時，結果我所有時裝雜誌封面都係由 30歲之後開始！呢個唔係勵志古仔，大家唔好覺得我喺度灌輸緊一個唔好強求，將來就會得嘅事例；要知道有時唔強求都未必得到，甚至一世都無。我始終相信板塊理論，當你做好一件事，世界自然就會帶你通往一個可能諗都無諗過的樂園，而呢樣嘢就係叫做 bonus！
前瞻
2013年的重要事，就係嚟緊 1月份男裝周，或者，可能，有一件對我嚟講幾期待的事情會發生。畢竟在時裝界打滾咁多年，如果成事，於我，都係大事！不過，以我做人宗旨：一日你唔喺我面前出現，我都唔會相信所謂上緊橋轉埋個彎 5分鐘就到嘅說話。對人如是，對自己亦如是。我從來都唔係嗰種得把口吹噓嘅人，我係做出嚟俾大家睇至實牙實齒講嗰種。一來核突，二來做人咁多年，點會唔明白世事有好多變數的道理，所以一日未真正發生，都唔會講到實當真。
關於詞海
黑色絲絨禮服$25,000
黑色 bowtie$1,900
白色禮服恤衫$5,200
All from Tom Ford
迷彩紋長褲價格待定 Valentino
Multilamp黑色射燈 Emanuele Magini
回顧
我諗「只做熟客」四隻字，都係一個幾概括到我揀嘢做的原因，寫歌詞亦然。基本上，我從來無話封盤唔做生客，只不過近年都係接熟客居多，都係以前合作過而又合作得好好的朋友。對於這些黑咭會員，係應該得到優先照顧，因為大家都有咁多年感情同過去，經歷咗咁多事，先升級到做黑咭會員，係應該得到相應的貼心服務。就好似做私房菜一樣，一個月至開一晚，一晚先做得嗰一枱，陰鬼功，有熟客打嚟訂位梗係留枱俾對方先，真係好有緣分好想做至開放俾生客。早幾年話減產，寫得咁少，減極都叫做有廿零隻； 2012得番幾日就完，埋單找數我諗廿隻唔夠，我覺得最虧欠一定係歌詞方面，而當中寫得最多，一定係容祖兒、何韻詩、薛凱琪、陳奕迅、王菀之、蘇永康同劉浩龍。 
拼貼皮革迷彩紋外套$45,000 Valentino
黑色 bowtie$1,900
白色禮服恤衫$5,200
黑色腰封$3,500
黑色西褲$11,000
All from Tom Ford
Alhambra白金鑲灰色珍珠母貝母袖釦$37,400 Van Cleef＆ Arpels
前瞻
咁究竟今年有無接過生客呢？唔……又好似真係無喎！咁唔啱，我應該從 2013年開始訂一個目標，就係每年都要同一個未合作過的人合作。我覺得會係一件幾有趣的事，從中可能帶出個不一樣的自己，其實一切事在人為，既然決定每年都留一個名額去招收新會員，就坐言起行去做囉。當然入場資格係要講緣分，而緣分亦有好多種，真正的交往之外，仲有分眼緣、耳緣。正如當初點解會三九唔識七寫到去台灣咁遠俾林宥嘉，因為星光大道的時候，已覺得對方合眼緣、唱歌好聽、性格上有啲嘢令我覺得可以做到朋友，所以在好少寫國語歌詞、唔特別鍾意寫盡可能都唔寫情況下，佢叫到都寫。 
撰文：趙朗楨
形象：梁俊鵬
攝影：張家樂
相片處理：詹震寰
化妝：王穎、 Karen＠ iMAKEUP
傢具、燈飾提供： Aluminium urban living（ 2577 4766）
mailto:nextplusone@nextmedia.com
留言列表
